Bara Citizen Journalists-BCJ

07/09/2026

پیٹرول 12 روپے 90 پیسے ، ڈیزل 3 روپے 73 پیسے مہنگا کردیا گیا۔ نوٹیفکیشن جاری

06/09/2026

ناجائز نظام کی پیداوار جعلی وزیراعلیٰ نے دہشتگردی کے حوالے سے مودی اور بھارت کو کلین چٹ دے دی
جبکہ پنجاب کے ساتھ لگنے والے تینوں صوبوں کو دہشتگردی کی بنیاد قرار دیا، اس بیان نے پاکستان کے عالمی سطح پر مؤقف کو تباہ کر کے رکھ دیا ہے، وزیراعلیٰ سہیل آفریدی کا سی ایم مریم نواز کے بیان پر ردعمل

04/09/2026

سندھ میں سٹریٹ موومنٹ کے دوران وزیرِ اعلیٰ خیبرپختونخوا سہیل آفریدی کے قافلے کی کوریج کرنے والے صحافیوں پر تشدد، کوریج کا سامان بھی توڑ دیا گیا۔

04/09/2026

باڑہ
اورکزئی شہری کے مبینہ اغوا کا الزام،
بازیابی کا مطالبہ
قبیلہ ذخہ خیل سے تعلق رکھنے والے افسر خان اور دیگر افراد نے باڑہ پریس کلب میں پریس کانفرنس کرتے ہوئے دعویٰ کیا ہے کہ 27 اگست کو ان کے مہمان اورکزئی سے تعلق رکھنے والے طاہر خان کو باڑہ چڑھائی سر کے مقام پر واقع صدا بہار ریسٹورنٹ سے مبینہ طور پر اغوا کیا گیا۔
پریس کانفرنس کے شرکاء نے الزام عائد کیا کہ طاہر خان کو صادق خان اور طارق خان نے مبینہ طور پر اغوا کیا۔ ان کے مطابق واقعے سے متعلق درخواست متعلقہ تھانے میں جمع کرائی گئی، تاہم پولیس اور خاصہ دار فورس کے احتجاجی دھرنے کے باعث تاحال مقدمہ درج نہیں ہو سکا۔
مقررین کا کہنا تھا کہ مبینہ طور پر مغوی طاہر خان کے اہل خانہ شدید تشویش میں مبتلا ہیں، جبکہ ان کے بچے بھی اپنے والد کی بازیابی کے لیے مطالبہ کر رہے ہیں۔ پریس کانفرنس کے موقع پر طاہر خان کے رشتہ دار بچے اور بچیاں بھی موجود تھے۔
شرکاء نے ڈی پی او خیبر اور سی سی پی او پشاور سے مطالبہ کیا کہ طاہر خان کی بازیابی کے لیے فوری اقدامات کیے جائیں اور واقعے کی شفاف تحقیقات کرکے اگر الزامات درست ثابت ہوں تو ذمہ دار افراد کے خلاف قانون کے مطابق کارروائی کی جائے۔
پریس کانفرنس کے بعد شرکاء نے باڑہ پریس کلب کے سامنے احتجاجی مظاہرہ بھی کیا اور مغوی کی فوری بازیابی کا مطالبہ کیا۔

03/09/2026

ڈسٹرکٹ پولیس آفیسر خیبر وقار احمد کا تھانہ جمرود کا سرپرائز وزٹ، مشران سے ملاقاتیں،کمیونٹی پولیسنگ کے ذریعے علاقے کے مسائل اور جرائم کی روک تھام پر تبادلہ خیال

