12/07/2026
ہڑپہ سے ایک اہم خبر...
فیڈرل انویسٹی گیشن ایجنسی (FIA) کمپوزٹ سرکل ساہیوال نے بینظیر انکم سپورٹ پروگرام (BISP) کی مستحق خواتین کی امدادی رقوم میں مبینہ غیر قانونی کٹوتیوں کے معاملے پر مقدمہ درج کر لیا ہے۔
ایف آئی آر کے مطابق، 10 جولائی 2026 کو خفیہ اطلاع ملنے پر ڈپٹی ڈائریکٹر ایف آئی اے کی ہدایت پر ایک خصوصی ٹیم نے ہڑپہ شہر کے آرے والا چوک میں چھاپہ مار کارروائی کی۔ کارروائی کے دوران مبینہ طور پر قائم کیش شاپ سے نقد رقم، POS/BVS ڈیوائسز، موبائل فون، ٹیلینور سمیں، مستحقین کا ریکارڈ، رجسٹرز، رسیدیں اور دیگر متعلقہ دستاویزات قبضے میں لے لی گئیں۔
ایف آئی آر میں مؤقف اختیار کیا گیا ہے کہ مستحق خواتین کی امدادی رقوم میں سے گزشتہ کئی ماہ سے مبینہ طور پر 1500 سے 2000 روپے تک غیر قانونی کٹوتی کی جا رہی تھی، جبکہ متعدد خواتین نے ایف آئی اے کو اپنے بیانات میں بھی اس الزام کی تصدیق کی۔
ایف آئی اے کے مطابق، ابتدائی تفتیش کے دوران ایک ملزم کے موبائل فون سے آڈیو پیغامات اور چیٹس بھی برآمد ہوئی ہیں، جنہیں تفتیش کا حصہ بنایا گیا ہے۔
اس معاملے میں محمد ارشد سمیت دیگر افراد کے خلاف تعزیراتِ پاکستان کی دفعات 109، 406 اور 420 کے تحت مقدمہ درج کر لیا گیا ہے، جبکہ بینظیر انکم سپورٹ پروگرام کے بعض ملازمین اور دیگر ممکنہ کرداروں کی تحقیقات بھی جاری ہیں۔
یاد رہے کہ مقدمہ درج ہونا الزام ہے، اور ملزمان کی ذمہ داری یا بے گناہی کا حتمی فیصلہ عدالت میں شواہد کی بنیاد پر ہوگا۔
مزید خبروں کے لیے دیکھتے رہیے sahiwal24
