Zubair Sabir

15/11/2025

شادی کی نہ صرف ایکسپائری ڈیٹ ہونی چاہیے بلکہ شریک حیات کو تبدیل کرنے کا آپشن بھی ہونا چاہیے: اداکارہ کاجول کے بیان نے نئی بحث چھیڑ دی

بولی وڈ اداکارہ کاجول نے دلچسپ خواہش کا اظہار کرتے ہوئے کہا ہے کہ شادی کی میعاد اور تجدید کا وقت مقرر ہونا چاہیے۔

کاجول نے ٹوئنکل کھنہ کے ہمراہ اپنے ٹاک شو میں وکی کوشل اور کریٹی سنن کے ہمراہ پروگرام کرتے وقت ساتھی میزبان کے سوال پر شادی کی میعاد اور تجدید پر بات کی۔

کاجول کی ساتھی میزبان ٹوئنکل کھنہ نے سوال کیا کہ شادی کے رشتے میں میعاد اور تجدید کا وقت مقرر ہونا چاہیے یا نہیں؟ اس پر مہمانوں وکی کوشل اور کریٹی سنن کے جواب سے قبل ہی کاجول نے جواب دیا۔

اداکارہ کاجول نے برملا اظہار کیا کہ بالکل شادی کی ایکسپائری ڈیٹ بی ہونی چاہیے اور یہ شریک حیات کو تبدیل کرنے کا آپشن بھی دیا جانا چاہیے۔

اداکارہ کے مطابق اس کی کوئی گارنٹی نہیں ہوتی کہ آپ نے جس شخص سے شادی کی، وہ اچھا نکلے گا آپ کی توقعات کے برعکس ہوگا، اس لیے شادی میں میعاد اور تجدید کا وقت مقرر ہونا چاہیے۔

کاجول کی بات پر ساتھی میزبان اور مہمان ہنس پڑے جب کہ ٹوئنکل کھنہ نے بھی اظہار حیرانگی کرتے ہوئے سوالیہ انداز میں کہا کہ پھر تو شادی، شادی نہیں بلکہ واشنگ مشین بن جائے گی، جب چاہے بدل دو۔

ٹوئنکل کھنہ کی بات پر کاجول نے دوبارہ اپنی بات پر زور دیا اور کہا کہ شادی کی نہ صرف ایکسپائری ڈیٹ ہونی چاہیے بلکہ شریک حیات کو تبدیل کرنے کا آپشن بھی ہونا چاہیے۔

کاجول کی بات کی ویڈیو وائرل ہوگئی اور سوشل میڈیا صارفین نے ان کی انوکھی خواہش پر تبصرے کرتے ہوئے لکھا کہ ان کا قصور نہیں ہے، ان کی شادی اجے دیوگن سے ہوئی ہے، اس لیے وہ ایسا کہ سکتی ہیں۔

15/11/2025

دبئی میں شاہ رخ کے نام پر 480 ملین ڈالر (4000 کروڑ) کا 55 منزلہ کمرشل ٹاور بنے گا

شاہ رخ خان نے مقبولیت کی نئی تاریخ رقم کر دی، وہ پہلے بالی وُڈ اسٹار بن گئے ہیں جن کے نام پر دبئی میں سرکاری طور پر ایک بڑے کمرشل ٹاور کا نام رکھا گیا ہے۔

“شاہ رُخز بائی ڈنیوب” کے نام سے یہ پروجیکٹ 15 نومبر 2025 کو ممبئی میں ایک بڑی تقریب کے دوران منظرِ عام پر آیا۔ یہ نہ صرف شاہ رخ خان کے کیریئر بلکہ خلیجی خطے میں ان کے نام سے منسوب رئیل اسٹیٹ کے حوالے سے بھی ایک اہم سنگِ میل ہے۔

55 منزلہ یہ گریڈ-اے کمرشل ٹاور ڈنیوب پراپرٹیز جو 2 ارب ڈالر کے ڈنیوب گروپ کا حصہ ہے کی جانب سے دبئی کی مشہور ترین شیخ زاید روڈ پر تعمیر کیا جا رہا ہے، جو شہر کا سب سے پوش کاروباری مرکز سمجھا جاتا ہے۔

4,000 کروڑ روپے (تقریباً 480 ملین ڈالر) مالیت کا یہ منصوبہ دبئی کی پہلی رئیل اسٹیٹ ڈویلپمنٹ ہے جسے مستقل طور پر کسی سلیبریٹی کے نام سے منسوب کیا گیا ہے۔