ڈسٹرکٹ پولیس آفیسر خیبر وقار احمد نے تھانہ جمرود کا سرپرائز وزٹ کیا، جہاں انہوں نے محرر اسٹاف، روزنامچہ، مختلف رجسٹرز، پولیس ریکارڈ اور حوالات کا تفصیلی معائنہ کیا۔
ڈی پی او خیبر نے ریکارڈ کا معائنہ کرتے ہوئے ہدایت کی کہ شہریوں کی بروقت داد رسی کو یقینی بنایا جائے اور عوامی شکایات و مسائل کے ازالے میں کسی قسم کی تاخیر نہ کی جائے۔
اس موقع پر انہوں نے قبائلی مشران اور عمائدین سے بھی ملاقات کی اور ان کے ساتھ گھل مل گئے۔ ملاقات میں کمیونٹی پولیسنگ کے ذریعے علاقے کے مسائل کے حل، جرائم کی روک تھام اور پولیس و عوام کے درمیان باہمی تعاون کو مزید مضبوط بنانے پر تبادلہ خیال کیا گیا۔

02/09/2026

ڈسٹرکٹ پولیس آفیسر خیبر وقار احمد کا وادیٔ تیراہ کا دورہ، زیر تعمیر چوکیات کا جائزہ،موسم اور نامساعد حالات کی پروا کیے بغیر فرائض انجام دینے والے پولیس افسران و جوان محکمہ پولیس کے اصل ہیرو ہیں۔ ڈی پی او خیبر

ڈسٹرکٹ پولیس آفیسر خیبر وقار احمد نے ضلع خیبر کے دور افتادہ علاقے وادیٔ تیراہ کا دورہ کیا، جہاں انہوں نے زیر تعمیر پولیس چوکیات کا تفصیلی جائزہ لیا اور تعمیراتی کام کی پیش رفت کا معائنہ کیا۔
اس موقع پر ایس ایچ او تیراہ سیدا خان بھی موجود تھے، جنہوں نے ڈی پی او خیبر کو علاقے میں سیکیورٹی صورتحال اور پولیس جوانوں کو درپیش مسائل کے حوالے سے بریفنگ دی۔
ڈی پی او خیبر وقار احمد نے پولیس افسران و جوانوں سے ملاقاتیں کرتے ہوئے ان کے بلند حوصلے، ایمانداری، فرض شناسی اور بہادری کو سراہا۔
انہوں نے کہا کہ موسم کی سختیوں اور نامساعد حالات کی پروا کیے بغیر اپنے فرائض ایمانداری اور بہادری سے انجام دینے والے افسران و جوان محکمہ پولیس کے اصل ہیرو ہیں۔
ڈی پی او خیبر نے جوانوں کی خدمات کو خراج تحسین پیش کرتے ہوئے کہا کہ دور افتادہ اور دشوار گزار علاقوں میں امن و امان کے قیام کے لیے پولیس جوانوں کا کردار انتہائی اہم ہے۔ انہوں نے افسران و جوانوں کو ہدایت کی کہ وہ اسی جذبے، عزم اور پیشہ ورانہ ذمہ داری کے ساتھ اپنے فرائض جاری رکھیں۔

17/08/2026

03/08/2026

باڑہ(سٹیزن جرنلسٹ)میلوارڈ پولیس کی بڑی کارروائی، خانہ بدوش گروہ سے 5 سالہ مغوی بچہ بحفاظت بازیاب، تین ملزمان گرفتار،ملزمان کے خلاف مقدمہ درج، مزید تفتیش جاری

