https://www.facebook.com/113286965057325/

محمد الأمين Mohamed AL-Amin, Al Khartum Bahri (2025)

04/11/2025

في فترة الكم سنة الفاتو و لحدي اليوم

من اكتر الحاجات بديت اقتنع بيها

قيمة التجارب

ما قصدي بس التجربة الأولى
تكرار التجربة و المحاولة بطرق اكثر

برغم خيبة الأمل في المحاولة..

اتعلمت انه لما يخيب املك.. او تلاقي الطريق
مغلق
او الحاجة دي ما زي ما كنت متوقعها

الرسالة بسيطة..

هنا التجربة بتقول ليك:
دي ما الطريقة الصح.. حاول بطريقة تانية

و فعلا الأمور بتظبك.. و بتحقق المراد في الآخر
و بتوصل..

وكتها بتشوف الحكمة من معاناة الطريق

فالتجارب ما قصدها تخلينا نشعر بالألم..
قصدها تعلمنا... توجهنا

التجربة «ناصح أمين»
افضل معلم تقدر تعتمد عليه

بشرط «ما تتخلى عن معلمك»

التوجيه ممكن يكون مؤلم قاسي..صادم
مخيب للآمال..

بس صادق.. بيعلم بيوصل للغاية

29/10/2025

في غرب بلدنا، مدينة بتصارع المـ. ـوت بعيون مفتوحة...ما عارفة تنوم

أم الأطفال الراجين كسرة عيش، والأمهات الداعيات في نص الليل.

مدينة حالها بكى الحجر... لا أكل، لا دوا، لا أمان... بس رعب، جوع، وحصار.

منظمات النفاق الدولية ساكتة بتشاهد... كأنو الحصار دا مشهد في فيلم .

ربك رب الكون،حكمتو قضت
إنو مافي وضع بيتغير إلا بـ "سبب".

ما كفاية نعاين و نحس إننا موجوعين...

لو الألم ما خلّى الزول يتحرك، يبقى وجعنا حيبقى حسرات علينا

النبي ﷺ اتحاصر 3 سنين...
كان ممنوع أي زول يوصله بطعام أو شراب
او يقرّب منّو ساي

لكن كان في ناس، قلبهم صاحي، إنسانيتهم حية...
كانوا بيسربوا ليهو الأكل في الخفاء، برغم الخطر

الناس ديل بقو واحد من اسباب انه فضل عايش المدة دي كلها .. لحدي ما جاهو الفرج

واليوم، الفاشر بتحكي نفس القصة، الاتكررت كتير في التاريخ

و الحصل في غـۯّة و اهلها.. ما علينا ببعيد

يمكن اليوم بس تكون كلمتك ، بوستك، أو دعوة صادقة في الخفاء

هي "السبب" البتفتح باب الفرج بإذن الله.

رب الأسباب ما بنسى عباده...

لاكن قضت حكمته انه
اي حاجة بتحصل بي الأسباب
و ما بتزول الا بي الأسباب

و بين دا و داك يوجد الابتلاء..

منطق منطق كدا يا جماعة
الليلة لمّا الناس تستغيث بالمنظمات..
على يقين تام انه المنظمات دي عندها الامكانيات
و ممكن تتدخل في اي لحظة و تنهي المأسـ.ااة

اذا قِدِرْنا نوقن نفس اليقين في رب المنظمات..و رب الإمكانيات الغير محدودة

امره بين الكاف و النون..

و وجّهنا نداءات الإغاثة الى مكانها الصح.. بالنوايا الصادقة

حيجي الفرج اسرع و اقوى..

دا ما معناتا اننا ما نضغط على المجتمع الدولى.. لانه دا حق انساني مستحق
بحسب المواثيق الدولية

و التنازل عن الحقوق ضعف

اعمل كل البتقدرو وصّل صوتك..

الناس الجوّا الحصار
نحن عايشين معاناتهم من خلال الميديا..بالشايفنو و السامعنو

لاكن ابدا الزول اليدّو في الموية ما زي اليدو في النار

ابسط عون نقدّمو ليهم ما بيكلفنا شي.. مقارنة بمعاناتهم

يا زول بس اعمل اي حاجة.. شير.. ادعو الناس.. انشر هاشتاقات
شجع الناس تتحرك

المهم ما تسكت عن الحاصل

26/07/2025

الزبون وراه خرتمية زبون!!

