Risalpur News

27/05/2026

رسالپور (رپورٹ/ اختر محمود)رسالپور کینٹ میں عید الاضحیٰ پر مثالی صفائی آپریشن جاری۔ قربانی کی آلائشیں فوری ٹھکانے لگا دی گئیں۔ عید الاضحیٰ کے موقع پر رسالپور کنٹونمنٹ بورڈ کی جانب سے صفائی کے بہترین انتظامات کیے گئے۔ ایگزیکٹو آفیسر مس عذرا بخت کی خصوصی نگرانی میں کنٹونمنٹ بورڈ کے پورے عملے نے رسالپور سول بازار، رسالپور کینٹ اور رسالپور کینٹ دیگر مختلف علاقوں میں قربانی کے بعد صفائی آپریشن بھرپور انداز میں جاری ہے۔کنٹونمنٹ بورڈ کے اہلکاروں نے قربانی کی باقیات، آلائشیں اور دیگر فضلہ جات کو فوری طور پر اٹھا کر مقررہ مقامات پر منتقل کیا جبکہ قربانی کی جگہوں پر چونا ڈالنے کے ساتھ ساتھ وہاں جراثیم ختم کرنے والی سپرے بھی کئے گئے تاکہ تعفن اور جراثیم کے پھیلاؤ کو روکا جا سکے۔ کنٹونمنٹ بورڈ رسالپور کے صفائی عملہ عید کے تینوں دن مسلسل ڈیوٹیاں سرانجام دینگے۔ اور رسالپور شہریوں کو صاف ستھرا ماحول فراہم کرنے میں اہم کردار ادا کرینگے۔ایگزیکٹو آفیسر مس عذرا بخت نے کہا کہ عوام کو صحت مند اور صاف ماحول فراہم کرنا کنٹونمنٹ بورڈ کی اولین ترجیح ہے۔ انہوں نے صفائی عملے کی کارکردگی کو سراہتے ہوئے کہا کہ تمام ٹیمیں عیدالاضحی کے تینوں دنوں پر مثالی صفائی انتظامات یقینی بنائے گی ۔شہریوں نے بھی رسالپور کنٹونمنٹ بورڈ کی بروقت صفائی مہم اور بہترین انتظامات کو سراہتے ہوئے کہا کہ آلائشوں کی فوری تلفی اور صفائی کے موثر اقدامات کے باعث عید الاضحی کے دن میں کسی قسم کی بدبو یا گندگی کی شکایات سامنے نہیں آئی ۔