تقریب کے دوران ڈنیوب پراپرٹیز کے گروپ مینیجنگ ڈائریکٹر عادل سجان نے تصدیق کی کہ شاہ رخ خان کا نام ہمیشہ اس ٹاور سے منسلک رہے گا اور مستقبل میں کسی اور منصوبے کے لیے اس طرح کی برانڈنگ کا کوئی ارادہ نہیں۔

عادل سجان نے کہا کہ کم از کم دبئی میں مستقبلِ قریب میں کوئی اور اس طرح کا ٹاور اپنے نام سے نہیں بنا سکے گا۔

شاہ رخ خان نے اس پروجیکٹ کو اپنے لیے ایک جذباتی اعزاز قرار دیتے ہوئے کہا کہ یہ ان کی مرحوم والدہ کے نام ایک خوبصورت خراجِ تحسین ہے۔
انہوں نے کہا کہ میری والدہ بہت خوش ہوتیں۔ یہ بہت بڑا اعزاز ہے۔ جب میرے بچے یہاں آئیں گے تو میں ان سے کہوں گا، پاپا کا نام لکھا ہے، پاپا کی بلڈنگ ہے اور یوں انہوں نے اپنی فلم “کچھ کچھ ہوتا ہے” کا مشہور ڈائیلاگ دہرا دیا۔

قابلِ ذکر بات یہ ہے کہ شاہ رخ خان نے واضح کیا کہ وہ بہت کم چیزوں پر اپنا نام رکھتے ہیں، نہ ان کی پروڈکشن کمپنی (ریڈ چِلّیز انٹرٹینمنٹ) اور نہ ہی ان کا گھر (منت) ان کے نام پر ہے، اس لیے یہ اعزاز ان کے لیے خاص اہمیت رکھتا ہے۔

15/11/2025

مجھے مرثیہ پڑھنے پر 620 روپے کا چیک دے کر پی ٹی وی نے میری توہین کی ،سینئر اداکار راشد محمود

سینئر اداکار راشد محمود نے کہا ہے کہ پاکستان ٹیلی وژن (پی ٹی وی) نے انہیں ان کے مرثیہ پڑھنے کا معاوضہ 620 روپے دے کر ان کی توہین کی۔

راشد محمود نے حال ہی میں ایک پوڈکاسٹ میں شرکت کی، جہاں انہوں نے مختلف معاملات پر کھل کر گفتگو کی۔

پروگرام کے دوران انہوں نے نصف دہائی قبل کا واقعہ سنایا کہ کس طرح انہیں پی ٹی وی کی جانب سے انتہائی کم پیسے دے گئے جب کہ ان سے جونیئر فنکاروں کو کہیں زیادہ معاوضہ دیا گیا۔

انہوں نے بتایا کہ انہوں نے لاہور سینٹر پر مرثیہ پڑھا تھا اور مرثیہ پڑھنا ہر کسی کے بس کی بات نہیں جب کہ انہوں نے جس کا مرثیہ پڑھا تھا، ان کا مرثیہ باقیوں سے بہت زیادہ مشکل ہوتا ہے۔

ان کے مطابق عام طور پر وہ مرثیہ پڑھنے کے پیسے تک نہیں لیتے اور نہ ہی انہوں نے پی ٹی وی والوں سے رقم کا تقاضہ کیا تھا لیکن خود ہی انہوں نے کافی عرصے بعد چیک بھجوایا تھا۔

راشد محمود کا کہنا تھا کہ انہیں مرثیہ پڑھنے کا معاوضہ 620 روپے چیک کی صورت میں ملا اور چیک کو دیکھ کر انہیں شدید غصہ آیا اور انہوں نے پی ٹی وی انتطامیہ کو فون کرکے اپنا احتجاج ریکارڈ کروایا جب کہ بعد ازاں انہوں نے سرکاری ٹیلی وژن پر کام نہ کرنے کا اعلان بھی کیا۔

انہوں نے بتایا کہ وہ بائیکاٹ کے طور پر لاہور سینٹر پر کام نہیں کرتے لیکن اگر اسلام آباد سینٹر والے انہیں قومی سطح کے کسی پروگرام میں مدعو کرتے ہیں تو وہ ملک کی خاطر وہاں جاتے ہیں۔