عندي صحبي قبل 7سنوات كدا كان عندنا برنامج ثابت.. يومي اخر اليوم بالمسا عندنا قعدة جبنة هادية كدا

بنتناقش في اي حاجة..الفلسفة..مقارنة الأديان.. الأساطير.. السياسة.. علم النفس.. البيزنس..ترندات..العاب.. مسلسلات.. اي شي يخطر على بالك

هو بيهتم اكتر بالمعرفة العامة.. عكسي انا بهتم بالمعرفة المتخصصة

صحبي دا نوع شخصيته حسب "علم النفس التحليلي" Jungian Psychology
عنده وظيفة الحدس الخارجي بيستخدمها بشكل أساسي يعني هو Ne User

و انا شخصيتي عكسه بستخدم الحدس الداخلي بشكل اساسي، يعني انا Ni User

و كدا في الهندسة الإجتماعية عندنا توافق 100%

مثلاً انا بالNi بقدر اشوف امكانياتي.. نقاط ضعفي..نقاط قوتي..انسب حاجة لي.. و المسار المستقبلي بتاعي.. رسالتي

هو العكس بالNe بتاعته حيقدر يشوف امكانيات الناس و مستقبلهم و افضل مسار بالنسبة ليهم و الخيارات اللي بتديهم فرص و امكانيات اكبر

المهم يا معلم في يوم كدا فكرت استفيد من الحاجة دي...
فقلت ليه ياخ ما تقترح لي كتاب انت شايف انه ممكن يفرق معاي

و ما اديته تفاصيل كتيرة.. طبعاً انا نيتي ما كنت داير الكتاب..
داير اشوف الNe بتاعته كيف حتعمل Data Processing

فكنت منتظر النتيجة...

بعد كم يوم كدا جاني بي لستة من خمسة كتب و معاهم كتاب نسخة ورقية

اسم الكتاب
"كيف تبيع أي شئ لأي شخص" ستيفن جيرارد

في الوكت داك انا قريت الكتاب الورقي و باقي الكتب طبعا.. مع الأيام و تجاربي مع الزباين.. قدرت اعرف قوة الحدس الخارجيNe

الكتاب دا فيهو حاجات كتيرة ظابطة بس في حاجة واحدة غيرت منظوري.. ركزت معاها وطورتها.. و خليتها عادة

بقيت اي زبون بجيني ما بكون شايفو كفرد واحد.. بكون شايفه زبون وراه كوتة من الزباين

دا مفهوم جيرارد انه الزبون الواحد.. وراه 250 زبون

سمعت بي قصت الإعرابي.. - النبي صلى الله عليه و سلم- اداه مراح كامل من الغنم

فالزول دا مشى لي قبيلتو قال ليهم : "محمد يعطي عطاء من لا يخشى الفقر"

فالقبيلة كلها جات للنبي و أسلمت

فدي الفكرة.. اذا قدرت ارضي شخص واحد.. حيمشي يتكلم بيك لتلاتة اربع اشخاص

طبعاً حيجو يجرّبو.. و اذا ارضيتهم.. اي واحد فيهم ممكن يكلم 3 تانين.. و ال3 حيكلمو غيرهم

انت قادر تتصور المضاعفات... بس بسبب اني ظبطت لزول واحد امورو و خليته متكيف.. كدا حيجو لي من وراه بالميت كدا 50 نفر

الخلاصة :

انا شاركت معاك القصة دي عشان اوصّل كم رسالة كدا

1-يا مان الجونغيان سيكولوجي دا حاجة خرافية في التواصل.. مع نفسك و مع الناس

2-الزبون البجينا دا ما زول براه زي ما شايفنو قدامنا كدا.. كان عاينت للقبيلة الوراه ،الموضوع حيفرق

3-صحبك اللي فاهمو و فاهمك دا كنز ابقا عليه عشرة

24/07/2025

زولك المهتم بالجودة!!

كيف تكسب الزول دا

النوع دا من العملا يمكن بيهتم بجودة منتجك بشكل اساسي... بس عنده اهتمامات تانية خفية

المعلومات دي عن تجربة شخصة و خبرة في التعامل مع العملا على ارض الواقع
و كمان تحليل شخصية دقيق بواسطة "الجونغيان سيكولوجي"

عشان تكسب عميل الجودة

اول حاجة انت لازم تمتلك الجودة حرفياً.. ما حتعرف تمثّل الحاجة دي.. ممكن تعمل عرض قوي يجذبو و يجيك.. بس حيعرف سريع انت هل فعلاً زول جودة ولا فيك Fake مزيف ساي!!

