30/05/2026
وہاڑی// سے)
Punjab Counter Narcotics Force
کی بڑی کارروائی، تقریباً بارہ من چرس برآمد
وہاڑی میں سی این ایف نے خفیہ اطلاع پر بڑی کارروائی کرتے ہوئے ایک مشکوک گاڑی کو روک کر تلاشی لی، جس کے دوران عبدالجبار ولد حاجی محمد عارف سکنہ رانا ٹاؤن حاصل پور کے قبضے سے 25 پیکٹ چرس برآمد کر لی گئی۔ذرائع کے مطابق گرفتار ملزم سے دورانِ تفتیش مزید انکشافات سامنے آئے، جس پر سی این ایف وہاڑی اور بہاولپور کی مشترکہ ٹیم نے تھانہ جھال سیال کی حدود 58 ای بی میں واقع ایک ڈیرے پر کارروائی کی، جہاں ریاض ولد فلک شیر کے گھر سے مزید 359 پیکٹ چرس برآمد کر لی گئی۔ یوں مجموعی طور پر سینکڑوں پیکٹس پر مشتمل بھاری مقدار میں منشیات قبضے میں لے لی گئی۔ذرائع کا کہنا ہے کہ ریاض کا براہِ راست منشیات کے کاروبار سے تعلق سامنے نہیں آیا۔ ابتدائی تحقیقات کے مطابق عبدالجبار نے خود کو حاضر سروس آرمی پرسن ظاہر کرتے ہوئے ریاض سے تعلقات استوار کیے اور دوستی کا ناجائز فائدہ اٹھایا۔ بتایا جاتا ہے کہ ریاض کی غیر موجودگی میں گھر پر موجود اس کی کمسن بچی کو ملزم نے یہ کہہ کر سامان رکھوایا کہ “یہ تھوڑا سامان ہے، واپس آ کر لے جاؤں گا”، تاہم بعد ازاں معلوم ہوا کہ سامان میں منشیات موجود تھی۔ذرائع کے مطابق برآمد ہونے والی منشیات ضلع وہاڑی اور گردونواح کے مختلف منشیات فروشوں کو سپلائی کی جانی تھی، تاہم سی این ایف کی بروقت کارروائی نے بڑا نیٹ ورک بے نقاب کر دیا۔ آپریشن میں بہاولپور اور وہاڑی کی مشترکہ ٹیموں نے حصہ لیا۔اہلِ علاقہ نے سی این ایف کی کارروائی کو سراہتے ہوئے کہا کہ منشیات فروش معاشرے خصوصاً نوجوان نسل کے دشمن ہیں، اور ایسے عناصر کے خلاف سخت کارروائیاں وقت کی اہم ضرورت ہیں۔سی این ایف ترجمان کے مطابق منشیات کے خاتمے کے لیے کارروائیاں بلا امتیاز جاری رہیں گی اور معاشرے کو منشیات سے پاک بنانے کے لیے ہر ممکن اقدامات کیے جا رہے ہیں۔ ترجمان نے کہا کہ شہری مشکوک سرگرمیوں کی فوری اطلاع متعلقہ اداروں کو دیں تاکہ ایسے عناصر کے خلاف مؤثر کارروائی عمل میں لائی جا سکے۔
#وہاڑی