انہوں نے کہا کہ انہیں 620 روپے کا چیک دے کر ان کی توہین کی گئی جب کہ ان سے جونیئر اور نئے فنکاروں کو ان سے کہیں زیادہ معاوضہ دیا گیا۔

اداکار کے مطابق ان کے احتجاج کے بعد پی ٹی وی کے اعلیٰ عہدیداروں نے فون کرکے ان سے معذرت کی اور کہا کہ یہ غلطی کی بنیاد پر ہوا ہے، جس پر انہوں نے انہیں بتایا کہ یہ غلطی نہیں، سالوں سے وہاں ایسا ہوتا آ رہا ہے۔

راشد محمود نے بتایا کہ پی ٹی وی میں برسوں سے ایسا ہی رویہ چلتا آ رہا ہے، وہاں کے ملازم اپنے کھانچوں کے لیے دوسروں کا حق مارتے ہیں

15/11/2025

مسیحی اداکارہ سنیتا مارشل سے شادی کی وجہ سے میرے مذہبی عقیدے کے بارے میں افواہیں پھیلائی جاتی ہیں،ادکار حسن احمد

اداکار حسن احمد نے انکشاف کیا ہے کہ مسیحی خاتون سے شادی کی وجہ سے ان کے مذہبی عقیدے کے بارے میں افواہیں پھیلائی جاتی ہیں۔

حسن احمد نے حال ہی میں ’سمتھنگ ہاٹ‘ کو انٹرویو دیا، جہاں انہوں نے اپنے کیریئر اور ذاتی زندگی کے بارے میں کھل کر بات کی۔

اداکار کا کہنا تھا کہ انہیں اپنے کیریئر کے دوران زیادہ تر منفی کردار کی ہی پیشکش کی جاتی تھی، جس کی وجہ سے وہ شروع میں اکتا بھی جاتے تھے اور کئی دفعہ ایک ہی طرز کے کردار کی پیشکش کے باعث پیشکش ٹھکرا بھی دیتے تھے، لیکن بعد میں انہیں احساس ہوا کہ اصل بات یہ ہے کہ کام کتنا اچھا کیا جاتا ہے۔

انہوں نے کہا کہ یہ سوچنا درست نہیں کہ ڈرامے میں صرف دس دن کا کام ہے، کیونکہ اصل اداکار وہ ہوتا ہے جو کم وقت میں بھی بہترین اداکاری پیش کرے اور یہی وہ اب کرتے ہیں۔

اداکار نے بتایا کہ ان کے زیادہ تر ڈرامے، جن میں ان کا کردار منفی ہوتا ہے، زیادہ مقبول ہوتے ہیں، جب کہ مثبت کردار والے ڈرامے کم مقبول ہوتے ہیں۔

حسن احمد نے اپنے اہلخانہ کے حوالے سے پھیلائی جانے والی افواہوں پر بھی روشنی ڈالی۔

ان کے مطابق بعض لوگ یہ کہتے ہیں کہ چونکہ انہوں نے ایک مسیحی خاتون سے شادی کی ہے، اس لیے وہ اسلام کو بھول گئے ہوں گے، لیکن وہ اب بھی اسلام پر عمل کرتے ہیں اور اپنے بچوں کو بھی باقاعدگی سے مسجد لے کر جاتے ہیں، ان کے بچے قرآن کی تلاوت بھی کرتے ہیں۔

حسن احمد کا کہنا تھا کہ یہی افواہیں ان کی اہلیہ کے بارے میں بھی پھیلائی جاتی ہیں، حالانکہ وہ بھی اپنے مذہب کی پیروی کرتی ہیں۔

اداکار نے کہا کہ شادی کے ابتدائی دس سال میں جب ہم دونوں ایک دوسرے کو سمجھنے کی کوشش کر رہے تھے اس دوران اگر کبھی ہم دونوں کے دل میں ایسا خیال آیا کہ الگ ہو جائیں تو ہم نے بچوں کی وجہ سے فوراً اس سوچ کو ذہن سے نکال دیا۔

حسن احمد کے مطابق اب ہم دونوں کے درمیان اتنی سمجھ بوجھ پیدا ہو چکی ہے کہ جو بھی بات پریشان کرتی ہے، اس پر آپس میں کھل کر بات کر لیتے ہیں۔

