03/08/2026
مان ڄاڻان ٿو تون ڌاري آ
مان ڄاڻان ٿو تون ڌاري آ
مونکي سنڌ جيان تون پياري آ
تنھنجي ذات جدا ھر بات جدا
فقرات جدا جذبات جدا
توکي وک وک تي مان سجدو ڪيان
اڄ مونکان پڇين ٿي پردو ڪيان
تنھنجي معصوميت جي ساک کڻان
تنھنجي ڳلڙن تان مان باک کڻان
منهنجي من م ڏاڍي اوندهه آ
۽ دل جو سيڻ انڌيرو آ
مونکي پڪ نه هئي امڪان هيو
تنھنجو جلدي ٿي امتحان ويو
تون ھاڻي جو ڪاليج ڇڏيو
مان سمجهان ٿو نڪرڻ به ڇڏيو
۽ صبح جي ساڳي رستي تان
گذرڻ به ڇڏيو مرڪڻ به ڇڏيو
ڏس توسان ھاڻ ڪيئن ملان
ڪٿي بيھان توکي ڪيئن ڏسان
خط تحفا گفٽون ڪيئن ڏيان
جيئن دل کي وھم وڪوڙي ويا
ڄڻ ڳوٺ کي فوجي گھيري ويا
مون تي نظرن جو آ ڪرفيو لڳل
ھر راھ رڪيل گھٽ گھير جھليل
تنھنجو گھر به ڏٺل رستو به ڏٺل
پر ظالم قاتل رسمن جا
ھر پاسي آھن نانگ لڪيل
ان لاءِ نٿو توڏانھن اچان
ٿو ايندي ويندي واپس ٿيان
۽ دل ۾ ٿو ويچار ڪريان
مان توکان ھڪڙي ڳالھ پڇان
ڇو ھاڻي نٿي ڪاليج وڃي
ڇو سرتين کان ٿي ڏور رھين
تن ساڻ ته مل تن ساڻ ته کل
ھل ٿورو ھل ھل ٿورو ھل
منھنجي روح جي راھ کان ٿورو ھل
منھنجي اکڙين کان ٿي نه اوجھل
پنھنجي پرس ٿورو کولي ڏس
۽ منھنجي دل کي ڳولي ڏس
جا تو وٽ ھاڻ امانت آ
منھنجي پيار جي توکي پارت آ
مونکي اڳ ۾ اھڙي ڄاڻ نه ھئي
تون مونکان ويندين ايئن کسي
جيئن حق سمورا ڌرتيء جا
جيئن دھشتگرد ڪراچيءَ کي
ٿا سنڌ سڄيءَ کان ڌار گھرون
ھر ريتن جا رکوال سڀئي
ٿا توکي مونکان ايئن ڇڃن
ھن پيار جي دشمن دنيا ۾
سڀ عادل ٿيا انصاف نه ٿيو
ھڪ پيار جو ڏک معاف نه ٿيو
پوء توکي مونکان ڌار ڪيئون
جيئن ڪنھن ٽاريءَ مان ڪو گل ڇڻيو
پر توسان جيڪو رشتو آ
سو رشتو ايئن نه ٽٽڻو آ
تون منھنجي آ تون منھنجي آ
مان ڄاڻان ٿو تون ڌاري آ تون ڌاري آ
پر سنڌ جيان مونکي پياري آ
