30/08/2026
صوبائی وزیر بلدیات سندھ سید ناصر حسین شاہ، رکن قومی اسمبلی نعمان اسلام شیخ اور چیئرمین ڈسٹرکٹ کونسل سکھر سید کمیل حیدر شاہ کی کاوشوں سے روہڑی میں جدید 3 ایم جی ڈی واٹر فلٹریشن پلانٹ کی تکمیل کرلی گئی ہے، جس سے شہر میں صاف اور شفاف پینے کے پانی کی فراہمی کے حوالے سے ایک اہم پیش رفت سامنے آئی ہے
منصوبے کے تحت دریائے سندھ سے حاصل ہونے والے پانی کو جدید فلٹریشن ٹیکنالوجی کے ذریعے صاف اور قابلِ استعمال بنایا جائے گا۔ فلٹریشن پلانٹ کی مکمل استعداد کے بعد روزانہ 13 لاکھ گیلن سے زائد صاف اور شفاف پانی روہڑی کے مختلف علاقوں میں شہریوں کے گھروں تک پہنچایا جائے گا
فلٹریشن پلانٹ سے پانی کی فراہمی شروع کرنے سے قبل پانی کے معیار کو جانچنے کے لیے ٹیسٹنگ کا عمل جاری ہے، تاکہ شہریوں کو فراہم کیے جانے والے پانی کے معیار کو یقینی بنایا جاسکے۔ ٹیسٹنگ اور دیگر ضروری مراحل مکمل ہونے کے بعد جلد ہی منصوبے کا باقاعدہ افتتاح کیا جائے گا، جس کے بعد پلانٹ کو مکمل طور پر فعال کردیا جائے گا
چیئرمین میونسپل کمیٹی روہڑی میر یعقوب علی شاہ، فوکل پرسن برائے لوکل گورنمنٹ عرفان داؤد پوٹو اور میونسپل انتظامیہ کے افسران نے شہر کے مختلف علاقوں کا دورہ کیا اور فلٹریشن پلانٹ سے فراہم کیے جانے والے پانی کا موقع پر جائزہ لیا انتظامیہ نے پانی کے معیار اور سپلائی کے نظام کو بھی چیک کیا
میونسپل انتظامیہ کے مطابق جدید واٹر فلٹریشن پلانٹ کی فعالیت سے روہڑی میں پینے کے صاف پانی کی فراہمی کے نظام میں بہتری آئے گی اور شہریوں کو معیاری پانی کی فراہمی ممکن ہوسکے گی۔ منصوبے کو روہڑی کے شہریوں کے لیے بنیادی سہولیات کی فراہمی اور شہر میں پانی کے دیرینہ مسئلے کے حل کی جانب ایک اہم قدم قرار دیا جارہا ہے
