26/01/2026
گھوٹکی کے سرکاری ملازمین تنخواہیں نہ ملنے پر رحیم یارخان پہنچ گئے، بلاول بھٹو بھی خاموش
رحیم یارخان: سندھ کے ضلع گھوٹکی سے تعلق رکھنے والے میونسپل کمیٹی کے سرکاری ملازمین تنخواہوں کی عدم ادائیگی پر رحیم یارخان پریس کلب پہنچ گئے جہاں انہوں نے شدید احتجاج کیا۔ مظاہرین کا کہنا تھا کہ وہ گزشتہ کئی سالوں سے اپنے بنیادی حق سے محروم ہیں اور کسی نے ان کی داد رسی نہیں کی۔احتجاجی ملازمین کا کہنا تھا کہ انہوں نے پیپلز پارٹی کو ووٹ نہیں دیا مگر اب انہیں اسی کی سزا دی جا رہی ہے۔ مظاہرین کے مطابق گزشتہ 6 سال سے 368 ملازمین عملی طور پر بے روزگار ہو چکے ہیں سندھ حکومت کی جانب سے تنخواہیں ادا نہیں کی جا رہیں۔ملازمین نے بتایا کہ معاملہ چیف جسٹس سندھ یحییٰ آفریدی کے سامنے بھی رکھا گیا مگر تاحال کوئی کارروائی نہیں ہوئی۔ دوسری جانب پیپلز پارٹی کے چیئرمین بلاول بھٹو زرداری بھی اس سنگین مسئلے پر کوئی ایکشن لیتے نظر نہیں آ رہے۔
احتجاج کرنے والے ملازمین نے کہا کہ مہنگائی کے اس دور میں بغیر تنخواہ کے گزارا ممکن نہیں رہا، گھروں کے چولہے ٹھنڈے ہو چکے ہیں اور بچے فیسوں سے محروم ہیں۔
ملازمین نے حکومتِ سندھ اور بلاول بھٹو زرداری سے مطالبہ کیا کہ فوری طور پر تمام واجب الادا تنخواہیں ادا کی جائیں اور 368 متاثرہ ملازمین کو بحال کیا جائے، بصورت دیگر احتجاج کا دائرہ سندھ بھر میں پھیلایا جائے گا۔
