Azim Khalil

Azim Khalil Contact information, map and directions, contact form, opening hours, services, ratings, photos, videos and announcements from Azim Khalil, Digital creator, Charssada, Peshawar.

14/07/2026

هر انسان به وو پارسا
کۀ له نفسه وے جدا

ځان کۀ ستړے کړو هر چا
له قسمت نه وه سېوا

ما خبر کړه خامخا
کۀ وفا وه په دنيا

چرته ياد کړو ما او تا
چې کُوم کار له يو پيدا

څۀ به کېږي په عقبا
وي مؤمن زړۀ کښې سودا

لکۀ مچ ګڼي ګناه
چې فاسق وي څوک په دا

په مؤمن يوه خطا
لکۀ غر وي پروت په شا

شه نصيب زما او ستا
د ايمان عمل رڼا

اے ! زما غني بادشاه
زۀ عظيم يم ستا ګدا

عظيم خليل ليک نېټه 2026-07-14

13/07/2026

کِبر دې ورک شي عاجزۍ کښې مطمئين وي زړګے
د خداې قدرت دے غريبۍ کښې مطمئين وي زړګے

لکه چې سم په بادشاهۍ کښې مطمئين وي زړګے
داسې د خداې سره دوستۍ کښې مطمئين وي زړګے

هغه په لويه لار کښې ناست وي بې خطره مدام
چې د راستۍ هغه کرښۍ کښې مطمئين وي زړګے

چې په پنجاب پسې بد وائي ترې پوښتنه کوم
چې داسې ولې په پينډۍ کښې مطمئين وي زړګے

يا به د خداې په عبادت زړۀ ته سکون وي مدام
يا به د حق حلال روزۍ کښې مطمئين وي زړګے

د سود په ګټه کښې سکون مې چرته ونۀ ليدو
په خپل تاوان صله رحمۍ کښې مطمئين وي زړګے

لوازمات نه علاوه عظيمه دا هم ګوره
چې په دې خپله شاعرۍ کښې مطمئين وي زړګے

عظيم خليل ليک نېټه 2026-07-13

13/07/2026

همېشه د خلقو ښۀ وينه نادانه
سترګې پټې کړه بد مۀ وينه نادانه

دغه مړي به ژوندي شي يوه ورځې
چې ژوندي دي واړه مړۀ وينه نادانه

د دنيا قيمت کړه خاورې په يقين کښې
په ايمان عمل کښې سرۀ وينه نادانه

کۀ د زړۀ سترګې لرې په زړۀ دننه
څه نا څه پرې باندې وۀ وينه نادانه

اے ! عظيمه په هينداره کښې د نورو
ځان په خپله ځان کښې تۀ وينه نادانه

عظيم خليل ليک نېټه 2026-07-13

13/07/2026

لا چي لونګ مې ياد شو
يار غنم رنګ مې یاد شو

د سترګو جنګ مې ياد شو
خوي د اورنګ مې ياد شو

له مجبورۍ خپور شوے
لاس د ملنګ مې ياد شو

شمعې ليدو سره سم
عشق د پتنګ مې ياد شو

هغه نيمګړے ژوندون
د يار تر څنګ مې ياد شو

غزل ليکل مې هېر شُو
چې تول پارسنګ مې ياد شو

عظيم يې نۀ هېروم
چې يو اهنګ مې ياد شو

عظيم خليل

12/07/2026

دو به تين کړې زوروره
تور به سپين کړې زوروره

په وړه خبره دولس
په جبين کړې زوروره

نۀ دنيا سره مزل کړی
نۀ په دين کړې زوروره

څوک دې نۀ مني شاعره
زړۀ به خوړين کړې زوروره

دا په کومه خله خبرې
د ګل چين کړې زوروره

پټ په زړۀ کښې لرې زهر
خله ګبين کړې زوروره

ښکلو سترګو ته دې سترګې
په دوربین کړې زوروره

يوه ورځ به دې دنيا نه
اسپې زين کړې زوروره

هر غزل کښې زړۀ عظيمه
څومره شين کړې زوروره

عظيم خليل

12/07/2026

🌹*`روداد پخواني توري`*🌹

*🌹بـسم الله الرحمن الرحيم🌹*

*🌸السلام عليکم ورحمت الله وبرکاته🌸*

`خلیل پښتو ادبي مکتب`

د خالي په ورځ د اوومې مياشتې په یولسمه نېټه پۀ کال دوه زره شپږ ويشتم پۀ *"خلیل پښتو ادبي مکتب"* کښې د هوا په څپو په دې موضوع:*د پښتو ژبې زاړه، هېر شوي او د هېرېدو په حال کښې ټکي او توري* نشست تر سره شو.