24/05/2026

رسالپور (رپورٹ/اختر محمود)معصوم بچی کی بحفاظت بازیابی، عوام کا پاکستان ہیومن رائٹس آرگنائزیشن کے صدر شہنام خان کی کاوشوں کو خراجِ تحسین۔پشاور سے اغواء ہونے والی 11 سالہ معصوم بچی حورین کی سندھ کے کچے کے علاقے اور ڈاکوؤں سے بحفاظت بازیابی پر عوامی حلقوں نے خوشی کا اظہار کرتے ہوئے پاکستان ہیومن رائٹس آرگنائزیشن کے صدر شہنام خان کی مسلسل کوششوں کو زبردست خراجِ تحسین پیش کیا ہے۔عوامی و سماجی حلقوں کے مطابق جیسے ہی معصوم بچی کے اغواء کی افسوسناک خبر منظر عام پر آئی، پاکستان ہیومن رائٹس آرگنائزیشن کے صدر شہنام خان نے فوری طور پر بچی کی بازیابی کے لیے متعلقہ اداروں سے رابطے شروع کر دیے اور معاملے کی مسلسل نگرانی کرتے رہے۔ذرائع کے مطابق انہوں نے مختلف سطحوں پر آواز بلند کرتے ہوئے بچی کی جلد اور محفوظ بازیابی کو یقینی بنانے کے لیے بھرپور کردار ادا کیا۔بچی کی بحفاظت بازیابی کی خبر سامنے آنے کے بعد عوام، سماجی کارکنوں اور انسانی حقوق کے کارکنوں نے شہنام خان کی خدمات کو سراہتے ہوئے کہا کہ ایسے مشکل حالات میں متاثرہ خاندان کے ساتھ کھڑا ہونا اور انسانی ہمدردی کی بنیاد پر عملی اقدامات کرنا قابلِ ستائش ہے۔ انہوں نے کہا کہ معصوم بچی کی واپسی نہ صرف اہلِ خانہ بلکہ پورے معاشرے کے لیے خوشی اور اطمینان کا باعث بنی ہے۔عوامی حلقوں نے قانون نافذ کرنے والے اداروں کی کارکردگی کو بھی سراہا اور امید ظاہر کی کہ مستقبل میں بھی بچوں کے اغواء جیسے سنگین جرائم کے خلاف مؤثر کارروائیاں جاری رکھی جائیں گی۔ انہوں نے کہا کہ انسانی حقوق کے تحفظ اور مظلوم خاندانوں کی داد رسی کے لیے سماجی تنظیموں کا کردار انتہائی اہمیت کا حامل ہے۔شہنام خان نے اپنے ایک بیان میں کہا کہ بچوں کا تحفظ پوری قوم کی مشترکہ ذمہ داری ہے اور کسی بھی معصوم بچے کے ساتھ پیش آنے والا واقعہ پوری انسانیت کا مسئلہ ہے۔انہوں نے بچی کی بحفاظت بازیابی پر متعلقہ اداروں، عوام اور تمام افراد کا شکریہ ادا کیا جنہوں نے اس مقصد کے لیے اپنا کردار ادا کیا.

29/04/2026

29/04/2026

10/04/2026

رسالپور (رپورٹ/ اختر محمود)خیبر پختونخوا میں عوامی سہولیات کی فراہمی کے حوالے سے ایک اور اہم پیش رفت سامنے آئی ہے، جہاں بانی پاکستان تحریک انصاف عمران خان کے ویژن کے مطابق وعدوں کی تکمیل کا سلسلہ بدستور جاری ہے۔ ضلع نوشہرہ کے عوام کے لیے پشاور تا نوشہرہ بی آر ٹی بس سروس کی منظوری ایک بڑی کامیابی قرار دی جا رہی ہے۔اس اہم منصوبے کی منظوری میں ضلعی صدر نوشہرہ پاکستان تحریک انصاف میاں عمر کاکا خیل، صوبائی وزیر صحت میاں خلیق الرحمان، ڈیڈک چیئرمین حاجی زرعالم خان، رکن صوبائی اسمبلی ادریس خٹک اور ایم پی اے اشفاق خان کی مسلسل کاوشیں رنگ لے آئیں۔ علاقہ مکینوں نے اس اقدام کو خوش آئند قرار دیتے ہوئے اسے سفری سہولیات میں نمایاں بہتری کا پیش خیمہ قرار دیا ہے۔بی آر ٹی بس سروس کی توسیع سے نہ صرف پشاور اور نوشہرہ کے درمیان سفر آسان اور کم خرچ ہوگا بلکہ روزانہ کی بنیاد پر سفر کرنے والے طلبہ، ملازمین اور کاروباری افراد کو بھی بڑی سہولت میسر آئے گی۔اس منصوبے سے ٹریفک کے دباؤ میں کمی اور ماحولیاتی آلودگی پر قابو پانے میں بھی مدد ملنے کی توقع ہے۔علاقے کے عوام اور سیاسی حلقوں نے وزیر اعلیٰ خیبر پختونخوا سہیل آفریدی کی قیادت کو بھی سراہتے ہوئے کہا ہے کہ صوبائی حکومت عوامی فلاح و بہبود کے منصوبوں پر خصوصی توجہ دے رہی ہے۔ ان کا کہنا تھا کہ وزیر اعلیٰ کی مؤثر پالیسیوں اور سنجیدہ اقدامات کی بدولت صوبے میں ترقیاتی کاموں کا سلسلہ تیزی سے جاری ہے، جس سے عوام کو براہ راست ریلیف مل رہا ہے۔واضح رہے کہ بانی پی ٹی آئی عمران خان کے دور حکومت میں شروع کیا گیا صحت کارڈ پروگرام پہلے ہی عوام میں بے حد مقبول ہو چکا ہے، جس کے ذریعے لاکھوں افراد مفت علاج کی سہولت حاصل کر رہے ہیں۔ اسی تسلسل میں بی آر ٹی منصوبہ نوشہرہ کے عوام کے لیے ایک اور اہم تحفہ تصور کیا جا رہا ہے۔سیاسی و سماجی حلقوں کا کہنا ہے کہ موجودہ اقدامات عوامی فلاح و بہبود کے عزم کا مظہر ہیں اور مستقبل میں مزید ترقیاتی منصوبوں کی راہ ہموار کریں گے۔عوام نے امید ظاہر کی ہے کہ ایسے منصوبے نہ صرف علاقے کی ترقی میں اہم کردار ادا کریں گے بلکہ معیارِ زندگی کو بھی بہتر بنائیں گے۔