خیال رہے کہ حسن احمد اور سنیتا مارشل نے 2008 میں شادی کی تھی اور ان کے دو بچے ہیں۔

دونوں کو مختلف مذاہب سے تعلق رکھنے کے باوجود شادی کرنے پر بعض اوقات تنقید کا نشانہ بنایا جاتا ہے، حسن احمد اسلام جب کہ سنیتا مارشل مسیحیت کی پیروکار ہیں۔

15/11/2025

15/11/2025

ملتان سلطانز کو پی سی بی کی جانب سے نیا پی ایس ایل کنٹریکٹ نہ ملنے کا انکشاف

پاکستان سپر لیگ کی فرنچائز ملتان سلطانز مینجمنٹ کو پاکستان کرکٹ بورڈ (پی سی بی) کی جانب سے نیا پی ایس ایل کنٹریکٹ نہ ملنے کا انکشاف ہوا۔

ڈان نیوز کے مطابق ملتان سلطانز کو نیا پی ایس ایل کنٹریکٹ نہ ملنے کا انکشاف ہوا ہے، ذرائع نے بتایا ہے کہ ملتان سلطانز کمپلائنس پالیسی پر پورا نہیں اتری۔

ذرائع کے مطابق پاکستان کرکٹ بورڈ کی جانب سے بقیہ 5 فرنچائزز (کراچی کنگز، پشاور زلمی، اسلام آباد یونائیٹڈ، کوئٹہ گلیڈی ایٹرز اور لاہور قلندرز) کو کنٹریکٹ آفر کیے گئے ہیں۔

پی سی بی کی جانب سے تمام فرنچائزز کو طے شدہ ویلیو کے مطابق 25 فیصد اضافے کے ساتھ کنٹریکٹ آفر کیے گئے اور انہیں کنٹریکٹ سائن کرنے کیلئے 10 دن کا وقت دیا گیا ہے۔

علاوہ ازیں، ملتان سلطانز مینجمنٹ کو پی ایس ایل ویلیوایشن رپورٹ بھی نہیں بھیجی گئی۔

یاد رہے کہ ملتان سلطانز کے مالک علی ترین نے منیجمنٹ کے خلاف بیان بازی کی تھی اور علی ترین نے پی سی بی کا لیگل نوٹس بھی پھاڑ دیا تھا۔

اس سے قبل، ملتان سلطانز نے مختلف تجاویز پر مبنی چیئرمین پی سی بی کے نام ایک خط بھی لکھا تھا۔

دوسری جانب، پی ایس ایل کی ساتویں اور آٹھویں ٹیم کی فروخت کے لیے پی سی بی نے ٹینڈر جاری کردیا۔

پاکستان کرکٹ بورڈ کے مطابق پی ایس ایل کی دو ٹیمیں خریدنے کے خواہش مند افراد 15 دسمبر تک پروپوزل جمع کراسکتے ہیں جس کے بعد نیلامی کے ذریعے پی ایس ایل کی دو نئی ٹیمیں فروخت کی جائیں گی۔

پی ایس ایل کی دو نئی ممکنہ ٹیموں میں حیدر آباد، سیالکوٹ، مظفر آباد، فیصل آباد، گلگت اور راولپنڈی کو شامل کیا گیا ہے، مالکان ان دو شہروں میں سے کسی بھی ٹیم کو منتخب کرسکتے ہیں۔

15/11/2025

دہلی کرائم سیزن 3! خوفناک انسانی اسمگلنگ کی دنیا؛ کہاں دیکھ سکتے ہیں ؟

نیٹ فلکس کی کرائم ڈرامہ سیریز دہلی کرائم کا تیسرا سیزن جاری کردیا گیا ہے۔2019 میں پہلی بار پیش ہونے والی دہلی کرائم اپنی پہلے دو سیزنز میں زبردست پذیرائی حاصل کی۔

نیا سیزن انسانی اسمگلنگ اور بچوں کے استحصال کی دنیا میں جھانکتا ہے جہاں نوجوان لڑکیوں کو ملازمت کے بہانے بیچا یا استحصال کیا جاتا ہے۔ کہانی جزوی طور پر 2012 کے حقیقی اور خوفناک واقعے بیبی فالک پر مبنی ہے، جب دو سالہ بچی بھارت میں بچوں کے ساتھ بدسلوکی کی علامت بن گئی۔

