https://www.facebook.com/171831826003010/

يافطة Yafta, Khartoum (2025)

11/03/2024

تهنئكم يافطة بمناسبة حلول شهر رمضان المبارك
أهله الله عليكم بالأمن والإيمان
وتقبل الله منا ومنكم صالح الأعمال

وكل عام وأنتم بخير

21/12/2023

إذا إنت كاتب محتوى أو حتى هاوي للمجال ، حتكون سمعت عن مصطلح بيذكر كتير في إعلانات الوظائف وهو خبير ال (السيو) .

ماهو السيو ؟ وشنو أهميته لصاحب العمل عشان يطلبه منك ككاتب محتوى ؟

● ال SEO ، Search engine optimization
وبالعربي تحسين محركات البحث ، هو تحسين وتعديل محركات البحث ، والهدف منه تغيير ترتيب الصفحات الإلكترونية على نتائج البحث.

يعني لمن تفتح قوقل وتكتب فيه أي كلمة وتضغط بحث ، ال سيو هو البتحكم في إظهار ترتيب الصفحات في النتائج.
يعني بالسيو ممكن إنك تظهر في أول صفحة نتائج البحث ، و ممكن برضو إنك تظهر في آخر صفحات ، أو ما تظهر حتى! 🤷🏽‍♀️

● الشركات اليوم بتدي إهتمام كبير لموضوع السيو دا ، وبتشترط على كاتب المُحتوى خِبرة لا بأس بها في الموضوع دا ، بل وفي بعض الشركات بتوظف خبير تحسين محركات البحث بجانب كاتب المحتوى .

● طيب لي الإهتمام الكبير دا ب الSEO ؟!

･أولاً : حتظهر لعملاءك أثناء بحثهم عن أي كلمة بتتعلق بمنتجك أو خدمتك البتقدمها ، ودي فرصة ممتازة جداً للتعريف بمنتجاتك ، وزيادة المبيعات👏.

･ثانياً : إنك لمن تتصدر نتائج البحث ، حتتقدم على منافسينك ، ويكون لموقعك أعلى زيارات ، وطبعاً زائري الموقع حيتحولوا لعملاء محتملين 👏.

･ وأخيراً : والأهم إنه إستثمار مجاني ، لأنك ما حتدفع مقابل المساحة الإعلانية .

_ طيب كدا عرفنا السيو وأهميته ، طيب #وبعدين ؟🤔

انتظرونا في البوست الجاي من السلسة الحيكون متعلق ب " كيفية تحسين محركات البحث" .

في التعليقات ، تاقي لينا كاتب محتوى بتعرفه .👏

#وبعدين

10/12/2023

مساء الخير 🫶🏽

في البوستات الفاتت من سلسلتنا # وبعدين عرفنا عن التسويق بالمحتوى وإستراتيجياته.

الليلة حنتناول واحد من أكتر مجالات التسويق الإلكتروني المجهولة في السودان ، وأنجحها على الإطلاق ، وهو التسويق عن طريق البريد الإلكتروني أو ال E-mail marketing .

● التسويق بالبريد الإلكتروني ، زي ما واضح من إسمه ، هو إستخدام البريد الإلكتروني للترويج لمُنتجك أو خدمتك ، وتطوير العلاقة مع العملاء.

● في إحصائيات أثبتت إنو أكتر من 94% من مستخدمي الإنترنت في العالم بستخدموا البريد الإلكتروني ، يعني تقريباً العالم كله عنده E-mail والبعض أكتر..
أنا شخصياً عندي إيميلين🙋🏽‍♀️.

وفي المقابل ، ما كل الناس بتستعمل السوشال ميديا.

ودي الحاجة الخلّت علماء التسويق يركزوا أكتر على التسويق بالبريد الإلكتروني ، وفي دراسة بحثية اتعملت ، كانت نتائجها إنو 74% من الناس بيفضّلوا التسويق عن طريق إيميلاتهم✔️

● من مميزات التسويق بالبريد الإلكتروني إنه غير مكلّف ، وتتبع نتائجه وقياسها أسهل بالمقارنة مع باقي فروع التسويق الإلكتروني.
بالإضافة لأنه بيقدم ليك عملاء حقيقيين مهتمين بمنتجك👏 .
مافي زول حيديك بريده الإلكتروني إلا إذا كان مهتم بواحدة من خدماتك البتقدمها ، ودا بخليه يتابع نشراتك ويقرأها بإستمرار .