تفصیلات کے مطابق ڈسٹرکٹ پولیس آفیسر خیبر وقار احمد نے جلندھر مقبرہ سے 5 سالہ بچے کے اغواء کا سخت نوٹس لیتے ہوئے ایس پی باڑہ نواب خان کی نگرانی میں ایس ایچ او میلوارڈ شمشاد خان کی سربراہی میں خصوصی پولیس ٹیم تشکیل دی۔ ٹیم میں ایس آئی مدا خان اور اے ایس آئی نواز شریف شامل تھے، جنہوں نے مغوی ارسلان ولد عارف عمر 5 سال، قوم ملک دین خیل، سکنہ جلندھر مقبرہ، کی بازیابی کے لیے فوری کارروائی کرتے ہوئے مختلف مقامات پر چھاپے مارے۔ جدید تفتیشی ذرائع اور پیشہ ورانہ حکمت عملی کے ذریعے پشاور میں موجود خانہ بدوش گروہ تک رسائی حاصل کی گئی، جہاں کامیاب کارروائی کے دوران مغوی بچے کو بحفاظت بازیاب کر لیا گیا۔
کارروائی کے دوران ملزمان محمد اقبال ولد مرید حسین، مسماۃ سردارہ زوجہ ماکن اور مسماۃ ماروی زوجہ گل محمد، ساکنان پشاور کو گرفتار کر لیا گیا۔ گرفتار ملزمان کے خلاف مقدمہ درج کرکے مزید تفتیش شروع کر دی گئی ہے تاکہ واقعے کے تمام پہلوؤں سے پردہ اٹھایا جا سکے اور اس گروہ میں ملوث دیگر عناصر کو بھی قانون کے کٹہرے میں لایا جا سکے۔
ڈسٹرکٹ پولیس آفیسر خیبر وقار احمد نے کامیاب کارروائی پر میلوارڈ پولیس ٹیم کو شاباش دیتے ہوئے کہا کہ بچوں کے اغواء جیسے سنگین جرائم میں ملوث عناصر کے ساتھ کوئی رعایت نہیں برتی جائے گی۔ خیبر پولیس شہریوں کے جان و مال کے تحفظ اور جرائم کے خاتمے کے لیے ہر ممکن اقدامات جاری رکھے گی۔

30/07/2026

جمرود: معیاری ادویات کے استعمال سے متعلق آگاہی واک، شہریوں میں شعور اجاگر کرنے پر زور
جمرود: ڈائریکٹر جنرل ڈرگ خیبر پختونخوا ڈاکٹر عباس خان اور ڈسٹرکٹ ہیلتھ آفیسر ضلع خیبر ڈاکٹر رفیق حیات کی ہدایات پر جمرود میں معیاری ادویات کے استعمال اور غیر معیاری و غیر رجسٹرڈ ادویات کے خلاف عوامی شعور بیدار کرنے کے لیے آگاہی واک کا انعقاد کیا گیا۔
واک کی نگرانی ڈرگ انسپکٹر ضلع خیبر باقر امداد اللہ نے کی، جبکہ ضلعی اسٹور انچارج نور نبی نے اس کی سرپرستی کی۔ واک میں انجمن تاجران جمرود بازار کے صدر کاشف اقبال، بازار میڈیسن یونین کے صدر محمد شاہد، صادق اللہ، اسلام، اسد خان، جمعیت اسلام ضلع خیبر کے جنرل سیکرٹری سید کبیر، جماعت اسلامی کے گل محمد سمیت دیگر معززین، دکانداروں اور شہریوں نے بھرپور شرکت کی۔
اس موقع پر شرکاء نے عوام میں معیاری اور رجسٹرڈ ادویات کے استعمال کی اہمیت اجاگر کی اور غیر معیاری، جعلی اور غیر رجسٹرڈ ادویات سے اجتناب کی ضرورت پر زور دیا۔ مقررین کا کہنا تھا کہ صحت مند معاشرے کے قیام کے لیے ذمہ دارانہ طبی رویوں کو فروغ دینا وقت کی اہم ضرورت ہے۔
انہوں نے کہا کہ عوام کی صحت کا تحفظ حکومت، محکمہ صحت، ادویات سے وابستہ افراد اور شہریوں کی مشترکہ ذمہ داری ہے، اور اس مقصد کے حصول کے لیے تمام متعلقہ اداروں اور عوام کے درمیان مؤثر تعاون ناگزیر ہے۔
واک کے اختتام پر شرکاء نے اس عزم کا اظہار کیا کہ معیاری ادویات کے فروغ، جعلی ادویات کی حوصلہ شکنی اور عوامی آگاہی کے لیے مستقبل میں بھی ایسی سرگرمیوں کا سلسلہ جاری رکھا جائے گا۔