اگرچہ سیزن 3 کی کہانی فرضی ہے مگر اس میں کچھ حقیقی اور خوفناک واقعات سے متاثر مناظر شامل ہیں۔ کہانی میں ایک گینگ شمال مشرق اور شمالی بھارت سے لڑکیوں کو اغوا کر کے بیچنے یا استحصال کرنے میں ملوث ہے۔

سیزن کا آغاز ڈی سی پی ورتیکا چترودی (Shefali Shah) کے کردار سے ہوتا ہے جو اب اسلچر، آسام میں تعینات ہیں۔ کہانی اس وقت پیچیدہ ہو جاتی ہے جب وہ ایک وین میں قیدی لڑکیوں کا پتہ لگاتی ہیں اور جلد ہی وہ “بڑی دیدی (ہما قریشی) کی قیادت میں ایک بڑے انسانی اسمگلنگ نیٹ ورک میں پھنس جاتی ہیں

اہم کاسٹ: شیفالی شاہ، ہما قریشی، راسیکا دگل، راجیش تیلانگ، سیانی گپتا، سدھارتھ بھارتی، میتا واسیشت، انورگ اروڑا، گوپال دت، جیا بھٹاشاریا، آکاش دہیا، یشاسوینی آر دایما، انشومان پوشکر، یکتِی تھریجا اور دیگر شامل ہیں۔

15/11/2025

انڈیا سے پاکستان آئی ہوئی لاپتہ سکھ خاتون یاتری نے اسلام قبول کر کے پاکستانی شہری سے شادی کرلی

لاہور: پاکستان میں بابا گرو نانک کے جنم دن کی یاترا کے لیے بھارت سے آنیوالے جتھے میں شامل سکھ خاتون سربجیت کور نے اسلام قبول کر کے ایک پاکستانی شہری سے شادی کرلی۔

خاتون کا اسلامی نام نور رکھا گیا ہے، نکاح نامے کے مطابق 48 سالہ سربجیت کور نے 5 نومبر کو ضلع شیخوپورہ کے فاروق آباد کے رہائشی پاکستانی شہری ناصر حسین سے نکاح کیا۔

نکاح میں 10 ہزار روپے حق مہر درج ہے جو ادا کیا جا چکا ہے۔ سربجیت کور 4 نومبر کو بھارتی یاتریوں کے ساتھ پاکستان آئی تھیں لیکن 13 نومبر کو بھارت واپس جانے والے یاتریوں میں شامل نہیں تھیں جب کہ اسی روز ان کا ویزہ بھی ختم ہوگیا تھا۔

اسی بنا پر انہیں لاپتہ قرار دے کر تلاش شروع کی گئی تاہم بعد ازاں معلوم ہوا کہ خاتون نے اسلام قبول کر کے پاکستانی شہری سے شادی کر لی ہے۔

15/11/2025

جنوبی کوریا: وہ یونیورسٹی امتحان جس کے لیے پورا ملک رُک جاتا ہے

جنوبی کوریا میں سالانہ کالج داخلہ امتحان ’سنیونگ‘ کے موقع پر پورا ملک ایک بار پھر رک گیا۔ ہزاروں طلبہ کے مستقبل کے فیصلے کے اس دن حکومت نے شور کم رکھنے سے لے کر ٹریفک ہموار رکھنے تک غیر معمولی اقدامات کیے، جب کہ والدین عبادت گاہوں میں اور طلبہ امتحانی مراکز میں بے پناہ دباؤ کا سامنا کرتے نظر آئے۔

جنوبی کوریا میں جمعرات کو کالج میں داخلے کے سب سے اہم اور مشکل سمجھے جانے والے امتحان ’سنیونگ‘ کا انعقاد کیا گیا، جس میں ملک بھر سے 5 لاکھ 50 ہزار سے زائد طلبہ شریک ہوئے۔

اس امتحان کو اعلیٰ یونیورسٹیوں میں داخلے کے لیے ناگزیر سمجھا جاتا ہے اور جنوبی کوریا میں اسے سماجی ترقی، مالی استحکام اور حتیٰ کہ شادی کے بہتر مواقع کے حصول کی کنجی قرار دیا جاتا ہے۔
امتحان کی حساسیت کے باعث حکومت نے ملک بھر میں خصوصی انتظامات کیے۔ خاص طور پر انگلش لسننگ ٹیسٹ کے 35 منٹ کے دوران تمام پروازیں عارضی طور پر معطل رہیں تاکہ کوئی شور طلبہ کی توجہ نہ بھٹکا سکے۔ وزارتِ اراضی کے مطابق 140 پروازوں کا شیڈول تبدیل کیا گیا، جن میں 75 بین الاقوامی پروازیں بھی شامل ہیں۔