● لو مهتم بمجال التسويق بالبريد الإلكتروني ، وعاوز تعرف أكتر عن المجال ، أدعمنا بالايك والشير ، وتابعنا في البوستات الجاية من سلسلة #وبعدين 🫶🏽

#وبعدين

08/12/2023

صباح الخير 🌸

عارفين إنو الذكاء الإصطناعي فاز في مسابقة تصوير فوتوغرافي ؟

لمن حددوا الصورة الفائزة بمسابقة نظمتها سوني للتصوير الفوتوغرافي ، واتواصلوا مع الفائز ، كانت المفاجأة إنو الصورة بواسطة ذكاء اصطناعي .🦾

الذكاء الإصطناعي اليوم ، غزا كل المجالات البشرية ، وحتى إنو هدد معظم الوظائف بالزوال ، وبعضها انتهت بالفعل .

السؤال هو ، في رأيكم هل بيقدر الذكاء الإصطناعي إنو يستبدلنا ؟

03/12/2023

في وقت كان العالم العربي كلو بينادي بمقاطعة المنتجات اللي بتدعم الكيان الصه*يوني ، ظهرت بي كولا - السودان على أرض الواقع .

يافطة بتقوليكم إنو بي كولا نجحت كفكرة واتميزت لأسباب كتيرة أهمها : 👏

･ اتزامن ظهورها مع وقت كلنا مقاطعين وبنفتش عن بدائل محلية وبنفس جودة منتجات بيبسي وكوكا كولا .

･ العالم العربي كلو حالياً متجه لفكرة المحلي ودعم المحلي .

･ وإنها اتوفرت واتوزعت في كل ولايات السودان في وقت قياسي جدا ، وبأسعار مناسبة . 👏

عاوزين تعرفوا أكتر عن بي كولا وتشوفوهم من قريب وهم بنجحوا؟ تابعوا صفحتهم على فيس بوك ، وأدعموا المحلي😉👇

Bcola Sudan - بي كولا السودان

24/11/2023

الإعتقاد الشائع والمعروف في عالم التسويق إنو وجود سلعتك جنب سلعة منافسك في السوق بيقلل أرباحك.

طيب كيف قدرت بيبسي وكوكاكولا إنهم يزيدوا أرباحهم ، بالرغم من إنو تلاجة بيبسي و كوكولا بكونوا جنب بعض في أي حتة ؟🤔
الليلة حنوريكم حيلة تسويقية من طرف الدولاب !😎

إذا إنت مشيت أي محل ، ولقيت قدامك تلاجة بيبسي ، حتسأل نفسك "اشتري بيبسي ولا ما اشتري ؟🤔 " .
أما إذا مشيت محل ولقيت ال2 ، حتلاقي سؤالك اتحول ل "اشتري بيبسي ولا كوكا كولا ؟🤔 " .

الشركتين ركزوا على فهم عقلية المُستهلك وتلبية رغباتهم ، بدل التركيز على إقصاء بعضهم ، والحاجة دي فتحت باب أرباح غير متوقع للشركتين .

آي كلنا مقاطعين 🚯، بس السؤال هو :

هل عندك جرأة إنك تجرب الحيلة التسويقية العملتها بيبسي وكوكا كولا ؟ 😉

22/11/2023

• منو العمل مقاييس الجمال الحالية ؟!
• و على أي أساس بتم التقييم ؟!
من أكبر مسابقات الجمال لحدي أصغر عرض وظيفة ، من متطلباتها حُسن المظهر.

• في وقت كانت فيهو شركات منتجات التجميل بتسوق لشكل معين مفروض تكون عليه الأُنثى عشان يُقال عنها جميلة، أطلقت دوڤ حملة "Real beauty".

• الحملة لقت قبول و انتشرت بصورة كبيرة لأنو :
- صُناع الحملة شافوا أكتر مكان فيه فراغ و مشكلة وإشتغلوا عليه، فركزت الحملة على تعزيز الثقة بالنفس، وغرس تقبل الذات، و قالت إنو مقاييس الجمال حاجة غير واقعية، ومن غير المنطقي إنو نلقاهم كلهم في شخص واحد.

- قدرت دوڨ وعلى نمط معاكس لمنافسيها إنو تخلي النساء يشوفوا نفسهم ويقدروا يحبوا شكلهم بصورة كانت غير موجودة في الإعلانات القبلها، بمنتجات طبيعية و ما بتغير الشكل بل بتحافظ على البشرة و تظهر جمالها الطبيعي.

