11/08/2026
*ضلع قلعہ عبداللہ میں صحت کے شعبے میں نمایاں بہتری، قبائلی و سماجی رہنما امیر امان اللہ خان کاکڑ کی ڈی ایس ایم ضیاء الرحمن اور مانیٹرنگ آفیسر عاصل خان کی خدمات کو خراجِ تحسین، وزیراعلیٰ بلوچستان سے خصوصی ایوارڈ دینے کا مطالبہ**
قبائلی و سماجی رہنما امیر امان اللہ خان کاکڑ نے پی پی ایچ آئی ضلع قلعہ عبداللہ کے ڈسٹرکٹ سپورٹ منیجر (DSM) ضیاء الرحمن سے ملاقات ضلع بھر میں صحت کے شعبے میں جاری اصلاحات، طبی سہولیات میں بہتری اور عوامی خدمت کے لیے اٹھائے گئے اقدامات کو سراہتے ہوئے انہیں بھرپور خراجِ تحسین پیش کیا۔
ضیاء الرحمن نے جب سے ضلع قلعہ عبداللہ میں بطور ڈی ایس ایم ذمہ داریاں سنبھالی ہیں، صحت کے شعبے میں نمایاں اور مثبت تبدیلیاں دیکھنے میں آئی ہیں۔ بند پڑے متعدد بنیادی مراکز صحت (BHUs) کو فعال بنایا گیا، ادویات کی فراہمی میں اضافہ کیا گیا اور عوام کو بہتر طبی سہولیات کی فراہمی کے لیے عملی اقدامات اٹھائے گئے ہیں۔
انہوں نے کہا کہ ضیاء الرحمن کی آمد ضلع قلعہ عبداللہ کے عوام کے لیے ایک خوش آئند پیش رفت ثابت ہوئی ہے۔ ماضی میں نادر عبدالرحمن زئی بی ایچ یو کے لیے ادویات کا بجٹ تقریباً ایک لاکھ تیس ہزار روپے تھا جسے قبائلی وسماجی رہنما امیر امان اللہ خان کاکڑ دوخواست پر بڑھا کر ایک لاکھ اسی ہزار روپے تک کر دیا گیا ہے، جس سے مریضوں کو زیادہ اور بہتر طبی سہولیات میسر آئیں گی۔
انہوں نے اس اقدام پر ڈی ایس ایم ضیاء الرحمن کا شکریہ ادا کرتے ہوئے کہا کہ عوام ایسے مخلص، محنتی اور فرض شناس افسران کو ہمیشہ عزت اور قدر کی نگاہ سے دیکھتے ہیں۔
اس موقع پر ڈی ایس ایم ضیاء الرحمن نے کہا کہ ضلع قلعہ عبداللہ کے عوام کی خدمت ان کی اولین ترجیح ہے اور وہ اپنی تمام تر توانائیاں صحت کے نظام کی بہتری کے لیے صرف کر رہے ہیں۔ انہوں نے مزید
اعلان کیا کہ بہت جلد بی ایچ یو نادر عبدالرحمن زئی میں جدید سہولیات سے آراستہ لیبر روم قائم کیا جائے گا جبکہ ادویات اور دیگر طبی سہولیات میں بھی مزید اضافہ کیا جا رہا ہے تاکہ خواتین، بچوں اور عام مریضوں کو بہتر علاج معالجہ اپنے ہی علاقے میں میسر آسکے۔
انہوں نے مزید کہا کہ اگر کسی بھی بی ایچ یو میں کسی قسم کی کمی، مسئلہ یا ضرورت ہو تو عوام اور مقامی نمائندے بلا جھجھک آگاہ کریں۔ ان شاء اللہ عوامی مسائل کے حل اور طبی سہولیات کی بہتری کے لیے ہر ممکن اقدامات کیے جائیں گے۔ انہوں نے اس عزم کیا کہ ضلع قلعہ عبداللہ میں ایمبولینس سروس اور بنیادی طبی مراکز کو مزید فعال اور مضبوط بنایا جائے گا۔
