01/06/2026
*تھانہ غالیگے پولیس کی کامیاب کارروائی، بندوق کی نوک پر موٹر سائیکل، نقدی اور موبائل فون لوٹنے والا بین الضلاعی گینگ بے نقاب، ملزمان اور سہولت کار ملزمہ گرفتار*
اس حوالے سے ایڈیشنل ایس پی سوات غلام صادق نے ایس ڈی پی او بریکوٹ سید رحیم، ایس ایچ او تھانہ غالیگے نثار الدین اور انچارج انویسٹی گیشن تھانہ غالیگے شکیل خان کے ہمراہ پریس بریفنگ دیتے ہوئے کہا کہ تین یوم قبل بریکوٹ میں نامعلوم ملزمان نے سوات کی سیر و تفریح کے لیے آنے والے نوجوانوں کو بندوق کی نوک پر لوٹ کر ایک موٹر سائیکل، نقدی رقم اور موبائل فونز چھین لیے اور فرار ہو گئے۔ انہوں نے کہا کہ سجاد ولد محمد علی، ساکن بونیر کی مدعیت میں تھانہ غالیگے میں نامعلوم ملزمان کے خلاف مقدمہ درج کر لیا گیا تھا۔
انہوں نے کہا کہ واقعے کا ڈی پی او سوات محمد عمر خان نے فوری نوٹس لیتے ہوئے میری سربراہی اور ایس ڈی پی او بریکوٹ سید رحیم کی نگرانی میں ایس ایچ او تھانہ غالیگے نثار الدین، انویسٹی گیشن آفیسر شکیل خان اور دیگر پولیس اہلکاروں پر مشتمل ایک سپیشل ٹیم تشکیل دی۔ سپیشل ٹیم نے سی ٹی وی کیمروں اور جدید تکنیکی ذرائع کی مدد سے کارروائی کرتے ہوئے سوات آنے والے سیاحوں کو لوٹنے والے بین الضلاعی گینگ کے 4 ملزمان محمد کامران ولد نیاز علی، اسد خان ولد ممتاز خان، حارث خان ولد اجمل اور جنید ولد نیاز علی، ساکنان ضلع مردان کو ایک سہولت کار ملزمہ، (س) زوجہ نیاز علی سمیت گرفتار کر لیا۔
گرفتار ملزمان سوات کے علاوہ ضلع مردان، صوابی اور بٹ خیلہ پولیس کو بھی چوری کی مختلف وارداتوں میں مطلوب تھے۔ گرفتار گینگ سے مختلف وارداتوں میں چھینی گئی 1 لاکھ 10 ہزار روپے نقدی، پرسیں، 3 موٹر سائیکلیں، 2 پستولیں اور مختلف قسم کے 24 موبائل فونز بھی برآمد کر لیے گئے ہیں۔ ملزمان سے مزید انکشافات متوقع ہیں۔
ترجمان سوات پولیس