30/03/2026

رسالپور (رپورٹ/ اختر محمود)رسالپور میں امن و امان کی بگڑتی صورتحال، تاجروں کا احتجاجی لائحہ عمل تیار۔ رسالپور صدر بازار میں امن و امان کی صورتحال تشویشناک حد تک خراب ہو گئی ہے، جہاں اسلحے کی کھلے عام نمائش اور موبائل سنیچنگ کی بڑھتی وارداتوں نے تاجروں اور شہریوں کو خوف میں مبتلا کر دیا ہے۔پولیس کی موجودگی کے باوجود بااثر افراد کی جانب سے اسلحہ لہرانے کے واقعات معمول بن چکے ہیں،جبکہ بازار میں پولیس گشت نہ ہونے کے برابر رہ گیا ہے۔انجمن تاجران رسالپور کا ایک ہنگامی اجلاس صدر محمد اسلام کی زیر صدارت منعقد ہوا، جس میں تاجروں نے موجودہ صورتحال پر شدید تشویش کا اظہار کیا۔ اجلاس میں کہا گیا کہ گزشتہ ایک ماہ کے دوران بازار میں اسلحہ کی نمائش میں خطرناک حد تک اضافہ ہوا ہے، جہاں معمولی تنازعات پر بھی افراد اسلحہ نکال کر تاجروں کو دھمکاتے ہیں۔تاجروں کے مطابق پولیس اہلکار اسلحہ بردار افراد کے سامنے بے بس نظر آتے ہیں اور کئی مواقع پر کارروائی کے بجائے موقع سے ہٹ جاتے ہیں، جس سے جرائم پیشہ عناصر کے حوصلے مزید بلند ہو رہے ہیں۔دوسری جانب، موبائل سنیچنگ کی وارداتوں میں بھی نمایاں اضافہ ہوا ہے،جس سے کاروباری سرگرمیاں شدید متاثر ہو رہی ہیں اور شہری خود کو غیر محفوظ محسوس کر رہے ہیں۔صدر انجمن تاجران محمد اسلام نے خبردار کیا کہ اگر فوری طور پر امن و امان کی صورتحال بہتر نہ کی گئی تو تاجر برادری مجبوراً ہڑتال کا راستہ اختیار کرے گی۔ انہوں نے مطالبہ کیا کہ رسالپور صدر بازار میں مستقل پولیس گشت یقینی بنایا جائے،اسلحہ کی نمائش پر فوری پابندی عائد کی جائے اور سنیچرز کے خلاف سخت کارروائی کی جائے۔تاجروں نے ضلعی انتظامیہ اور اعلیٰ پولیس حکام سے فوری نوٹس لینے کا مطالبہ کرتے ہوئے کہا کہ اگر بروقت اقدامات نہ کیے گئے تو صورتحال مزید خراب ہو سکتی ہے، جس کی تمام تر ذمہ داری متعلقہ حکام پر عائد ہوگی۔