بینکوں اور سرکاری دفاتر نے بھی اپنے اوقات کار ایک گھنٹہ آگے بڑھا دیے تاکہ سڑکوں پر رش کم ہو اور طلبہ با آسانی امتحانی مراکز پہنچ سکیں۔ سیئول سمیت مختلف شہروں میں پولیس کی بھاری نفری تعینات رہی اور ہر سال کی طرح اس بار بھی پولیس اہلکار دیر سے پہنچنے والے طلبہ کو تیزی سے امتحانی ہالز تک پہنچاتے دکھائی دیے۔
سیئول کے یونگسان ہائی اسکول کے باہر میڈیا کے نمائندوں کی بڑی تعداد موجود تھی، جب کہ اسکول کے جونیئر طلبہ اپنے سینیئرز کی حوصلہ افزائی کے لیے بینرز اٹھائے نعرے لگا رہے تھے: ”سنیونگ میں 100 نمبر لاؤ!“

16 سالہ کانگ ڈونگ وو نے کہا کہ وہ اپنے سینیئرز کی حوصلہ افزائی کے لیے آیا ہے اور اس ماحول کو دیکھ کر اسے بھی مزید محنت کی ترغیب ملتی ہے تاکہ وہ آئندہ برسوں میں سنیونگ کی اچھی تیاری کر سکے۔

امتحان دینے والے طلبہ میں سے ایک 18 سالہ کم من جے نے بتایا کہ وہ گھبراہٹ کا شکار ہے لیکن اچھی تیاری کی وجہ سے پُراعتماد بھی ہے۔ ان کے مطابق ان کے والدین ان سے کہیں زیادہ پریشان ہیں اور گھر سے نکلنے سے پہلے بار بار ہر چیز چیک کرتے رہے۔

جنوبی کوریا میں امتحان کے دن صرف انتظامی اقدامات ہی نہیں بلکہ روایات بھی اپنا کردار ادا کرتی ہیں۔ بہت سے والدین مندروں اور عبادت گاہوں کا رخ کرتے ہیں اور بچے امتحان سے پہلے وہ کھانے بھی نہیں کھاتے جنہیں بدقسمتی سے جوڑا جاتا ہے، جیسے سی ویڈ سوپ۔

اس سال ایک نیا پہلو یہ بھی شامل ہوا ہے کہ ملک کی تمام چار سالہ یونیورسٹیاں طلبہ کے اسکول میں تشدد یا بدمعاشی کے ریکارڈ کو بھی داخلے کا لازمی حصہ بنائیں گی۔ پہلے یہ اختیاری تھا لیکن اب داخلے کے فیصلے میں اس ریکارڈ کی حیثیت لازمی ہوگی۔

سخت دباؤ کے باوجود طلبہ اپنی بھرپور کوششوں کے ساتھ امتحان میں شریک ہوئے، جب کہ خاندانوں اور کمیونٹی کی جانب سے ملنے والا ساتھ اس بات کی نشاندہی کرتا ہے کہ جنوبی کوریا میں ’سنیونگ‘ صرف ایک امتحان نہیں بلکہ ایک قومی واقعہ بن چکا ہے۔

15/11/2025

’میرے شوہر سےرابطہ کرنا بند کردیں‘‘ فیروز خان کی موجودہ بیوی ڈاکٹر زینب اور سابقہ بیوی علیزہ سلطان کے درمیان جھڑپ