• في الجانب التاني الحملة اتعرضت لهجوم واسع من المستهلكين و النقاد بسبب طريقة تصويرها.

في التعليقات شاركونا شنو هي معايير الجمال في نظركم ؟ 👇

21/11/2023

･ كتابة المُحتوى ( content writing ) وكتابة الإعلانات (copy writing) ، من أكثر المصطلحات المنتشرة في عالم التسويق بالمُحتوى .
وكثير من كُتاب التسويق بالمُحتوى وهُواة المجال ، بيلاقوا صعوبة على التفريق بينهم.
طيب وبعدين ؟🤔

في البوست دا حنوريكم 6 فروقات أساسية بين كتابة المُحتوى ، وكتابة الإعلانات 👇 .

● من ناحية الغاية أو الهدف :
بنلاقي إنو ال content writing بيركّز على إعطاء قيمة تعليمية أو تثقيفية أو ترفيهية مجانية للعملاء .
أما ال copy writing بيركّز على البيع والإعلان.
عندكم كمثال : المحتوى الأنا بكتب فيه حالياً دا بيُعتبر content writing لأنه محتوى تعليمي 🙋🏽‍♀️.

● من ناحية طول المُحتوى :

طبعا ال content writing أطول بكتير ( ما شايفين كلامي كتير كيف ؟🌚)
ال copy writing بيكون مُختصر مفيد بيقوليك " اشتري! " .

● من ناحية شكل المُحتوى :
بنلاقي إنو ال content writing لأنو طويل ، فبيكون في شكل مقالات ، كتب صوتية ، فيديوهات ، بودكاست ، الخ..
بينما ال copy writing بتكون قصيرة زي رسائل ال SMS وإعلانات السوشال ميديا ، ومحركات البحث .

● أما من ناحية الإستراتيجية :
فال content writing بتكون معقدة وطويلة عشان توصلنا لهدف مهم جداً وهو تعزيز البراند ، والتواصل مع العملاء ، وبناء علاقة ثقة متبادلة.

أما الإستراتيجية اللي نتائجها سريعة وهدفها البيع فدي من اختصاص ال copy writing.

● آخر وأهم فرق هو الاتجاه :
ال copy writing اتجاهه واحد 🙋🏽‍♀️ ، بيع بيع ، اشتري اشتري ✅.
اما ال content writing سلِس وعنده عدة اتجاهات لأنه مستخدم في كل المجالات الإبداعية.

･ بالرغم من الإختلاف الجوهري بينهم إلا إنو الاتنين مهمين جداً لأي إستراتيجية تسويق بالمُحتوى .👏
فال copy writing هدفه الإعلان السريع البجيب مبيعات ، وال content writing يهدف إلى تدعيم البراند وكسب ثقة الجمهور ، وبناء قاعدة جماهيرية قوية مستقبلية .

في التعليقات شاركونا بعد قراءة الفروقات دي :
في رأيكم الشخصي ، أيهما أهم ؟
ال content writing ولا ال copy writing ؟

#وبعدين

19/11/2023

مساء الخير 🫶🏽♥️

اخترت إنك تتبع إستراتيجية التسويق بالمُحتوى للتسويق لمشروعك ، لأنو المُحتوى هو الملك زي ما قلنا في البوست الفات من السلسلة ( لو ما قريته حتلاقي اللينك في أول تعليق 👇) .
طيب #وبعدين ؟🤔

الليلة حنعرف مع بعض كيف تبني إستراتيجية تسويق بالمُحتوى ناجحة ومُناسبة لمشروعك 👏

● في البداية ، لازم تضع أهداف واضحة لإستراتيجيتك .
إنت عاوز تعمل شنو ؟
هدفك شنو من المحتوى الحتقدمه ؟
هل عاوز تبني قاعدة جماهيرية ؟
ولا عاوز تزيد التفاعل مع منشوراتك؟
ولا عاوز تزيد مبيعاتك ؟💸

･ وضع هدف واضح من عملية التسويق بالمحتوى ، مهمة جداً بالرغم من إنها مهملة من الكتيرين !
خليك عارف إنو ال select all لكل الأهداف دي حيستنفد منك وقت وجهد عالفاضي 🚯
فلازم تحدّد إنت عاوز شنو بدقة ✔️.

