08/02/2026
كتير مننا بيجي في نهاية السي في وبيرص لستة بأسماء مديرينه القدام وأرقام تليفوناتهم وإيميلاتهم، والهدف طبعاً إنو يوري الـ HR إنو "واثق من نفسه" وإنو علاقته مع الشغل القديم 10/10.
بس هل الحركة دي صحيحة في 2026؟ 🤔
الحقيقة الصادمة إنو وضع أرقام المراجع مباشرة في السي في يعتبر "غلطة تقنية" لعدة أسباب:
1️⃣ خصوصية الناس: إنت كدة بتنشر أرقام تليفونات مديرينك في إيميلات ومواقع تقديم ممكن أي زول يشوفها، وده تصرف غير مهني وممكن يزعلهم منك لو بدأت تجيهم مكالمات من أرقام غريبة.
2️⃣ مساحة غالية: زي ما اتفقنا، السي في لازم يكون "مختصر ومفيد". رص الأسماء والأرقام بياخد مساحة إنت أولى بيها عشان تكتب إنجازاتك.
3️⃣ التوقيت غلط: الـ HR ما حيتصل بمرجعك إلا لو فعلاً قرر يوظفك أو بعد ما تخلص المقابلة وتنجح فيها. يعني الأرقام دي ما ليها داعي في مرحلة "الفرز الأولي".
طيب الحل شنو؟ 💡
أفضل وأرقى طريقة هي إنك تمسح اللستة دي وتكتب جملة واحدة بس في نهاية السي في:
✅ (References available upon request)
✅ (المراجع متوفرة عند الطلب)
ليه الطريقة دي هي الأفضل؟
بتحفظ خصوصية مديرينك: ما بتدي رقم زول إلا لو الشركة طلبت منك رسمياً.
بتديك فرصة "تجهز" مرجعك: لما الشركة تطلب منك المراجع، إنت حتتصل بمديرك القديم وتقول ليهو: "يا بشير، في شركة كذا حيتصلوا بيك"، فبيكون هو جاهز ومستعد يشكر فيك.
نصيحة اليوم: 🌟
السي في حقك هو "طُعم" عشان تجيب بيهو المقابلة، ما "ملف تحقيق" فيهو كل تفاصيل الكون. خليك ذكي، وفر مساحتك، واحفظ خصوصية علاقاتك المهنية.
سؤال اليوم:
هل إنت من الناس الخاتين أرقام تليفونات مديرينهم في السي في؟ وهل حصل زول اتصل بيهم من غير ما يكلموك؟ شاركونا قصصكم! 👇
#السودان #السعودية