قبائلی و سماجی رہنما امیر امان اللہ خان کاکڑ نے پی پی ایچ آئی کے مانیٹرنگ آفیسر عاصل خان کی خدمات کو بھی خراجِ تحسین پیش کرتے ہوئے کہا کہ عاصل خان ضلع قلعہ عبداللہ میں صحت کے نظام کی بہتری کے لیے دن رات محنت کر رہے ہیں۔ وہ ہر وقت بی ایچ یوز کے عملے کے ساتھ رابطے میں رہتے ہیں اور مشکل حالات، ہنگامی صورتحال اور دور دراز علاقوں میں بھی عملے کے شانہ بشانہ کھڑے نظر آتے ہیں۔ ان کی نگرانی، رہنمائی اور عوامی خدمت کا جذبہ قابلِ تعریف ہے۔
انہوں نے کہا کہ ضلع قلعہ عبداللہ میں صحت کے شعبے میں جو مثبت تبدیلیاں رونما ہو رہی ہیں ان میں ڈی ایس ایم ضیاء الرحمن کے ساتھ مانیٹرنگ آفیسر عاصل خان کی انتھک محنت، لگن اور بہترین ٹیم ورک بھی شامل ہے۔ ایسے مخلص، ایماندار اور فرض شناس افسران کسی بھی ادارے کا قیمتی اثاثہ ہوتے ہیں جو عوامی خدمت کو اپنا مشن سمجھ کر کام کرتے ہیں۔
امیر امان اللہ خان کاکڑ نے مزید کہا کہ ضیاء الرحمن کی والدہ محترمہ اس وقت آئی سی یو میں زیر علاج ہیں اور انتہائی نازک حالت میں ہیں، لیکن اس کے باوجود انہوں نے ذاتی مشکلات کو پس پشت ڈال کر عوامی خدمت کو ترجیح دی ہے اور مسلسل اپنی ذمہ داریاں نبھا رہے ہیں۔ یہ جذبہ ان کی فرض شناسی، ایمانداری اور عوام سے محبت کا واضح ثبوت ہے۔
انہوں نے وزیراعلیٰ بلوچستان سرفراز بگٹی سے پرزور مطالبہ کیا کہ ضلع قلعہ عبداللہ میں صحت کے شعبے کی بہتری، عوامی خدمت میں ڈی ایس ایم ضیاء الرحمن کو خصوصی ایوارڈ اور تعریفی سند سے نوازا جائے تاکہ ایسے افسران کی حوصلہ افزائی ہو
امیر امان اللہ خان کاکڑ نے کہا کہ ہم ایسے ایماندار، محنتی اور عوام دوست افسران کو سلام پیش کرتے ہیں جس نے ذاتی مشکلات کے باوجود عوامی خدمت کو اپنا اولین فریضہ سمجھا۔ ضلع قلعہ عبداللہ کے عوام ضیاء الرحمن اور عاصل خان کی خدمات کو قدر کی نگاہ سے دیکھتے ہیں اور ہم ہر مثبت اقدام میں ان کے شانہ بشانہ کھڑے رہیں گے۔ ایسے افسران قوم کا سرمایہ ہیں اور ان کی خدمات ہمیشہ یاد رکھی جائیں گی۔
قبائلی و سماجی رہنما امیر امان اللہ خان کاکڑ نے اس عزم کا اظہار کیا کہ ضلع قلعہ عبداللہ میں صحت، تعلیم اور دیگر عوامی مسائل کے حل کے لیے وہ ہمیشہ عوامی مفاد میں کام کرنے والے افسران اور اداروں کی بھرپور حمایت کرتے رہیں گے، جبکہ پی پی ایچ آئی حکام نے بھی عوام کو یقین دلایا کہ صحت کے شعبے میں مزید بہتری اور معیاری طبی سہولیات کی فراہمی کے لیے ان کی کوششیں جاری رہیں گی۔