23/03/2026

رسالپور (رپورٹ/ اختر محمود)رسالپور میں مرغی کی فیکٹریوں کے خلاف عوامی غصہ، بندش کی ڈیڈ لائن، احتجاج کی وارننگ۔رسالپور کے علاقے بارہ بانڈہ انڈسٹری اسٹیٹ میں قائم مرغی کی انتڑیوں کی فیکٹریوں سے اٹھنے والی شدید اور تعفن زدہ بدبو کے خلاف علاقہ مکینوں کا غصہ شدت اختیار کر گیا۔ مشرانِ علاقہ نے نہ صرف سخت ردعمل دیا بلکہ مشترکہ لائحہ عمل بھی طے کر لیا ہے، جس کے تحت فیکٹریوں کو فوری بند کرنے کی ڈیڈ لائن دے دی گئی۔اس سلسلے میں ایک اہم اجلاس افسر خان کلے میں منعقد ہوا، جس میں سیاسی، سماجی اور عوامی شخصیات کی بڑی تعداد نے شرکت کی ۔اجلاس نوشہرہ امن جرگہ کے ضلعی انفارمیشن سیکرٹری عابد تاج کی نگرانی میں منعقد ہوا، جس میں صوبائی ہیومن رائٹس آرگنائزیشن نوشہرہ کے صدر عابد سلطان، پاکستان مرکزی مسلم لیگ نوشہرہ کے رہنما حاجی ھمراز خان، سابق ناظم گنڈیری حاجی اعجاز خان، سابق تحصیل ممبر حاجی اسماعیل خان، ناظم میرہ کھنڈر عبداللہ گل، تحریک انصاف کے ضلعی رہنما حاجی ملک امراد علی خان، شیرین کوٹھے کے چیئرمین زبیر خان، کونسلر انور خان ، زر محمد خان ، ملک واجد علی ، مہرزیب خان ، قاری وحید گل ، آفریدوں کلے سے ملک زرولی خان ، فیاض خان ، شیرین کوٹھے مراد خان ، آصف خان،مقصود علی ،ملک ریاض خان ، نادر خان ، مختیار لالاسمیت دیگر عمائدین علاقہ بھی شریک ہوئے۔اجلاس میں بارہ بانڈہ انڈسٹری اسٹیٹ میں قائم دو بڑی فیکٹریوں جس میں نواب علی مشترکہ فیڈ پروٹین اور ماسٹر برادرز پروٹین پروسیسنگ (سہیل فیکٹری)سے پھیلنے والی بدبو پر شدید تشویش کا اظہار کیا گیا۔ مقررین کا کہنا تھا کہ ان فیکٹریوں سے نکلنے والی بدبو نے نہ صرف ماحول کو آلودہ کر دیا ہے بلکہ انسانی صحت کے لیے بھی سنگین خطرات پیدا کر دیے ہیں۔شرکاء نے متفقہ طور پر فیصلہ کیا کہ متعلقہ فیکٹریوں کو آج شام چار بجے تک بند کرنے کی ڈیڈ لائن دی گئی ۔ بصورت دیگر سخت عوامی ردعمل سامنے آئے گا۔اجلاس میں یہ بھی طے پایا کہ بروز منگل ایک منتخب کمیٹی ڈپٹی کمشنر نوشہرہ عرفان اللہ خان محسود سے ملاقات کرے گی اور فوری کارروائی کا مطالبہ کرے گی۔ شرکاء نے واضح کیا کہ اگر انتظامیہ نے بروقت اور مؤثر اقدامات نہ کیے تو عوام احتجاج پر مجبور ہوں گے۔مشران نے خبردار کیا کہ مطالبات تسلیم نہ ہونے کی صورت میں نہ صرف آنے والی پولیو مہم کا مکمل بائیکاٹ کیا جائے گا بلکہ بارہ بانڈہ انڈسٹری اسٹیٹ کی مرکزی شاہراہ اور مردان نوشہرہ جی ٹی روڈ کو ہر قسم کی ٹریفک کے لیے بند کر دیا جائے گا، جس کی تمام تر ذمہ داری ضلعی انتظامیہ پر عائد ہوگی۔اجلاس کے شرکاء کا کہنا تھا کہ فیکٹریوں سے اٹھنے والی بدبو نے بارہ بانڈہ، رشکئی، شیرین کوٹھے، میرہ کھنڈر اور دیگر ملحقہ علاقوں کو اپنی لپیٹ میں لے رکھا ہے، جس کے باعث عوام مختلف بیماریوں میں مبتلا ہو رہے ہیں اور روزمرہ زندگی شدید متاثر ہو چکی ہے۔علاقہ مکینوں نے حکومت اور متعلقہ اداروں سے فوری نوٹس لینے کا مطالبہ کرتے ہوئے کہا ہے کہ انسانی صحت اور ماحول کے تحفظ کے لیے ان فیکٹریوں کے خلاف فوری اور مؤثر کارروائی ناگزیر ہو چکی۔