پاکستان کے مشہور اداکار فیروز خان کی موجودہ اہلیہ ڈاکٹر زینب اور سابقہ اہلیہ علیزہ سلطان کے درمیان انسٹاگرام پر جھڑپ ہو گئی۔ سابقہ اہلیہ علیزہ سلطان نے انسٹاگرام پوسٹ (جس کو بعد میں ڈیلیٹ کر دیا گیا) پر کمنٹ کیا کہ ’برائے مہربانی سردیوں کے کپڑے اور یونیفارم بھجوا دیں۔‘ یہ کمنٹ دیکھ کر ڈاکٹر زینب نے علیزہ سلطان کو آڑے ہتھوں لیا اور کہا کہ ایسی باتیں عوامی پلیٹ فارم پر نہیں کی جاتیں اور انہوں نے پہلے ہی فیروز خان کو اس طرح کے رویوں سے ذہنی طور پر متاثر کیا ہے، اس لیے مزید ایسا کرنا مناسب نہیں۔ انہوں نے علیزہ سلطان کو ہدایت کی کہ وہ اپنے والد اور بھائی کے فون نمبرز استعمال کر کے فیروز خان سے رابطہ کرنے کی کوشش بند کریں اور میسیجز بھیجنا بند کریں کیونکہ وہ پہلے ہی ان کو کو ذہنی طور پر پریشان کر چکی ہیں۔ ڈاکٹر زینب نے مزید کہا کہ علیزہ سلطان کا فیروز خان سے رابطہ کرنے یا انہیں پریشان کرنے کا کوئی حق نہیں رہا،انہوں نے علیزہ سلطان کو مشورہ دیا کہ شادی کرلیں کیونکہ ان کے مسائل شادی کے بعد ہی حل ہو سکتے ہیں۔

15/11/2025

15/11/2025

’اپنے شوہر اکشے کمار کی لگام کھینچ کر رکھنا‘: ٹوئنکل کھنہ کو یہ نصیحت کون کر گیا؟

ممبئی: معروف بالی وڈ اداکارہ و مصنفہ ٹوئنکل کھنہ ایک غیر روایتی ماحول میں پلی بڑھی کیونکہ ان کی والدہ ڈمپل کپاڈیہ اور والد راجیش کھنہ نے ایک دوسرے سے علیحدگی اختیار کر لی تھی۔

انڈین میڈیا کی رپورٹس کے مطابق حال ہی میں سوشل میڈیا پر راجیش کھنہ کی ایک پُرانی ویڈیو گردش کرتی ہوئی نظر آئی جس میں وہ اپنے داماد اکشے کمار کے بارے میں بات کر رہے ہیں۔

ویڈیو میں لیجنڈ اداکار کا کہنا تھا کہ ٹوئنکل کھنہ کا شوہر اکشے کمار اس عمر میں ’ہیرا پھیری‘ کرتا ہے اور گانے گاتا رہتا ہے۔

وہ کہتے ہیں کہ ’اس عمر میں تو ہمارا داما بہت گاتا ہے، کبھی وہ بھول بھولیاں کرتا ہے کبھی ہیرا پھیری کرتا ہے، ہیرا پھیری 2 کرتا ہے، بہت ہیرا پھیری کرتا ہے، ہیرا پھیری والا آدمی ہے وہ‘۔

راجیش کھنہ نے یہ بھی بتایا کہ انہوں نے اپنی بیٹی ٹوئنکل کھنہ سے کہا ہے کہ وہ اکشے کمار پر نظر رکھے لیکن اس پر زیادہ سختی نہ کریں۔ ’میں نے اپنی بیٹی کو بھی بولا ہے کہ زرا اس کی لگام کھیچ کر رکھنا لیکن اتنی بھی نہیں کہ یہ ٹوٹ جائے‘۔

اس سے قبل ایک انٹرویو میں ٹوئنکل کھنہ نے انکشاف کیا تھا کہ ان کی والدہ ڈمپل کپاڈیہ چاہتی تھیں کہ میں شادی سے قبل اکشے کمار کے ساتھ دو سال گزاروں۔

’جب اکشے کمار نے کہا کہ وہ مجھ سے شادی کرنا چاہتے ہیں تو میری ماں نے کہا ’کچھ نہیں کر رہے، تم دو سال ساتھ رہتے ہو اور اگر ساتھ نبھاتے ہو تو آپ کی شادی ہو جائے گی۔‘

ٹوئنکل کھنہ کی ’ویلکم ٹو پیراڈائز‘ نامی کتاب نومبر 2023 میں شائع ہوئی جو مختصر کہانیوں کا مشتمل ہے۔

دوسری طرف اکشے کمار اپنی فلم ’اسکائی فورس‘ کی کامیابی کا جشن منا رہے ہیں جو 24 جنوری 2025 کو سینما گھروں میں ریلیز ہوئی۔ فلم میں سارہ علی خان اور نمرت کور بھی اہم کرداروں میں ہیں۔