16/08/2026
*جشن آزادی پاکستان کے سلسلے میں لاہور تا ساہیوال 160 کلومیٹر طویل سائیکلنگ ریس کا انعقاد کیا گیا، جس میں ملک بھر سے 69 سائیکلسٹوں نے شرکت کی۔ ریس 4 گھنٹے 44 منٹ میں مکمل ہوئی۔*
کوئٹہ: ریس میں کراچی کے سائیکلسٹ الیاس نے پہلی پوزیشن حاصل کی، جبکہ بلوچستان کے منصور احمد نے شاندار کارکردگی کا مظاہرہ کرتے ہوئے دوسری پوزیشن حاصل کی اور ملکی سطح پر بلوچستان کے لیے اعزاز حاصل کیا۔
پاکستان سائیکلنگ فیڈریشن کے صدر ادریس خواجہ، سیکرٹری جنرل منظم خان، پنجاب اولمپک ایسوسی ایشن کے سیکرٹری جنرل وقار علی، بلوچستان سائیکلنگ ایسوسی ایشن کے صدر لیاقت علی ترین، چیئرمین سعید نور شاہ، سیکرٹری گل کاکڑ اور نظر محمد خلجی نے اپنے مشترکہ بیان میں کہا کہ ملکی سطح پر سائیکلنگ ریس میں بلوچستان کی دوسری پوزیشن بڑی کامیابی ہے۔
انہوں نے کہا کہ بلوچستان کے سائیکلسٹوں نے اپنی محنت اور شاندار کارکردگی سے صوبے کا نام روشن کیا ہے۔ ٹیم انچارج احمد اللہ، انٹرنیشنل سائیکلسٹ کفایت اللہ، منظور احمد، علی رضا اور پوری ٹیم خصوصی مبارکباد کی مستحق ہے۔
پاکستان سائیکلنگ فیڈریشن کے صدر ادریس حیدر خواجہ اور پنجاب اولمپک ایسوسی ایشن کے سیکٹری جنرل وقار علی نے پنجاب اسٹیڈیم سے سائیکلسٹوں کو ریس کے لیے رخصت کیا، جبکہ ساہیوال میں کمشنر ساہیوال اور ڈپٹی کمشنر ساہیوال نے بطور مہمان خصوصی شرکت کی۔
ریس کے اختتام پر نمایاں کارکردگی کا مظاہرہ کرنے والے کامیاب کھلاڑیوں میں لاکھوں روپے کے انعامات تقسیم کیے گئے۔ بلوچستان سائیکلنگ ایسوسی ایشن کے عہدیداران نے اعلان کیا کہ سائیکلنگ ٹیم کی کوئٹہ واپسی پر شاندار استقبال کیا جائے گا۔