الحاجة التانية العميل دا بيهتم بالموثوقية.. و هل انت عندك مبادئ و معايير ملتزم بيها

الحاجة التالتة بيهتم بي مكانتك وين.. و انت منو بين منافسينك.. فكل ما بقيت الأفضل و اقوى المنافسين ،الزول دا حيختارك

الحاجة الرابعة حاجة خفية شديد في شخصيته.. الزول دا عندو شعور عالى بالإستحقاق و كونو بيستاهل افضل حاجة بغض النظر عن اي حاجة تانية

الحاجة الخامسة زي ما هو قدّر مكانتك و اختارك.. فهو شايف نفسه شخص استثنائي انت لازم تتعامل معاه بطريقة مختلفة عن زباينك التانيين..

ما تقول ليه مسميات زي زبون عميل.. ناديه بي اسمه و ما تزيل الكلفة.. لو دكتور قول ليه يا دكتور.. يا باشمهندس.. يا سعادة.. يا استاذ

الحاجة السادسة

لازم تعرف انه النوع دا من العملا مريح شديد.. نادر يدخل معاك في جدال و تفاوض في السعر.. فهو حيدفع طوالي عشان عارف سعرك بيستاهل.. دا تمن الجودة اللي حيحصل عليها

انت عملت جودة فسعرك لازم يكون غالى.. ماف حاجة اسمها جودة و سعر رخيص
يابا الغالي بي غلاتو

انت رايك شنو في النوع دا من الزباين؟؟ شاركنا نظرتك ليه في التعليقات

يمكن الأغلب حيكون عندهم مشكلة في عملية ال Typeing
او كيف تقدر تعرف نوع شخصية الزول اللي قدامك!!

تابع الصفحة حتلاقي المزيد من النوع دا من المحتوى

23/07/2025

في شباب نار جوّاهم، لكن عالقين في الخوف.. والباقين تعبتهم اللعبة.. ما قدروا يواصلو..

لسه مخبي طموحك ورا أحلامك القديمة؟ الظروف خلتك تستسلم.. ولا صامد؟

الطموح ما بس حلم.. دا شعور جوّا بيقول ليك: "أنا أستحق أكتر"

اسأل نفسك: هل عايش الحياة اللي تستحقها.. او قاعد تكافح عشانها؟
ولا بس بتصنع الوهم يوم ورا يوم؟

حقيقي لو ما دخلت اللعبة صح، حتبقى قاعد تتفرج و في الآخر تندب حظك.

انا شايف قدر شنو الموضوع ما سهل!!

في كل الأحوال حرفياً "الألم" موجود

اللي بيفرق هو الإختيار

إما نختار ألم كوننا قاعدين و ما عملنا اي حاجة.. ولا ألم كوننا بنتحرّك و نتخذ قرارات جريئة... عشان نعمل حاجة تستحق.. حاجة بتشبه تطلعاتنا

هل دا وقتك تعيش حلمك من جديد.. ولا حتكون من الضايعين في الزحمة؟؟

كدا فكّر فيها!!

و بس كدا يا معلم..

شوف المنشورات السابقة

كان لقيت المحتوى ظابط معاك.. طوالي اعمل متابعة

يلا قدااام 🔥

22/07/2025

التسويق كإعلام تجاري Business communication

كونك تسوّق و تعلن ما معناتا بس تعمل حملات تسويقية

لا دا حاجات كتييرة

يا بتاع التسويق… إنت زول إعلامي ولا ماسك مايك ساكت؟
ولا قايلا بس لعبة بوستات بتنشر وراها إعلانات؟!

التسويق ما لافتة معلقة في محل ولا إعلان في صفحة عامل فيها “يلا اشتروا!

الماركتنج دا إعلام رسمي بيشتغل بصمت…
في العبوة
في السعر
في الزول الببيع
و حتى الابتسامة في وشو!

زمان قالوا:
"الناس بتسمع و بتشوف منك قبل ما تشتري"

دي ما قالوها ساي… حرفياً دا العلم البتسوّق بيهو للعقول و الإحساس و الشعور، قبل الجيوب.

