14/03/2026
ایم اسکول بانڈئی کے زیرِ اہتمام یومِ یتامیٰ کی سالانہ تقریب اور اجتماعی افطاری کا اہتمام
سوات (بیورو رپورٹ) ماہِ رمضان المبارک کے بابرکت موقع پر ایم اسکول بانڈئی کی جانب سے اپنی روایت کو برقرار رکھتے ہوئے اس سال بھی یومِ یتامیٰ کی ایک پروقار تقریب زمونگ کور ماڈل اسکول کانجو ٹاؤن شپ میں منعقد کی گئی۔ ایم اسکول ہر سال اس خصوصی دن کو باقاعدگی سے مناتا ہے تاکہ معاشرے میں یتیم بچوں کے حقوق کے بارے میں آگاہی پیدا کی جا سکے اور ہمدردی، محبت اور انسانیت کے جذبات کو فروغ دیا جا سکے۔ تقریب کے دوران ایم اسکول بانڈئی کے طلبہ اور اساتذہ نے زمونگ کور کے مختلف شعبہ جات کا دورہ بھی کیا۔ وفد نے وہاں قائم اسکول، ہاسٹل، کچن، میس، دفاتر اور دیگر سہولیات کا معائنہ کیا اور بچوں کی تعلیم و تربیت اور رہائش کے انتظامات پر اطمینان کا اظہار کیا۔ اس موقع پر طلبہ کو عملی طور پر یہ سکھایا گیا کہ معاشرے کے کمزور طبقات کے ساتھ کس طرح ہمدردی اور حسنِ سلوک سے پیش آیا جاتا ہے۔ ایم اسکول بانڈئی کے طلبہ نے حسبِ روایت سال بھر اپنی جیب خرچ سے بچت کر کے یتیم بچوں کے لیے تحائف کا اہتمام کیا، جو تقریب کے دوران ان میں تقسیم کیے گئے۔ اسکول انتظامیہ کے مطابق اس سرگرمی کا مقصد طلبہ میں خدمتِ خلق، اچھے اخلاق اور سماجی ذمہ داری کا شعور اجاگر کرنا ہے۔ تقریب میں اسسٹنٹ کمشنر کبل عائشہ ناصر، ایڈیشنل ڈپٹی کمشنر ریلیف نعمت اللہ، جیل سپرنٹنڈنٹ ایوب باچا، سوشل ویلفیئر ڈیپارٹمنٹ کے نمائندہ احسان، تحصیل کبل چئیر مین سعید خان اور دیگر معزز سماجی شخصیات نے شرکت کی۔ مہمانانِ گرامی نے ایم اسکول بانڈئی کے اس اقدام کو سراہتے ہوئے اسے ایک مثالی سماجی خدمت قرار دیا۔ اس موقع پر جیل سپرنٹنڈنٹ ایوب باچا نے دو لاکھ روپے ، چئیر مین سعید خان نے پچاس ہزار روپے نقد بچوں میں عیدی تقسیم کیا، جبکہ ایڈیشنل ڈپٹی کمشنر ریلیف نعمت اللہ نے یتیم بچوں میں عید کے تحائف تقسیم کیے۔ بعد ازاں ایم اسکول بانڈئی کی جانب سے زمونگ کور ماڈل اسکول کے یتیم رہائشی بچوں اور مہمانوں کے اعزاز میں ایک شاندار اجتماعی افطار کا اہتمام بھی کیا گیا۔ اس موقع پر مقررین نے اس امید کا اظہار کیا کہ ایم اسکول بانڈئی کی طرح دیگر تعلیمی ادارے بھی ایسے فلاحی اور سماجی اقدامات میں بڑھ چڑھ کر حصہ لیں گے تاکہ معاشرے میں اخوت، محبت اور انسان دوستی کا پیغام عام ہو سکے۔
ڈائریکٹر زمونگ کور ماڈل اسکول فرمان علی نے ایم اسکول سمیت تمام مہمانوں کا شکریہ ادا کیا ۔
