12/06/2026
ٹانک: سدگی برج منصوبے پر ٹیسٹنگ کا آغاز، جلد پلرز کی
تعمیر شروع ہوگی
ٹانک(گومل نیوز)معاون خصوصی برائے ٹیکنیکل ایجوکیشن اینڈ ووکیشنل ٹریننگ اتھارٹی خیبر پختونخوا، عثمان خان بیٹنی کے فنڈز سے تعمیر ہونے والے میگا پراجیکٹ سدگی برج پر ٹیسٹنگ کا عمل شروع کر دیا گیا ہے۔
ذرائع کے مطابق ٹیسٹنگ کے مرحلے کی تکمیل کے بعد منصوبے پر پلرز (Pillars) کی تعمیر کا باقاعدہ آغاز کیا جائے گا۔ متعلقہ حکام کا کہنا ہے کہ یہ اہم عوامی منصوبہ تیزی سے تکمیل کی جانب گامزن ہے اور جلد ہی علاقے کے عوام کو اس کے ثمرات حاصل ہوں گے۔
سدگی برج کی تعمیر سے بیٹنی سرکل کے متعدد دیہاتوں کا ٹانک شہر سے رابطہ مزید مضبوط ہوگا۔ بالخصوص سیلابی موسم کے دوران جب زمینی راستے منقطع ہو جاتے ہیں، تو مقامی آبادی کو شدید مشکلات کا سامنا کرنا پڑتا ہے۔ پل کی تکمیل کے بعد شہریوں کو پانی میں سفر کرنے کی خطرناک مجبوری سے نجات ملے گی اور آمدورفت محفوظ، آسان اور تیز ہو جائے گی۔
علاقہ مکینوں نے منصوبے پر پیش رفت کا خیرمقدم کرتے ہوئے امید ظاہر کی ہے کہ سدگی برج کی بروقت تکمیل سے نہ صرف سفری سہولیات میں بہتری آئے گی بلکہ مقامی تجارت، تعلیم اور صحت کی سہولیات تک رسائی بھی آسان ہو جائے گی۔
