08/04/2026
چونتیس 34 برس پر محیط تدریسی و انتظامی خدمات کے بعد وڈھ کی سرزمین کو خیر باد کہنا یقیناً ایک ایسا لمحہ ہے جس میں یادوں کی خوشبو بھی شامل ہے اور جدائی کی ہلکی سی اداسی بھی۔ پچیس سال بطور سبجیکٹ اسپیشلسٹ اور نو سال بطور ایجوکیشن آفیسر خدمات انجام دیتے ہوئے جو وقت وڈھ میں گزرا، وہ صرف ایک سرکاری ذمہ داری نہیں بلکہ ایک عہد، ایک امانت اور ایک مسلسل جدوجہد کی روشن داستان ہے۔ آج گریڈ 19 میں ترقی کے باعث اس سرزمین کو چھوڑنا ایک فطری مرحلہ ضرور ہے، مگر دل کے کسی گوشے میں وڈھ کی مٹی، اس کے تعلیمی ادارے، اساتذہ اور طلبہ کی یادیں ہمیشہ زندہ رہیں گی۔
ان برسوں میں جو کچھ ممکن ہو سکا، پوری دیانت، خلوص اور ذمہ داری کے ساتھ انجام دینے کی کوشش کی۔ تعلیم کے فروغ، اداروں کی بہتری، اساتذہ کی رہنمائی، طلبہ کی حوصلہ افزائی اور تعلیمی نظام کو مضبوط بنانے کے لیے ہمیشہ اپنی تمام تر توانائیاں صرف کیں۔ انسان ہونے کے ناطے کمی کوتاہی کا امکان ہمیشہ رہتا ہے، مگر نیت کی سچائی اور خدمت کے جذبے کی پاکیزگی ہی اصل سرمایہ ہوتی ہے۔ یہی اطمینان دل کو سکون دیتا ہے کہ جو کچھ کیا، وڈھ کی تعلیم اور مستقبل کے لیے کیا۔
دلی دعا ہے کہ وڈھ کی تعلیمی فضا مزید روشن ہو، سکول آباد ہوں، طلبہ کی تعداد میں اضافہ ہو، اساتذہ کا حوصلہ بلند رہے اور علم و شعور کی شمع ہر گھر تک پہنچے۔ وڈھ کی تعلیمی حالت جس طرح بہتری کی جانب گامزن تھی، اللہ کرے اس کے قدم مزید تیز ہوں اور یہ علاقہ تعلیمی ترقی اور شعور کی ایک روشن مثال بن کر ابھرے۔ وڈھ کے حالات بہتر ہوں، امن و استحکام قائم رہے اور یہاں کے نوجوان علم و ہنر کے زیور سے آراستہ ہو کر اپنے علاقے اور ملک کا نام روشن کریں۔
یہ جدائی وقتی ہے، تعلق ہمیشہ قائم رہے گا۔ زندگی نے مہلت دی تو وڈھ آنا جانا جاری رہے گا، کیونکہ جن لوگوں کے ساتھ برسوں کا رشتہ جڑ جائے وہ کبھی دل سے جدا نہیں ہوتے۔ اساتذہ، طلبہ، ساتھی افسران اور اہلِ علاقہ کی محبت اور تعاون ہمیشہ یاد رہے گا، اور یہی سرمایہ زندگی کا سب سے قیمتی اثاثہ ہے۔
اللہ تعالیٰ وڈھ کے تمام اساتذہ، طلبہ اور اہلِ علاقہ کو کامیابیوں سے نوازے، ان کی محنت میں برکت عطا فرمائے، اور اس سرزمین کو علم و آگہی کا گہوارہ بنائے۔ آپ سب سے گزارش ہے کہ ہمیں اپنی دعاؤں میں یاد رکھیں اور اس تعلیمی مشن کو اسی جذبے اور خلوص کے ساتھ آگے بڑھاتے رہیں۔
خیراندیش
طارق بلوچ
سابقہ ڈپٹی ڈسٹرکٹ آفیسر ایجوکیشن وڈھ