د خلیل پښتو ادبي مکتب په ادبي ناسته کښې د نظامت کوونکيو، صلاح کارې ډلې، شاعرانو، لیکوالانو او ګڼ شمېر ادب مینه والو په ګډون یوه ارزښتناکه ادبي غونډه ترسره شوه.

چې په دې ناسته کښې د پښتو ژبې د پخوانیو زړو ټکو، نومونو او اصطلاحاتو په اړه تفصیلي بحث وشو. استاذانو ووېل چې ژبه د خپل اولس د کلتور، تاریخ او ژوند هېنداره ده، نو د زړو او اصلي پښتو کلیمو ساتنه او راژوندۍ کؤل د هر ادب پالونکي مسؤلیت دے.

په نننۍ غونډه کښې ګڼ شمېر زاړه پښتو ټکي یاد شؤل چې ځینې اوس هم په کلیوالو سیمو کښې کارولے کېږي او ځینې د نوي ژوند د بدلونونو له امله د هېرېدو په حال کښې دي او هغه څو د پښتو زاړه ټکو تورو نومونه په دې ډول دي. 👇

* *غلبېل*: چاڼ،غربال، چې اوړه پرې چاڼ کېږي
* *شکرۍ، پچۍ،* له میزري جوړه ټوکرۍ
* *ډوډۍ* نن سبا خلق د اردو ټکې روټۍ استعمالوي
* *چټو* د لرګي لنګرۍ،بغرۍ
* *چاټۍ، د اوبو له پاره د خاورو نه جوړه چې اکثر به کلي کولال جوړوله خوم* د اوړو يا د اوبو زخېره کېدو دپاره به استعمالېدل
* *کنډولے* د خاورو جوړه پیالے چې په منګي به اکثر نسکور کړے پروت وو
* *منداڼو* چې شوملو جوړېدو دپاره به کارلې کېدو ، شوملې به یې پرې شاربلې،
* *دوڼۍ* چې په کوم خاورين څيز کښې به شوملې شاربلې هغې ته مونږه دوڼۍ وئيله/شربلۍ،
* *ببوزے* د هوا کؤلو دپاره استعمالېږي د لاس پکے
* *ګړونج* د لرګو جوړ کړے شوے د منګو د ایښودو ځاے.
* *ټاټکے* چابړے،وړوکے ټب
* *تخته پوش* د مانځه لپاره جوړ شوے میز.
* *چُوڼياڼۍ*/ چارچوبۍ
* *چاجوش* هغه لوخے چې چائ پکښې پخولے شي
* *دومکاچه* د خټو ګټو یا د لرګي نه جوړه ډبه.
* *جارګۍ* د پخلي ځاے
* *چج* د لوخي نه جوړه شوي د غنمو پاکولو آله
* *کوهیان يا کوهے* په زمکه کښې جوره کنده چې اوبه پکښې څرګنده وي.
* *ډولچه* کوهي نه پرې اوبۀ راوباسي.
* *چونتره* د خاورې یا ګټو جوړ شوے څلور ګوټه ځاے چې لمونځ پرې کوي.
* *دالان* د کمرو مخې ته برنډه یا د سر سورے
* *سوباړے* د لرګي نه جوړ شوے.
* *دروزه* د غنمو وربشو وغیره ډانډے.
* *زانګو* هغه ګواره چې ماشومان پکښې زانګولے شي.
* *ميرګاټي* یوه لوبه
کانچې يا بليوري د ماشومانو د لوبو ګول غوندې د ښيښې څخه جوړې چې په ګوته به يې کېښوده او بليوري به پرې ويشتل
* *تبۍ* چې ډوډۍ پرې پخوي تبخے.
* *کټوۍ* د خاورو جوړه د پخلي لوخے.
* *لالټين* د رڼا یوه اله.
* *اشر* د یو کار د پاره جمع کيدل.
* *غوبل* غوبل مشران وايي چې تريشرې اوس راغے پخوا به د غوايانو غوبل وو
* *اټۍ* د کریانې دوکان.
* *رېړه* ګاډے چې د پټو نه به یې پکښې ګیا وغیره راؤړله.
* *چوڼیاڼۍ* يا چړچوبۍ غسل خانه، تشناب،پاخانه.
* *چڼے* هغه هلک چې دیني سبق وايې او مدرسه کښې اوسېږي. طالب علم
