03/12/2025
شاربہ فاؤنڈیشن اور محکمہ تعلیم کھرمنگ کے اشتراک سے بوائز ہائی اسکول مادھوپور میں پری اسکول گریجویشن تقریب کا انعقاد
کھرمنگ (خصوصی رپورٹ)
کے علاقے مادھوپور میں شاربہ فاؤنڈیشن اور محکمہ تعلیم کھرمنگ کے تعاون سے شاربہ پری اسکول کی گریجویشن تقریب منعقد ہوئی، جس میں علاقے کے علماء کرام، والدین، عمائدین اور عوام کی بڑی تعداد نے شرکت کی۔ تقریب کے مہمان خصوصی ڈی ڈی او طولتی اختر حسین اور سابق ڈی آئی ایس محمد حسین انقلابی تھے، جبکہ صدارت نائب امام جمعہ ہیڈکوارٹر ایریا سید عباس کاظمی نے کی۔
تقریب سے خطاب کرتے ہوئے صدرِ تقریب آغا سید عباس کاظمی نے شاربہ فاؤنڈیشن کی تعلیم و صحت کے شعبوں میں خدمات کو لائقِ تحسین قرار دیتے ہوئے کہا کہ فاؤنڈیشن کا کردار علاقے کی سماجی ترقی میں اہم سنگِ میل ثابت ہو رہا ہے۔
سابق ڈی آئی ایس محمد حسین انقلابی نے اپنے خطاب میں کہا کہ ارلی ایجوکیشن کے شعبے میں شاربہ فاؤنڈیشن کی سنجیدہ اور معیاری کوششیں مستقبل میں علاقے کی تعلیمی بہتری کے لیے بنیادی حیثیت رکھتی ہیں۔
ڈی ڈی او طولتی اختر حسین نے کہا کہ شاربہ فاؤنڈیشن محکمہ تعلیم کے ساتھ مسلسل تعاون کر رہی ہے، خاص طور پر ٹیچرز ٹریننگ اور ECE پروگرام میں فاؤنڈیشن کا کام قابل تقلید ہے۔
تعلیم کمیٹی کے وائس چیئرمین سید حسنین جلالی نے بھی فاؤنڈیشن کے ECE پراجیکٹ کو سراہتے ہوئے کہا کہ یہ کوششیں علاقے میں معیاری تعلیم کے فروغ کا نیا باب ثابت ہوں گی۔
اس موقع پر شاربہ فاؤنڈیشن کے جنرل سیکرٹری نثار حسین نے چیئرمین شاربہ تعلیمی کمیٹی سکندر اعجاز، صدر حسن حسنی اور کوآرڈینیٹر سید عباس کاظمی کی کاوشوں کو خراج تحسین پیش کیا۔
تقریب میں پری اسکول کے بچوں نے رنگارنگ اور معیاری پرفارمنس پیش کی، جس پر شرکاء نے بھرپور داد دی۔ آخر میں پلے گروپ کے گریجویٹس کو میڈلز اور سرٹیفیکیٹس دیے گئے جبکہ بہترین کارکردگی پر اساتذہ کو شیلڈز سے نوازا گیا۔
تقریب کے اختتام پر شرکاء نے شاربہ فاؤنڈیشن کے ڈونر جناب علی محسن کی خدمات کا خصوصی شکریہ ادا کیا اور انہیں اعزازی شیلڈ پیش کی گئی۔