● تاني حاجة هي فهم الجمهور المُستهدف :
لازم تدرس جمهورك وتفهمه بدقة 👌🏼.
لازم تعرف اهتماماتهم ،احتياجاتهم ، أوقات فراغهم ، منصات التواصل الإجتماعي البستخدموها ..
باختصار لازم تدرس أسلوب حياتهم عشان تقدر إنك تقدم ليهم المُحتوى المُناسب ، في الوقت المُناسب ، وفي المكان المُناسب 👌🏼.

● تالت حاجة هي دراسة المنافسين 🤏🏼 .
زي ما بتدرس جمهورك المُستهدف ، لازم تدرس منافسينك كمان ✔️
الدراسة لازم تشمل معرفة نقاط قوتهم، وضعفهم ، ووجودهم على مواقع التواصل الإجتماعي.
حاول إنك تعرف كيف منافسينك بجذبوا عملاءكم المشتركين ، ونوع المُحتوى البقدموه.
وبعدها استخدم المعلومات الجمعتها عنهم عشان تساعدك في تحسين مُحتواك وأداءك على المنصات المُختلفة ✔️.

● رابعاً ، حدد نوع المُحتوى الحتقدمه : مقالات ، فيديوهات ، صور ، بودكاست ، وغيرها من أنواع المُحتوى الكتيرة اللي قلناها في البوست الفات ( لو ما قريته ، اللينك في أول تعليق 🌚👇) .

･ ما ضروري إنك تستخدم كل أنواع المحتوى دي في إستراتيجيتك ، اختار أنواع المحتوى المناسبة لإمكانياتك ، خبراتك ، وتناسب عملاءك 👌🏼.

● خامساً ، اختيار قنوات التسويق بالمُحتوى ، ولازم تكون مناسبة لنوع المُحتوى ، ولطبيعة عملاءك المُستهدفين ✔️

● وأخيراً ، فكّر في المحتوى المُناسب 👌🏼
اتخيل معاي إنك ممكن تبني إستراتيجية قوية وناجحة من أول خطوة بدون أي خطأ ، ويهدمها ليك كلها المُحتوى الضعيف 🤏🏼 !

لأنو المُحتوى هو الملك ، لازم تدّي الخطوة الأخيرة أكبر وقت ممكن ، وتجتهد إنك تقدم مُحتوى بجودة عالية ، يرضي عملاءك ، ويحقق أهدافك من الإستراتيجية .

･إذا اتبعت الخطوات دي ، حتكون بنيت إستراتيجية تسويق بالمُحتوى ناجحة وجاهزة للتنفيذ 👏.

ما تنسوا تمنشنوا أصحاب المشاريع ، واللسة عاوزين يعملوا مشاريع في التعليقات ، وادعمونا باللايك والشير عشان نستمر .🫶🏽

#وبعدين

16/11/2023

كلبها صنع لها ثروة بالصّدفة!

الليلة حنحكي قصة من طرف الدولاب👏

في وحدة إسمها أليكسا اشترت كلب ، وبعد أيام لاحظت إنو كلبها م بستمتع في الوقت البكون فيه برا البيت بل بالعكس م بحب يطلع من البيت أصلاً!

أخدته للدكتور ، وهنا كانت المُفاجأة!
الكلب كان بيعاني من حساسية في العين من أشعة الشمس .

أليكسا طبعًا اشترت لكلبها نظارة شمسية وعدلت مقاسها على أساس إنو يلبسها الكلب ، وبالفعل الكلب بقا بستمتع بالطلعة برا البيت! 🥳

الحصل بعدها شنو ؟!
أكيد طبعاً الكلب لفت الأنظار والناس بدت تسأل !🤔
ولمن أليكسا حكت ليهم القصة ، ناس كتيرة اكتشفت إنو كلابها بتعاني من نفس مشكلة كلب أليكسا ! وهنا الحاجة للنظارات الشمسية للكلاب ظهرت!

أليكسا استغلت الفُرصة وأطلقت أول براند نظارات شمسية للكلاب باسم Doggles 😎 ، وحتى الجيش الأميريكي اعتمدها لكلابه في وقتها 👏 .

_نستفيد من القصة دي شنو ؟

لازم يكون عندك ملاحظة قوية عشان تقدر تنتج فِكرة مفيدة تعمل منها شغل بعائد مادّي 👏
بجانب نظرة مُختلفة للأشياء ومحاولة استغلال كل الفُرص البتجيك 👏 ودي المهارات البتميّز روّاد الأعمال!