الماركتير الشاطر ما شغلو البوست الحار بس!

هو الزول البيراقب تفاصيل بيزنسو من كل الزوايا و المناظير و الأبعاد

كل بعد ولا منظور ممكن يكون رسالة تسويقية كان سلبية ولا ايجابية

- رف المنتج دا… نظيف؟ منظم؟بجذب العين؟

- الزول الببيع… بشوش؟ ولّ مكشر زي صحن العدس؟

-بعرف يتكلم مع الزباين ولا بيشلف من طرف؟

- العبوة زاتا؟ بتقول “أنا منتج ظابط شوفني” ولا “خجلانة ما تعاينو لي”؟

دي كلها رسائل غير منطوقة، لكن بتتكلم أقوى من ألف إعلان!

كدا تعال يا زولي فكر معاي!!

على سبيل الإفتراض يعني
لو خدمتك ولا منتجك دا بيتكلم… كان حيقول شنو للزباين؟ و حيقولا ليهم كيف؟؟

-عاينو يا زباين انا الأفضل.. ولا عاينو انا ردئ؟؟

-عاينو انا معروض كويس.. ولا عاينو انا مبشتن كيف!؟

-عاينو انا الجماهير بتحبني.. ولا عاينو الناس سافهني!؟

-عاينو انا عندي مدير مهتم بي بطورني و بحل مشاكلي.. ولا عاينو انا زي ما انا من سنة دُو.

الرسالة شنو يا مككنة؟؟

ابقى زول/زولة الجماهير

افهم الناس دي… احترم ذوقهم.. خاطبهم بكل السبل
سمعي بصري حدسي حسي فكري شعوري.. ارضي جوي اثيري

خلي منتجك يتكلم بالراندوك الخفي.. و لغة الإيحاء

"لا كلام اتقال لا اتسمع.. إنها مجرد إشارات ليس إلّا.. تفعل مفعول السحر"

انا محمد الأمين المحتوى بتاعي عن «الماركتينج».. «ادارة صفحات السوشيالميديا»..«علم النفس التحليلي»

شوف المنشورات السابقة

كان لقيت المحتوى ظابط معاك.. طوالي اعمل متابعة.. و اتفاعل عشان اقدر أصلك بالشغل الخام

يلا قدااام 🔥

20/07/2025

لعبة المنافسة!!!

انت عندك بيزنس ولا بتقدم خدمة، المنافسة ما لعبة سهله

يا إنت قدرها تقدر تتصدر، ولا تبقى ازبير في الدكة !

المنافسين!!؟
لو ما عارف عنهم كل صغيرة وكبيرة،كدا زي أعمى في نص السوق.

70% من الأعمال و المشاريع بتفشل لأنها ما بتعرف منافسينها؟

واللي بينجحوا، بيستخدموا أدوات تحليل المنافسة عشان يعرفوا كل خطوة بيعملوها.

المنافسين ديل كنز.. ممكن نتعلّم منهم كتيير..اساليبهم..استراتيجياتهم.. ميزاتهم التنافسية

عايز تكسب؟؟
الشركات الكبيرة بتصرف ملايين على أبحاث السوق والمنافسين عشان تسبق المنافسة

لكن إنت؟ ممكن تبدأ بأدوات مجانية بسيطة، تحلل محتوى المنافسين، تعرف أسرارهم.. نقاط قوتهم و نقاط ضعفهم

تصوّر يا صحبي كمية الفرص اللي حتفوتك لو ما ركزت هنا!!

من هسة ابدأ تابع منافسينك، استخدم أدوات عشان تعرف اتجاهاتهم
وتتعلم من نجاحاتهم وأخطائهم

المنافسة اليوم ما للضعاف، اشتغل بذكاء..اعمل اللازم..أصنع فرصك.. أكسب السوق قبل ما السوق يكسبك!

