Talagang TV - HD

28/10/2025

27/10/2025

بہتر طریقہ علاج حجامہ ہے

تحریر: ڈاکٹر عامر نواز اعوان
(ہومیو و ہربل فزیشن، گولڈ میڈلسٹ)

محترم قارئین! دنیا بھر میں جدید ترین طبی سہولیات اور مشینوں کے باوجود آج بھی لوگ قدرتی اور روایتی طریقہ علاج کی طرف رجوع کر رہے ہیں۔ جس کی خاص وجہ یہ ہے کہ قدرتی طریقہ علاج میں سائیڈ ایفکٹ نہیں ہے۔ بس اہم بات یہ ہے کہ علاج ہمیشہ کسی مستند معالج سے کرائیں۔ بحرحال انہی قدیم اور مؤثر طریقہ علاج میں سے ایک ’’حجامہ‘‘ بھی ہے، جو نہ صرف طب نبوی ﷺ کا حصہ ہے بلکہ ایک آزمودہ، محفوظ اور سستا علاج بھی ہے۔ حجامہ ایسا طریقہ علاج ہے جو دراصل جسم سے فاسد اور زہریلے مادوں کے اخراج کا قدرتی طریقہ ہے۔ اس عمل میں مخصوص مقامات پر کپ لگائے جاتے ہیں، جن کے ذریعے خون کے وہ اجزاء نکالے جاتے ہیں جو جسم میں بیماریوں، درد اور سستی کا باعث بنتے ہیں۔ رسولِ اکرم ﷺ نے خود بھی مختلف مواقع پر حجامہ کروایا اور اپنی امت کو اس کی ترغیب دی۔ بخاری شریف کی ایک حدیثِ مبارکہ میں آپ ﷺ نے فرمایا: "تمہارے علاج کے طریقوں میں سب سے بہتر طریقہ حجامہ ہے۔" ماہرین کے مطابق حجامہ نہ صرف دردِ کمر، جوڑوں کے درد، بلڈ پریشر، شوگر، موٹاپا اور جلدی امراض میں مفید ہے بلکہ اعصابی تناؤ، ذہنی دباؤ اور معدے کے مسائل میں بھی بہترین نتائج دیتا ہے۔ اس سے خون کی روانی بہتر ہوتی ہے، مدافعتی نظام مضبوط ہوتا ہے اور جسم میں تازگی محسوس ہوتی ہے۔ حجامہ کے بہتر نتائج حاصل کرنے کیلئے اہم بات یہ ہے کہ حجامہ ہمیشہ تربیت یافتہ معالج سے، حفظانِ صحت کے اصولوں کے مطابق کروایا جائے۔ صاف ستھرے آلات، سینیٹائزڈ کپ اور مناسب طبی نگرانی اس کے مؤثر نتائج کے لیے ضروری ہیں۔ آج کے اس تیز ترین دور میں جب انسان مختلف امراض اور ذہنی دباؤ کا شکار ہے، حجامہ ایک ایسی سنتِ نبوی ﷺ ہے جو جسم و روح دونوں کے لیے شفا کا ذریعہ بن سکتی ہے۔ ہمیں چاہیے کہ اس سنت کو اپنائیں، آگاہی پھیلائیں اور صحت مند معاشرہ تشکیل دیں۔

26/10/2025

26/10/2025

صحت کے معاملے میں پورا معاشرہ ہی غیر ذمہ دار کیوں؟

تحریر: ڈاکٹر عامر نواز اعوان
ہومیو و ہربل فزیشن (گولڈ میڈلسٹ)

محترم قارئین! صحت اللہ تعالیٰ کی سب سے بڑی نعمتوں میں سے ایک ہے۔ انسان اگر صحت مند ہو تو زندگی کی ہر نعمت اُس کے لیے قابلِ لطف ہے، لیکن افسوس کہ ہم لوگ اس عظیم نعمت کی قدر ہی نہیں کرتے۔ آج ہمارے معاشرے میں صحت کے معاملے میں بے احتیاطی، لاپرواہی اور غیر ذمہ داری ایک عام رویہ بن چکا ہے۔ ہم کھانے پینے میں بے اعتدالی کرتے ہیں، واک نہیں کرتے، دیگر جسمانی سرگرمیوں سے دور بھاگتے ہیں، نیند پوری نہیں کرتے، اور سب سے بڑھ کر معمولی سی بیماری کو بھی نظر انداز کر دیتے ہیں۔ ڈاکٹر/طبیب کے پاس جانے سے کتراتے ہیں اور گھریلو ٹوٹکوں یا خود ساختہ علاج پر بھروسہ کرتے ہیں۔ جسم میں کہیں بھی درد ہوا تو درد کی گولی کھا لی۔ نتیجتاً ایک معمولی مسئلہ رفتہ رفتہ خطرناک بیماری میں بدل جاتا ہے۔ ایک اور بڑی وجہ یہ بھی ہے ہم بیماری کے آنے کا انتظار کرتے ہیں، اس سے بچاؤ کی تدابیر اختیار نہیں کرتے۔ حالانکہ پرہیز اور معتدل زندگی گزارنا ہمارے تمام مسائل کا حل ہے لیکن ہم بے احتیاطی کی انتہا کر دیتے ہیں۔ ترقی یافتہ ممالک میں لوگ اپنا سالانہ میڈیکل چیک اپ کرواتے ہیں، خوراک کا خیال رکھتے ہیں اور فٹنس کو ترجیح دیتے ہیں۔ اس کے برعکس ہمارے ہاں ہسپتال اُس وقت جاتے ہیں جب مرض بگڑ چکا ہوتا ہے۔ صحت کے حوالے سے تعلیم و آگاہی کی کمی بھی ایک بڑا مسئلہ ہے۔ ہمارے سکولوں اور گھروں میں صحت مند طرزِ زندگی کی تربیت نہیں دی جاتی۔ بچے شروع سے ہی چٹ پٹے سلانٹی، پاپڑ، بسکٹ، لولی پاپ اور غیر معیاری کھانوں کے عادی بنا دیے جاتے ہیں۔ نتیجہ یہ ہے کہ کم عمری میں ہی شوگر، بلڈ پریشر اور موٹاپے جیسی بیماریاں عام ہو رہی ہیں۔ ہمیں یہ سمجھنا ہوگا کہ صحت کسی ایک فرد کا نہیں، بلکہ پورے معاشرے کا سرمایہ ہے۔ ایک صحت مند قوم ہی ترقی کر سکتی ہے۔ اس کے لیے ضروری ہے کہ ہم اپنی غذا، نیند، جسمانی سرگرمی اور ذہنی سکون پر توجہ دیں، باقاعدہ چیک اپ کروائیں اور علاج سے زیادہ بچاؤ کو اہمیت دیں۔ وقت آ گیا ہے کہ ہم اپنی صحت کے معاملے میں غیر ذمہ داری کو چھوڑ کر شعور اور عمل کا راستہ اختیار کریں۔ کیونکہ صحت اگر چلی جائے تو دنیا کی کوئی دولت اسے واپس نہیں لا سکتی۔