* *سادين* هغه زمکه چې د کروندې نه مخکې واړولے شي.
* *رکيبۍ*.پلېټ، کاسه
* *باړينچغ* د ماشومانو زنګولو له د لرګو نه په دائره کښې جوړ ټال.
* *ژرنده* د اوړو کولو یو قسم مشین چې په اوبو چلیږي.
* *پېکو* د منچو مشین یا اکثر خلق پرې غوښه هم کیمه کوي.
* *ټال* هغه پړي چې سره څه ته اچول شوي وي او زانګېدل پرې کیږي.
* *باديوه* چې په هوا کښې الوځوي ګوډۍ پتنګ
* *کُنجي* کلُپ،تاله چې دروازې ته داسې ځنځیر اچولو.
* *لاوڼ* زېړې شوملې
* *تالنده* اسماني بریښنا
* *لؤړ* کوتک چې د لرګي نه جوړ وي.
* *کوزۀ* لوټه چې د اوبو د اودس لپاره کارولے شوه.
* *خاشڼۀ* ترخخ د آس خر مواد
* *سسپار* د يوي پاله، د يوي تېشۍ
* *جغ* د قلبې په وخت غویانو ته غاړه کښې اچوي
* *پاله* په یوې کښې د زمکې څېرلو د اوسپنې اله.
* *سربانډې* هغه پړے چې د کچه څرمن یا مېزرې نۀ جوړېږي.
* *غاښؤر* یوه اله چې غاښونه لري چې زمکه پرې هواره وي.
* *توڼۍ* د المارۍ په شان صندوق د لرګي.
* *خمبه* د غلې ساتلو او ایښودلو لوې لوښے.
* *سماوار* اکثر به په چارچوبے کښې پروت وو اوبۀ به پکښې پرتې وې.
* *اخور* چې ځناورو پکښې ګیا اچوي.
* *قلپي* په دي کښې یې اوړه ایښودل.
* *منګوټے* وړوکے منګے.
* *تاخ* په دیوال کښې د څه څیز ایښودلو لپاره تاخ.
* *کړهي* چې خوراک وغیره پکښې پخېږي.
* *اندرپایه* پارڅنګ، پوړۍ
* *دوڼۍ* خاورین لوښے د ماستو ایښودلو کټوے.
* *مارکونډۍ* یو بوټۍ چې پلي ئې ازغن وي.
* *برغولے* د لوښو پټولو لپاره سرپوښ.
* *غولے* انګڼ د کوټې مخې ته میدان.
* *چائینک* چې چائ پکښې پخېږي یا اچوي.
* *کاسه* چې خوراک وغیره پکښې اچوي خوراک پکښې کوي.
* *ګِرماله* باندې به مو ديوال يا کوټه لېوه وله
* *دُرمټ* باندې به مو زمکه دربه وله
* *پړڅه* د لوښې په ځنګل کښې د اوبو جبه وي په هغه جبه کښې چې کومه لار جوړه شي هغه هم د لوښې نه جوړوي او هغې ته پړڅه وايي.
* *چيړ* د الوچو د بوټو نه یو خاص شکل کښې ټېنګي اوبۀ راوتلي وي.
* *ګهړهل* د لُوټو ديوال
* *غرګې* نسوار به يې پرې ټکول.
* *پړپيش* د چا ويرولو د پاره ناګهانه په هغه د شانه تېز غږ کول
* *کيچړے* پخې شوې پستې وريجې.
* *کجے* په خپو باندې ګډوډ.
* *کيجاوه* د سنډا یا خر په ملا د پاسه ایښوده د لرګو نه به جوړه وه.
* *بګار* تړکه اکثر به ښځو ویل چې ترکارۍ ته بګار کوو.
* بليوري کانچې،پرجنټي
* *خوشاټارے* فضول ګرځېدل خوشے ګرځيدل.
* *هر درے/آر درين* په پردو درونو ګرځيدل.
* *چج* چې غنم به يې پکښې الوزول او پاکول.
* *ليتکۍ* اوړه پرې چاڼ کؤل غټ چاڼ.
* *یوې* غویانو پسې شاته وي پټې پرې اړوي.
* *ارټ* د ابو کول پایه چې ډولچې پکښې وې غوایانو تاوېږي او ډولچې اوبه راوباسي.
* *تمکش* کېمه کش ،تبر.
* *پړپیش* چا باندې ناګهاني غږ کؤل یا یرؤل.