اذا النوع دا من المحتوى مفيد ليك بشكل او بآخر اعمل متابعة

انا محمد الأمين بعمل محتوى في الماركتينج و الجونغياو سيكولوجي.. شوف المنشورات السابقة.
اذا النوع دا من المحتوى ظابط معاك اعمل متابعة طوالي.. و اتفاعل عشان تدعم المحتوى و اي حاجة جديدة تظهر ليك

19/07/2025

قبل كم سنة كدا كنت مسؤول عن ادارة نادي مشاهدة

التجربة دي قدمت لي حاجة ظابطة شديد الزمن داك

شفت بي عيني.. ما قالوا لي
قدر شنو الجماهير اهتماماتهم مختلفة بحسب شخصياتهم..َ برمجتهم و توجهم

الزمن داك كنت اتقدمت شوية في فهم الجونغيان سايكولوجي

فبديت ادمجه مع سيكولوجية الجماهير. عبر الملاحظة.. الربط.. التحليل..المقارنة..الإستنتاج

المهم يا حبيبنا
كان في النادي عندي ست شاشات كل شاشة كنت بشغّل نوع محتوى مختلف

زي مثلاً شاشة لناس الكورة و شاشة الأفلام و.. الأفلام الوثائقية.. الأخبار.. المسلسلات

فكنت براقب سلوك الجمهور.. الحاجة الكنت مندهش منها في ناس بتجي لشاشة معينة و بتكون ما عندها ادنى اهتمام باي شاشة تانية

الزول دا متبرمج على النوع دا بس من المحتوى.. او بكلمات تانية الشبكة بتاعته ما بتستقبل غير النوع دا من الإشارة

اها مرة كدا جاتني فكرة قلت كدا اجسها .. جاني واحد من زبايني عارفه بتاع شاشة المسلسلات.. جبتها ليه في شكل هظار كدا قلت لي الليلة ما تشوف الأخبار شوية قال لي اخبار شنو عليك الله ديل ما عندهم موضوع قادننا.. كضابين ساي

بعد شوية جاني زبون تاني بتاع اخبار.. قلت ليه يا معلم ما جرب احضر ليك مسلسل قال لي كلام فارغ و ضياع زمن ساي.. هسة المسلسلات استفيد منها شنو
و مشا طوالي لي اخبارو و داك قعد يحضر مسلسلو

و انا بديت افهم الدرس من الزمن داك.. اهم درس في التسويق

يعني شنو جمهور مستهدف.. و جمهور ما جمهورك دا ولا تتعب تستهدفو.. زي المثل الشهير ما تبيع المشط للأصلع

عشان كدا لمن نعمل حملة تسويقية.. بنستهدف العملاء المحتملين. يعني أنا بكسب وكتي و جهدي و مالي و ما بعلن أو أروّج إلا لي ناس أنا شايف احتمالية إنهم ممكن يكونو مهتمين بي منتجي ولا خدمتي

و بس كدا..

انا محمد الأمين بعمل محتوى في الماركتينج و الجونغياو سيكولوجي.. ادخل شوف بوستاتي.
اذا النوع دا من المحتوى ظابط معاك اعمل متابعة طوالي

18/07/2025

لو حنربط الشطرنج بالماركتينج.. الموضوع حيكون كيف؟؟

في اخر البوست عملت ليك استراتيجية «فولجاM3»

يا زووول شغل من مستوى«زينتوس غامبيت»

لاكن كدا الأول خلينا نشوف الربط حيكون كيف!

الملك
ده العلامة التجارية، و لازم نحميه !

الوزير
دا المحتوى التسويقي
يتحرك بحرية في كل القنوات و المنصات، يعزز التفاعل مع العملاء!

القلعة
دا الموقع الإلكتروني.. البنية التحتية الرقمية اللي بتدعم العمليات التجارية.. و حماية للملك

الفارس
ده الإعلانات، بصل لجمهور واسع بطرق غير متوقعة!

البيشوب
ده تحليل البيانات، يربط النقاط بين البيانات و يحللها.. يصل لإستنتاجات لاتخاذ قرارات مدروسة!

الجندي
ده العميل، يتحرك قدمًا في رحلته من الاكتشاف إلى الشراء الى الولاء

اهم رابط مشترك بين الشطرنج و الماركتينج.. انه محتاجين نخطط و نكون استراتيجيين.. و نلعب الجيم مع المنافسين

عندنا بداية اللعبة.. وسط اللعبة.. ولازم نعمل كش ملك

وصلنا للجزو الممتع.. استراتيجية "فولجاM3"

دي زي مناورة نابليون

حنقدّم الوزير"المحتوى" بيتحرك للأمام، و القلعة"الداتابيز" بتدعم الموقع و بتحمي الملك، و الفارس"الإعلانات" بيقفز فوق المنافسين

و الجنود"العملاء" بيتحركو قدمًا، و الأسقف"المحلل" بيحلل البيانات، و الملك"البراند" بيكون في أمان

بي نفس الفهم كدا حاول تخترع لينا استراتيجية..

