28/07/2026
*ساہیوال: پرانے کنویں میں مٹی کا تودہ گرنے سے دو افراد دب گئے، ریسکیو آپریشن جاری*
ساہیوال: اولڈ ہڑپہ روڈ پر راؤ صداقت کے ڈیرے کے قریب اڈہ بوٹی پل کے نزدیک واقع ایک پرانے کنویں میں مٹی کا تودہ گرنے سے دو افراد ملبے تلے دب گئے۔
ریسکیو 1122 کے مطابق صبح 10 بج کر 43 منٹ پر ریسکیو کمانڈ اینڈ کنٹرول روم کو ایمرجنسی کال موصول ہوئی۔ ابتدائی اطلاعات کے مطابق دونوں افراد پرانے کنویں سے اینٹیں نکال رہے تھے کہ اچانک مٹی کا تودہ گرنے سے وہ تقریباً 10 فٹ مٹی کے نیچے دب گئے۔
اطلاع ملتے ہی ریسکیو 1122 کی امدادی ٹیمیں SLR-01، SLB-27 اور SLA-17 کے ساتھ فوری طور پر جائے حادثہ پر پہنچ گئیں اور امدادی کارروائیاں شروع کر دیں۔
ریسکیو ذرائع کے مطابق ڈسٹرکٹ ایمرجنسی آفیسر ظفر اقبال ریسکیو آپریشن کی نگرانی کر رہے ہیں، جبکہ دپٹی کمشنر ساہیوال کیپٹن (ر) سمیع اللہ فاروق بھی موقع پر موجود ہیں۔
ریسکیورز جدید ریسکیو آلات کی مدد سے انتہائی احتیاط کے ساتھ ملبہ ہٹا رہے ہیں تاکہ دبے ہوئے افراد کو بحفاظت نکالا جا سکے۔ ریسکیو حکام کا کہنا ہے کہ دونوں افراد کو محفوظ نکالنے کے لیے ریسکیو آپریشن تیزی سے جاری ہے۔
