19/01/2026
جےیوآئی ایم پی اے ریحانہ اسماعیل کی صوبائی اسمبلی میں اہم قرارداد،
تعلیمی اداروں میں اخلاقی بگاڑ پر تشویش
ریحانہ اسماعیل کا تعلیمی اداروں میں غیر اخلاقی سرگرمیوں کے خلاف فوری کارروائی کا مطالبہ
اسلامی اقدار کے فروغ کے لیے جامع پالیسی ناگزیر: ریحانہ اسماعیل
پشاور()جمعیت علمائے اسلام کی رکن صوبائی اسمبلی محترمہ ریحانہ اسماعیل نے خیبر پختونخوا اسمبلی میں ایک اہم قرارداد جمع کرائی ہے،جس میں تعلیمی اداروں میں بڑھتی ہوئی غیر اخلاقی سرگرمیوں پر شدید تشویش کا اظہار کیا گیا ہے۔
قرارداد میں کہا گیا ہے کہ پاکستان ایک اسلامی ریاست ہے اور آئینِ پاکستان کے مطابق ریاستی نظام کو اسلامی اقدار اور تعلیمات کے مطابق چلانا حکومت کی آئینی ذمہ داری ہے، تاہم حالیہ دنوں بعض تعلیمی اداروں میں ایسے واقعات سامنے آئے ہیں جو معاشرتی اقدار اور نوجوان نسل کے مستقبل کے لیے نقصان دہ ہیں۔
ریحانہ اسماعیل نے قرارداد میں پشاور کی ایک سرکاری یونیورسٹی میں پیش آنے والے واقعے کا حوالہ دیتے ہوئے مطالبہ کیا ہے کہ اس کی فوری، شفاف اور غیر جانبدار تحقیقات کی جائیں اور ملوث عناصر کے خلاف قانون کے مطابق سخت کارروائی عمل میں لائی جائے۔
قرارداد میں اس امر پر زور دیا گیا ہے کہ تعلیمی اداروں میں اسلامی اخلاقیات، سماجی روایات اور کردار سازی کو یقینی بنانے کے لیے جامع پالیسی تشکیل دی جائے اور مؤثر نگرانی کا نظام قائم کیا جائے تاکہ مستقبل میں ایسے واقعات کی روک تھام ممکن ہو سکے۔