في الماركتينج هل ممكن نطبق دفاعات ولا افتتاحيات مشهورة زي Queen's Gambit هجوم الملكة، عشان نستلم الوسط و يكون عندنا مساحة في السوق و نكون مسيطرين!؟؟

شاركنا افكارك في التعليقات
و تابع الصفحة.. عشان اقدر اصل ليك بالمحتوى القادم

16/07/2025

السواد الأعظم من مستخدمين فيسبوك عمل حساب ختاصورة كتب اسَمه بدا ينشر عشوائي.. شايف كدا خلاص

لاكن كدا شوف الفرق بين دا و بين
الحساب الإحترافي

حسابك دا واجهه ليك لازم يكون محترف منظم

كيف نخلي حسابنا احترافي؟؟

عندنا خمسة مراحل ارح شوف انت في ياتو مرحلة!؟؟

الخطوة الأولى :
الإسم بتاعك خليهو رسمي
ناس [هينو و DX و الأسطورة و نقطة ضو.. ] ديل ما معانا
اكتب اسمك عدييل ولا اسم شركتك..

الخطوة التانية :
خت لينا صورة بروفايل واضحة و جودتها كويسة و تكون مناسبة تعبّر عن شخصيتك ولا البيزنس بتاعك
نوع [العندو صورة عاجباه.. متصور راقد في سريرو ولا اتصور في مراية الحمام] دي خليها للإستوري بتاع وتساب

الخطوة التالتة:
ظبط الوصف القصير "البايو"

الشي دا ما معلقة.. يعجبك اخينا الماليه شعر و زخارف و قلوب و تاج راسكم و مدمركم..

يااا حبيبنا..

البايو هدفه تعريف الناس بيك ولا علامتك التجارية.. و برضو الخوارزميات بتستخدمه عشان تنشر صفحتك لجمهورك الصح

خليه قصير مختصر واضح مفهوم
خت فيه اهم المعلومات عن وظيفتك ولا نشاطك التجاري او انت بتعمل شنو

الخطوة الرابعة:
البوست المثبت يا مان

تعال نشوف الجمهور بفكر كيف.. اول ما دخل حسابك اول شي عاين لي صورتك.. لمح اسمك.. قرا البايو بتاعك

بالبلدي كدا دا زول داخل ليك الشمار كاتلو داير يعرفك انت منو و عندك شنو

طوالي بعدها بجي نازل يشوف محتواك حيلاقي في وشو اول بوست "البوست المثبت"
دا أهم بوست يا ريت تخلي زول محترف يكتبو ليك ولا حاول تقلد

البوست دا حتبداه بالتعريف عن نفسك ولا خدمتك
ضيف المعلومات المهمة اللي بيهتم بيها جمهورك المستهدف
ضيف معلومات تعكس هويتك ولا هوية البراند بتاعك
ضيف مهاراتك و خبراتك و كمان خدماتك اللي بتقدمها للجَمهور
ضيف وسائل الإتصال بيك.. ارقامك ولا بريدك
ضيف صورة حضرانة تجذب من اول نظرة

الخطوة الخامسة:

من هنا الشغل الجد ببدا.. دي مرحلة صناعة المحتوى
في الخطوة دي تركيزك حيكون على انك تعمل خطة للمحتوى تحقق اهدافك
على حسب نوع هدفك... زيادة متابعين.. زيادة وصول.. تفاعل..مبيعات

و بس كدا..ما تنسى تابع الصفحة

14/07/2025

حنكك سنين..جيب لينا الزول و اقنعو!!

كدا قبل اي حاجة.. اسأل نفسك
ذكاءك العاطفي وضعو شنو؟

ولا لسه بتتعامل مع الزبون كأنو طلبية في تطبيق؟

إنت سويت اي حاجة صح…بيرفكت في محلها

حملة إعلانية، محتوى مرتّب، تصميم يشهي الزول
الزبون شافك واختارك

لكن… بعد دا طار.. و ما رجع طلب خدمتك تاني!

ليه.. السبب شنو؟

لأنك ما ارضيت "المود" بتاعه !

