06/06/2026
ژوب: سینئر سپرنٹنڈنٹ پولیس (ایس ایس پی) سید عبدالصبور کی نگرانی میں ژوب پولیس نے بلدیہ چوک میں سیاہ شیشوں اور غیر قانونی نمبر پلیٹوں کے خلاف کارروائی کے دوران متعدد گاڑیوں کے سیاہ شیچے اتار دئیے اس موقع پر ایس ایس پی سید عبدالصبور نے کہا کہ قانون کی نظر میں تمام شہری برابر ہیں اور کسی کو بھی گاڑیوں پر سیاہ شیشے لگانے یا غیر قانونی و فینسی نمبر پلیٹیں استعمال کرنے کی اجازت نہیں دی جا سکتی۔ انہوں نے واضح کیا کہ سیاہ شیشے اور غیر قانونی نمبر پلیٹیں نہ صرف قانون کی خلاف ورزی ہیں بلکہ سکیورٹی اداروں کے لیے بھی مشکلات کا باعث بنتی ہیں۔
انہوں نے شہریوں سے اپیل کی کہ وہ رضاکارانہ طور پر اپنی گاڑیوں سے سیاہ شیشے اور غیر قانونی نمبر پلیٹیں ہٹا دیں تاکہ قانونی کارروائی سے بچا جا سکے۔ ایس ایس پی نے اس عزم کا اظہار کیا کہ قانون شکن عناصر کے خلاف بلاامتیاز کارروائیاں جاری رہیں گی اور شہر میں قانون کی بالادستی ہر صورت برقرار رکھی جائے گی۔
شہریوں نے ژوب پولیس کی کارروائی کو سراہتے ہوئے اسے امن و امان کے قیام اور جرائم کی روک تھام کے لیے ایک مثبت اور بروقت اقدام قرار دیا۔ عوامی حلقوں نے پولیس کے ساتھ مکمل تعاون کی یقین دہانی کراتے ہوئے کہا کہ ایک پرامن اور محفوظ معاشرے کے قیام کے لیے ہر شہری کو اپنی ذمہ داریاں ادا کرنی چاہئیں۔