22/03/2026

رسالپور(رپورٹ/ اختر محمود) مرغی کے انتڑیوں کے کارخانے کی بدبو کے خلاف عوامی ردعمل، احتجاج کا اعلان۔رسالپور بارہ بانڈہ انڈسٹری اسٹیٹ نوشہرہ میں قائم مرغی کے انتڑیوں کے کارخانے سے اٹھنے والی شدید بدبو نے ایک بار پھر سنگین صورتحال اختیار کرلی ہے، جس کے باعث عید اور عید کے دوسرے روز پورا علاقہ تعفن کی لپیٹ میں رہا۔ مقامی آبادی کو نہ صرف شدید اذیت کا سامنا کرنا پڑا بلکہ بدبو کے باعث معمولات زندگی بھی بری طرح متاثر ہوئے۔علاقہ مکینوں کے مطابق کارخانے سے نکلنے والی بدبو اب پہلے سے کہیں زیادہ شدت اختیار کر چکی ہے، جس کی وجہ سے سانس لینے میں دشواری، متلی اور دیگر بیماریوں کے خدشات بڑھ گئے ہیں۔ شہریوں نے متعلقہ اداروں کی خاموشی پر شدید تشویش کا اظہار کرتے ہوئے فوری نوٹس لینے کا مطالبہ کیا ہے۔اس صورتحال پر ردعمل دیتے ہوئے امن جرگہ کے ضلعی انفارمیشن سیکرٹری عابد تاج نے اعلان کیا ہے کہ مرغی کے انتڑیوں کے کارخانے کے خلاف بروز منگل زبردست احتجاجی مظاہرہ کیا جائے گا۔ انہوں نے بتایا کہ احتجاج رسالپور بارہ بانڈہ انڈسٹری اسٹیٹ کی مین سڑک اور مردان نوشہرہ جی ٹی روڈ پر کیا جائے گا، جس میں سیاسی و سماجی شخصیات، سابقہ ناظمین اور علاقے کے عوام کثیر تعداد میں شرکت کریں گے۔عابد تاج کا کہنا تھا کہ اگر انتظامیہ نے فوری طور پر اس مسئلے کا حل نہ نکالا تو احتجاج کا دائرہ مزید وسیع کیا جائے گا۔ انہوں نے کہا کہ عوام کا صبر جواب دے چکا ہے اور اب مزید خاموشی اختیار نہیں کی جائے گی۔مقامی شہریوں نے بھی واضح کیا ہے کہ وہ اپنے بنیادی حق، صاف ماحول کے حصول کے لیے ہر ممکن قدم اٹھائیں گے اور اس مسئلے کے مستقل حل تک احتجاج جاری رکھا جائے گا۔

18/03/2026

رسالپور صحافیوں اور رسالپور میڈیا گروپ کی طرف سے چاند رات پر ہوائی فائرنگ کرنے والے عوام کو خصوصی پیغام ۔
منجانب/ صحافی اختر محمود