الزباين ما روبوتات.. كل زبون ليه شخصية و مزاج و نمط تفاعل

في البند بتاع "خدمة العملا" لازم يكون عندك وعي مسبق بأنواع الزباين اللي حتتعامل معاهم

- الزبون المتوتر عايز كلمات باردة و قوية في نفس الوقت.. تديه ريأكشنات زول هادئ.. نفسياً كدا حتعمل حاجة زي التباين. هو حيلاحظ التوتر بتاعه مقارنة بالهدوء بتاعك.. فحيحاول يهدا

- المتحمس دا تجاريه في حماسه...نحن اصلا النوع دا من العملا بنفتش ليه.. دا ممكن يروّج و يعلن ليك..لأنه كدا هو حاسس بالدوبامين.. الإحساس دا بيظهر لما نحصل على مكافأة.. فالناس لو شافته بتكلم بحماس عن منتج فكدا دي اسمها "الشرارة" اللي بتخلي الزول عنده رغبة مشتعلة يحصل على المكافأة

- العاطفي محتاج شوية دفء و مودة كدا.. اتفاعل مع الكيميا اللي هو عايشها و وجهها خليها ترتبط بمنتجك ولا خدمتك.. و في نفس الوكت كدا انت حتريحه شديد عشان نادر في الزمن دا تلاقي زول يشبع احتياج عاطفي.. الناس حاسة "ماف زول فاضي لي زول"
الزبون اثناء ما بشتري منك عادي ممكن تلقاه بدا يحكي ليك كيف ناس الدنيا مطلعين زيته!! فانت اسمع ليه وانصت
>>هو حيجي تاني يشتري منك.. 40% عشان محتاج للمنتج.. 60% عشان مرتاح ليك

-الزبون المتشكك
دايرك تكون منطقي مُقنع...هو اصلاً في اللاوعي بتاعه عنده خلفية انه الناس غشاشين محتالين متلاعبين كذابين.. فانت عشان تريحو لازم تقنعه منطقياً بأدلة ملموسة انه خدمتك بريئة من كل البلاوي الفي راسو دي
>>دا كان بدا يشكّر ليك منتجك.. كدا انت في السليم.. الراندوك قرا

-الزبون المتعجرف
دايرك تكون واثق من نفسك.. دا زول هو اصلاً شايفك اقل منّو.. لأنك انت المحتاج ليه و لي قروشو..فحيجيك بي دخلة يقلل من شانك ولا يهددك بالمنافسين و كيف عندهم خدمات احسن منك
فلازم تعمل معادلة تتكلم بي ثقة و تمارس "فن الإيحاء"..
توصل ليه رسالة غير مباشرة " انا بقدم ليك خدمة اكبر من قروشك" "نحن شركا زي ما انا بستفيد انت بردو بتستفيد"
بإيحاء خفي و بي حذر "كان ما اشتريت مننا في ألف من يشتري"
>>كان حسيته بدا يحترمك، كدا شريحتك قرت.. و حيجيك راجع

يا جماعة إيحاء يعني ما حتقول الحاجة بشكل مباشر.. انت فاهمني صح

المشكلة كل واحد من الناس دي بجيك بي مود…
وإنت تقابلهم بنفس المكنة الباردة المصدية؟!
"مرحب استاذ.. كيف اقدر اخدمك.. داير شنو.. سعروا كدا.. دي اخر حاجة"

لمن تعامل الزبون بمود غير موده
كدا زي جاك في بيتكم طردتو!

فيااا اخونا البيزنس مان العظيم…
لو ما عايز زباينك يمشوا لي غيرك

اعمل سيستم بتاع خدمة عملا يراعي الحاجة دي.. لو بنفسك ولا كان عندك تيم

شوية شوية اتعلم تتعامل معاهم بذكاء عاطفي. ممكن ما تظبط معاك في البدايات

و كدا كدا عندك فرصة تستفيد من التجربة.. قول: "شكراً على الدرس… وراني غلطتي وين؟"

ده الفرق بين التاجر… وبتاع التسويق الفاهم المستعد يحسّن من نفسه و يطور مهاراته!

