08/09/2026
فٹبال شائقین کے لیے بڑی خوشخبری، چھٹے آل پاکستان وزیراعلیٰ بلوچستان فٹبال گولڈ کپ کی تاریخ کا اعلان
بلوچستان میں فٹبال کے سب سے بڑے ایونٹس میں شمار ہونے والے چھٹے آل پاکستان وزیراعلیٰ بلوچستان فٹبال گولڈ کپ کے انعقاد کی تاریخ کا باضابطہ اعلان کر دیا گیا۔
سیکرٹری کھیل و امور نوجوانان بلوچستان دُرا بلوچ کی زیرِ صدارت گولڈ کپ کی تیاریوں سے متعلق اہم اجلاس کوئٹہ میں منعقد ہوا، جس میں ڈائریکٹر جنرل کھیل یاسر بازئی، اسسٹنٹ ڈائریکٹر ایکٹیویٹیز محمد آصف لانگو اور بلوچستان فٹبال ایسوسی ایشن کے عہدیداران نے شرکت کی۔
اجلاس میں فیصلہ کیا گیا کہ چھٹا آل پاکستان وزیراعلیٰ بلوچستان فٹبال گولڈ کپ 20 ستمبر سے شروع ہوگا، جبکہ فائنل 5 اکتوبر کو کھیلا جائے گا۔
بلوچستان فٹبال ایسوسی ایشن کو ملک کی نمایاں اور ٹاپ فٹبال ٹیموں کو ٹورنامنٹ میں شرکت کے لیے باضابطہ دعوت نامے جاری کرنے اور ان کی شرکت یقینی بنانے کی ذمہ داری سونپی گئی ہے۔
اجلاس میں ٹورنامنٹ کے شیڈول، گراؤنڈز کی تیاری، گراؤنڈ کمیٹیوں کی ذمہ داریوں، ٹیموں اور آفیشلز کی رہائش، سفری سہولیات، لاجسٹکس اور دیگر انتظامی امور کا تفصیلی جائزہ لیا گیا۔
سیکرٹری کھیل دُرا بلوچ نے کہا کہ وزیراعلیٰ بلوچستان فٹبال گولڈ کپ ملک کے اہم فٹبال ایونٹس میں اپنا ایک نمایاں مقام بنا چکا ہے۔ ٹورنامنٹ کے ذریعے ملک بھر کی بہترین ٹیموں اور باصلاحیت کھلاڑیوں کو بلوچستان میں کھیلنے کا موقع ملتا ہے۔
انہوں نے کہا کہ گولڈ کپ کا بنیادی مقصد بلوچستان میں فٹبال کو فروغ دینا، نوجوان اور باصلاحیت کھلاڑیوں کو قومی سطح پر اپنی صلاحیتوں کے اظہار کا موقع فراہم کرنا اور صوبے کو ملکی فٹبال کے نقشے پر مزید نمایاں کرنا ہے۔
20 ستمبر سے شروع ہونے والا یہ ٹورنامنٹ 5 اکتوبر کو فائنل کے ساتھ اختتام پذیر ہوگا، جس کا فٹبال شائقین کو بے صبری سے انتظار ہے۔