په پاې کښې استاذانو پر دې بحث یو شو چې د پښتو ژبې دغه زاړه ټکي زمونږ د کلتور، تاریخ او ولسي ژوند خزانه ده. د دغو کلیمو ثابتول او راتلونکو نسلونو ته رسول د ادب د خدمت یوه مهمه برخه ده.
له دي وروسته د پښتو ژبې د پرمختګ او د ادب د ودې په دعا سره دا نشست پاې ته ورسېده.

لیکوال ناصح داؤدزے

11/07/2026

غزل
پروت راته مزل دے په زړۀ پورې
حال مې نن بدل دے په زړۀ پورې

زۀ يې پښو نه سر پورې بدل کړمه
داسې يو غزل دے په زړۀ پورې

ستا کوڅې ته ځکه داسې ځم راځم
دلته مې اجل دے په زړۀ پورې

يو خو دې په سترګو کښې رانجه توبه
بل دې پرې کجل دے په زړۀ پورې

دا مې برکت د يار د عِشَق دے
اور راباندې بل دے په زړۀ پورې

هېڅ درباندې پوه نشوم عظيمه خو
نن په تا څه چل دے په زړۀ پورې

عظيم خليل ليک نېټه 2026-07-11

10/07/2026

سم د غر د سره چرته پرېوتو
څوک چې د نظره چرته پرېوتو

عقل به يې سر لره وخت راولي
يا کۀ تر خطره چرته پرېوتو

در په در به ګرځي دے سکون پسې
څوک چې ستا له دره چرته پرېوتو

زور به د پښتون نړۍ ته وښکاري
بس کۀ لږ د شره چرته پرېوتو

دۀ ته غورځېدل دې خلق نۀ وائي
څوک چې هم په نره چرته پرېوتو

اے ! عظيم قلمه په تا څۀ وشو
زور دې زوروره چرته پرېوتو

عظيم خليل ليک نېټه 2026-07-10

10/07/2026

چرته چې ونۀ وينم پښتون سحر
هلته راته نۀ ښکاري سکون سحر

بد پکې خاطر مې کړو پتلون سحر
راغلم له هغې ښاره پرون سحر

ورک به دې سړي ته څنګه ووايم
تلے وه بېګاه شولو راستون سحر

څنګ به زما تاندې هيلي مړاوې شي
پېل کوم د سر نه چې ژوندون سحر

شپه کښې توبې وباسم د ښکلو نه
جوړ وي رانه بيا هغه مجنون سحر

وشول هغه څۀ چې څه الله غوښتل
ما په زړۀ کښې څۀ وکړو تړون سحر

وخت دې د ځوانۍ عظيمه هېر نکړو
زړۀ کښې اوسوې د پوهنتون سحر

عظیم خليل

09/07/2026

(د حسد ناسور رنځ او د ادبي وقار ساتنه)

حسد، بغض او عناد هغه تېزابي ناروغۍ دي چې په عامه ټولنه کښې خو پرېږده، چې د فکر خبره دا ده چې زمونږ په فرهنګي او شعري رنګينو محفلونو کښې د هر چا نه زياتې ريښې لري. په داسې يو حساس چاپېريال کښې کله کله سړی هېڅ بې هېڅه د نورو په سترګو کښې د اغزي غوندې ښکارېږي؛ تۀ به د خپلې سپينې او پاکې لمنې نه بيخي بې‌خبره يې، مګر په شاتورو زړونو کښې به دې ستا په نوم د کينې د بغض بلها اورونه بل کړي وي. هغوي ته به نۀ خپله ګناه ښکاري او نه ستا د فکر سپېځلتيا او نېک‌ نيتي.
د دې بې‌ځايه دښمنۍ او کينې وجه خالص هم دغه وي چې تۀ په تخليقي سفر کښې، په هنري معيار، لفظي هنر او عروضي نزاکتونو کښې له هغوي څخه څو ګامه وړاندې يې. هغوی په دې نۀ پوهېږي چې ستا د فکر الوت ولې د اولس په زړونو کښې ځاے نيسي، ستا شعرونه ولې د خلقو د روح غږ ګرځي او د هغوی بې‌ هنره لفظونه ولې د تيارو خوراک کېږي؟ د هغوی د کينې اصلي محرک همدا وي چې په هر ادبي دستار او هر محفل کښې تا ته د يو سرخېل او استاد په توګه په کوم حق او درنښت سره د عزت پګړۍ په سر کېږي او هغوی ولې د سټېج په رنګينو کښې هم د يوازې والي په تيارو کښې ناست وي.
ښه نو! اوس د دغه باطني رنځ او رواني ناروغۍ علاج خو مونږ سره نشته چې د خلقو له زړونو نه هغوي ته په زور محبت او د عزت خيرات وغواړو. د ولس د زړونو باچاهي په زور او مينت زارو نه مېلاوېږي.
دا د زمانې يو جبري اصل دے چې هر څوک به په خپله منډه، خپل معيار او خپل رښتیني هنر باندې په خلقو ځان مني. خپل مقام، خپله ادبي مرتبه او خپل تاريخي هويت به انسان په خپلو دوامدارو او د پښتو د خدمت هڅو او عالي ظرفيت پخپله پيدا کوي؛ ګني نو که څوک د بل د هنر لمر په ګوته پټول غواړي، نو ټول عمر به د خپل باطن د حسد په ګرم او سوځنده اور کښې دننه دننه ايره کېږي او د تخليق د چينې د خړوبولو په ځاے به د خپل حسد په تيارو کښې لاهو پاتې شي.
عظيم خليل

Address

Charssada
Peshawar
27577

Website

Alerts

Be the first to know and let us send you an email when Azim Khalil posts news and promotions. Your email address will not be used for any other purpose, and you can unsubscribe at any time.

Shortcuts

Share

Category