اخر شي

مصطلح ذكاء عاطفي ما بالضرورة تفهم مشاعر فقط.. مرتبط اكتر بإنك يكون عندك وعي ب"الحالة" عموماً.. حالة الزول.. مزاجه.. شخصيته.. موده المفضّل

حمدلله على السلامة

تابع الصفحة.. في الأيام الجاية حينزل محتوى عن الجونغيان سيكولجي و كيف نقدر نستفيد منه في الماركتينج

07/06/2025

مرحب حبابك عزيزي الزاير في صفحتي..انا محمد الأمين

رحلتي من لوحة رسم… لصناعة محتوى يخاطب الجماهير 🎯

القصة بدت معاي بحب بسيط للرسم وكمبيوتر كنت دايمًا أصلحو و احل مشاكلو

بعدها عملت مدونة تقنية كنت بشرح فيها حلول مشاكل الكمبيوتر

بعد فترة..
دخلت مجال التصميم واشتغلت في الشعارات والبراندات

و في نفس الوكت..
على السوشيال ميديا كنت بكتب بوستات عن التقنية والصحة النفسية.

في الإجازات و لحدي وقت قريب اشتغلت توزيع منتجات على اصحاب المحلات

كانت وسيلتي الوحيدة عشان اقنع زبايني بي منتجي هي التواصل المباشر

من فترة بديت اهتم بعلم نفس العمق«مدرسة كارل يونج».. و تحديدا مكونات الشخصية.. الشادو.. الوعي.. اللاوعي..الماسك و غيرا

الحاجة دي خلتني ما افهم حاجات عن نفسي بس.. كمان الجمهور اللي كنت بتعامل معاه

لقيت نفسي ماشي كويس في الإتجاه دا، طوالي اتحول اهتمامي بمجال «التسويق الرقمي عبر السوشيال ميديا»

بعدها اخدت قرار اني اتخصص في «صناعة المحتوى» و «إدارة صفحات السوشال ميديا»

بالمختصر كدا يعني انا شغلي «الجمهور» ثم الجمهور

مثلاً انت داير ليك جمهور مهتم بالحاجة الفلانية.. انا شغلي اصنع ليك محتوى و خطة و استراتيجية
>> تجيب ليك الجمهور دا
>> و اخليه يتفاعل معاك.
>>و يتخذ قرار طلب خدمتك ولا منتجك
>> و يبقى ليك عميل دايم

كل خبراتي في التصميم، التقنية، التسويق، التواصل مع الناس و علم النفس

شكلت اساس اني اكون قادر اقدّم الخدمات دي

طيب انا خدماتي دي بقدما لي منو؟؟

1. زول عنده مهنة، مدرّس.. مهندس..رياضي..طبيب..>>محتاج يعمل براند شخصي.. يقدم محتوى في مجاله يجذب جمهور مهتم

2. زول عنده مشروع صغير ولا متوسط داير محتوى يجيب ليه جمهور يتابعه.. يشتري منتجه..جمهور وفي يَكِنْ ليه الولاء

3.شركة ولا مؤسسة دايرة زول يصنع محتوى ولا يدير سوشيال ميديا.. يظبط ليها موضوع المحتوى و خطط و استراتيجيات نشر المحتوى.. و الحملات التسويقية

4.وكالة تسويق دايرة Containt Maker او Graphic designer أو social media specialist

طيب تمام.. خدماتي الأنا بقدمها شنو؟؟

1- خدمة انشاء صفحات سوشيال ميديا احترافية مع تصميم صور الغلاف+البروفايل

2-خدمة كتابة المحتوى

3-خدمة تصميم البوسترات و تصاميم السوشيال ميديا و الصور المصغّرة

4-خدمة إدارة الصفحات

5-خدمة تقديم إستشارة
>>استشارة بخصوص المحتوى و الجمهور المستهدف
>>إستشارة في علم النفس التحليليJungian Psychology

شوف منشوراتي على الصفحة و الطريقة اللي بشتغل بيها.. و اعمل متابعة

يمكن تلاقي هنا حكايتك الجاية ✨

اذا راغب تبدا مع واحدة من الخدمات دي

و جاهز نبدا الرحلة

اتواصل على الأرقام دي
للحجز او الإستفسار:

هاتف/وتساب📞: 0929800002 | 0902062604

محمد الأمين Mohamed AL-Amin

04/11/2025

29/10/2025

26/07/2025

24/07/2025

23/07/2025

22/07/2025

20/07/2025

19/07/2025

18/07/2025

16/07/2025

14/07/2025

07/06/2025

Address

Website

Alerts

Shortcuts

Share

Category