15/06/2026
گورنر خیبرپختونخوا فیصل کریم کنڈی سے عمران مخلص وزیر کی ملاقات، وزیرستان کے مسائل اور امن و امان کی صورتحال پر تفصیلی گفتگو
پاکستان پیپلز پارٹی جنوبی وزیرستان کے جنرل سیکرٹری عمران مخلص وزیر نے اپنے بڑے بھائی ملک طاؤس وزیر کے ہمراہ گورنر ہاؤس میں گورنر خیبرپختونخوا فیصل کریم کنڈی سے ملاقات کی۔ اس موقع پر گورنر خیبرپختونخوا نے عمران مخلص وزیر اور ان کے بڑے بھائی کا خیرمقدم کرتے ہوئے نیک خواہشات کا اظہار کیا۔
ملاقات کے دوران عمران مخلص وزیر نے وزیرستان کی موجودہ صورتحال، عوام کو درپیش مسائل اور علاقے میں امن و امان کے حوالے سے تفصیلی گفتگو کی۔ ان کے مطابق یہ ملاقات اس لحاظ سے بھی اہمیت کی حامل تھی کہ گزشتہ ماہ وانا میں مسلح افراد کے ہاتھوں اغوا اور بعد ازاں رہائی کے بعد گورنر خیبرپختونخوا سے یہ ان کی پہلی باضابطہ ملاقات تھی۔
عمران مخلص وزیر نے اپنی بازیابی کے معاملے پر مؤثر آواز اٹھانے اور خصوصی دلچسپی لینے پر گورنر فیصل کریم کنڈی کا شکریہ ادا کیا۔ انہوں نے گورنر خیبرپختونخوا کو وزیرستان، خصوصاً وانا، کے دورے کی دعوت بھی دی تاکہ وہ علاقے کے عوام سے براہِ راست ملاقات کرکے زمینی حقائق اور مسائل کا خود مشاہدہ کر سکیں۔
اس موقع پر عمران مخلص وزیر کے ہمراہ ان کے بڑے بھائی ملک طاؤس وزیر ، انجینئر جمال وزیر، انجینئر سجاد وزیر اور اعجاز وزیر بھی موجود تھے۔
گورنر خیبرپختونخوا فیصل کریم کنڈی نے عمران مخلص وزیر کے علاقے میں مخلصانہ کردار، عوامی خدمات اور امن و استحکام کے لیے کی جانے والی کاوشوں کو سراہتے ہوئے ہر ممکن تعاون کی یقین دہانی کرائی۔ انہوں نے کہا کہ پاکستان پیپلز پارٹی ہمیشہ غریب، محروم اور مظلوم طبقات کے ساتھ کھڑی رہی ہے اور قبائلی اضلاع کو درپیش مسائل سے پارٹی قیادت، بالخصوص چیئرمین پاکستان پیپلز پارٹی، بخوبی آگاہ ہیں۔
عمران مخلص وزیر نے وزیرستان کی موجودہ صورتحال پر تفصیلی بریفنگ دیتے ہوئے کہا کہ علاقے کے عوام اس وقت معاشی مشکلات، روزگار کی کمی اور امن و امان کے سنگین چیلنجز کا سامنا کر رہے ہیں۔ انہوں نے اس بات پر زور دیا کہ قبائلی اضلاع کے مسائل کے حل کے لیے صوبائی حکومت، وفاقی حکومت اور متعلقہ عسکری حکام کے درمیان مؤثر رابطے اور سنجیدہ مشاورت ناگزیر ہے تاکہ عوام کو درپیش مشکلات کا دیرپا حل نکالا جا سکے۔
گورنر خیبرپختونخوا فیصل کریم کنڈی نے یقین دہانی کرائی کہ وہ وزیرستان کے عوام کے مسائل کو ہر فورم پر بھرپور انداز میں اٹھاتے رہیں گے اور علاقے کی ترقی، خوشحالی اور پائیدار امن کے لیے اپنا کردار ادا کرتے رہیں گے۔ انہوں نے کہا کہ ان شاء اللہ وزیرستان کو درپیش بعض اہم مسائل کے حل کے لیے جلد مثبت پیش رفت سامنے آئے گی۔
گورنر خیبرپختونخوا نے اس بات کا بھی اعتراف کیا کہ اس وقت پھلوں اور سبزیوں کا سیزن جاری ہے، تاہم سڑکوں کی خراب صورتحال، بالخصوص اعظم ورسک تا وانا روڈ، کی وجہ سے مقامی کاشتکاروں اور تاجروں کو شدید مشکلات کا سامنا ہے۔ انہوں نے یقین دلایا کہ متعلقہ حکام کے ساتھ رابطہ کرکے ان مسائل کے حل اور سڑکوں کی بہتری کے لیے مؤثر اقدامات کیے جائیں گے۔
انہوں نے علاقے میں امن و امان کی صورتحال کو مزید بہتر بنانے کے لیے عملی اور مؤثر اقدامات اٹھانے کی ضرورت پر بھی زور دیا۔
