15/06/2026
محرم الحرام کے پُرامن انعقاد کے لیے پولیس لائن ٹانک میں گرینڈ جرگہ، بین المسالک ہم آہنگی اور اتحاد پر زور
ٹانک: محرم الحرام کے پُرامن انعقاد، بین المسالک ہم آہنگی اور سماجی رواداری کے فروغ کے سلسلے میں پولیس لائن ٹانک میں ایک گرینڈ جرگے کا انعقاد کیا گیا، جس کی صدارت کمشنر ڈیرہ ڈویژن داؤد خان نے کی۔
جرگے میں ڈی آئی جی ڈیرہ ریجن غلام مبشر میکن، ڈپٹی کمشنر ٹانک جمشید خان، ڈسٹرکٹ پولیس آفیسر (ڈی پی او) عبدالصمد خان، مختلف علاقوں کے عمائدین، اہل تشیع و اہل سنت کے مذہبی رہنماؤں اور مشرانِ علاقہ نے شرکت کی۔ اس موقع پر شرکاء نے یادگارِ شہداء پر حاضری دی اور پھول چڑھا کر شہداء کی قربانیوں کو خراجِ عقیدت پیش کیا۔
جرگے سے خطاب کرتے ہوئے کمشنر ڈیرہ ڈویژن داؤد خان نے کہا کہ محرم الحرام صبر، قربانی، ایثار، برداشت اور حق و صداقت پر ثابت قدم رہنے کا درس دیتا ہے۔ انہوں نے کہا کہ شہدائے کربلا کی لازوال قربانیاں پوری امت مسلمہ کے لیے مشعلِ راہ ہیں، جو اتحاد، اخوت اور باہمی احترام کا پیغام دیتی ہیں۔
انہوں نے تمام مکاتبِ فکر اور طبقاتِ زندگی پر زور دیا کہ وہ محرم الحرام کے دوران ملی یکجہتی، بھائی چارے، امن، رواداری اور مذہبی ہم آہنگی کا عملی مظاہرہ کریں تاکہ ضلع میں پائیدار امن و استحکام کو مزید مضبوط بنایا جا سکے۔
کمشنر داؤد خان نے کہا کہ امن و امان کے قیام اور عوام کے جان و مال کے تحفظ کے لیے سیکیورٹی فورسز اور قانون نافذ کرنے والے اداروں کی قربانیاں ناقابلِ فراموش ہیں۔ انہوں نے اس عزم کا اظہار کیا کہ ضلعی انتظامیہ، سیکیورٹی فورسز، علمائے کرام، مشرانِ علاقہ اور عوام کے باہمی تعاون سے محرم الحرام کے تمام جلوسوں اور مجالس کے پُرامن انعقاد کو یقینی بنایا جائے گا۔
اس موقع پر خطاب کرتے ہوئے ڈی آئی جی ڈیرہ ریجن غلام مبشر میکن نے کہا کہ ضلع ٹانک میں پائیدار امن کے قیام کے لیے تمام طبقات کو مشترکہ ذمہ داری کا مظاہرہ کرنا ہوگا۔ انہوں نے کہا کہ ملک دشمن عناصر کے مذموم عزائم کو ناکام بنانے اور ضلع میں امن و استحکام برقرار رکھنے کے لیے اجتماعی شعور اور باہمی تعاون ناگزیر ہے۔
جرگے سے خطاب کرنے والے علاقائی مشران نے محرم الحرام کے دوران امن و امان کے قیام، فرقہ وارانہ ہم آہنگی کے فروغ اور ضلعی انتظامیہ و سیکیورٹی فورسز کے ساتھ مکمل تعاون کی یقین دہانی کرائی۔ انہوں نے اس عزم کا اعادہ کیا کہ ضلع ٹانک کے عوام اتحاد و اتفاق کو فروغ دیتے ہوئے محرم الحرام کے پُرامن انعقاد اور دیرپا امن کے قیام کے لیے اپنا بھرپور کردار