وأخيراً ، لا تخاف من تجربة فكرة جديدة مهما كانت مُختلفة أو غريبة ، لأنها ممكن تكون مفتاح نجاحك للمُستقبل !

استنونا الخميس الجاي مع بوست جديد من سلسلة 😉

15/11/2023

في مقولة شهيرة في عالم التسويق تقول إنو :
" المُحتوى هو الملك " .

شنو قصتها ؟ تعالوا نعرف مع بعض 😉

･التسويق بالمحتوى أو ال content marketing هو أحد أنواع التسويق الإلكتروني .

أديكم زيت التعريف ؟ 🙋🏽‍♀️

･التسويق بالمحتوى بقوليك بإختصار :
إنو ما ممكن تعمل شركة مثلاً ، وفجأة تجي تكتب للعملاء إعلان تقول فيه "اشتروا مني".
وإنت مافي حد داري عنك أصلاً !🌚

･الحاجة البتميّز التسويق بالمحتوى إنو بركّز على جذب العملاء وخلق رابط قوي بينك وبينهم 🫶🏽.
والرابط القوي بينشأ من حاجتين :
● أولاً : وجودك مع عملاءك في كل مرحلة من مراحل الشراء بإستراتيجية :
･ تبدأ ببناء الوعي للجمهور وتعريفهم بوجودك ( هنا يدوب في حد درا عنك 🌚) .
･ بعدها بناء علاقة قوية مع الجمهور دا (عشان يكلموا أصحابهم يدروا عنك برضو 🌚) .
･ وآخر شي اللي هي مرحلة الشراء .✔️

●ثانياً : الرابط القوي مع عملاءك بينشأ من إنو التسويق بالمحتوى بيركّز بشكل أساسي على تعليم وتثقيف الجمهور ، بدلاً عن التركيز على الإعلانات المُباشرة.

_كيف الكلام دا ؟🤔

･إستراتيجية التسويق بالمحتوى بتقول إنك لازم تدي قيمة مجانية للعميل ، عشان تكسب ثقته وتحافظ عليه كعميل دائم ، وتكسب عملاء محتملين.

أديكم مثال 🙋🏽‍♀️
إذا عملت مشروع بتاع محل ملابس مثلاً ، ولنفرض إنها ملابس نسائية.

كقيمة للعملاء ممكن تنشر محتوى عن تنسيق الألوان ، أو تساعد العملاء على اختيار الألوان المناسبة للمناسبات النهارية والعكس .
بجانب طبعاً المُحتوى الإعلاني اللي هدفه البيع 👏.
الحاجة دي بالرغم من إنها قد تكون بسيطة إلا إنها :
･بتديك حضور قوي على منصات التواصل الإجتماعي ( الناس بتحب المجان أخدها دي قاعدة 😎).
･بتظهر للناس خبراتك في مجالك ، والحاجة دي حتنعكس على ثقتهم في منتجاتك ، وبالتالي على المبيعات.
･حتجذب ليك عملاء أكتر وتحافظ على عملاءك الحاليين.

مفتاح نجاح إستراتيجية التسويق بالمُحتوى هي اختيار محتوى مناسب لكل مرحلة من مراحل الشراء ، على أساس إنك تخلي العميل يتنقل بين المراحل دي بسهولة وإنسيابية وما يلاقي نفسه إلا واتواصل معاك عشان يشتري منتجك👏.

ودا حيودينا لسؤال مهم جدًا وهو :
ماهي أنواع المحتوى ؟
･ أنواع المحتوى بتشمل كل حاجة عينك بتقع عليها لمن تمسك تلفونك🥳
صور ،فيديوهات ، مقالات ، كتب صوتية ، إعلانات ، بودكاست ، نشرات بريدية ، كل حاجة باختصار .✔️

_ الكلام دا كتير صح ؟🙄

أيوة بالضبط 👏
الكلام دا كتير وطويل وبياخد وقت ، عشان كدا إستراتيجية التسويق بالمحتوى ما بتديك نتائج فورية .

･لكن بالرغم من بطء الإستراتيجية ، إلا إنو الشركات ما بتتخلى عن التسويق بالمحتوى ، لأنو زي ما قُلنا بتديك قيمة أهم من المبيعات الفورية ( ثقة + عميل في الجيب 😉 ).

_الموضوع دا مهم شديد ، أها وبعدين ؟🤔

في البوست الجاي إن شاء الله حتعرفوا معانا كيفية عمل إستراتيجية للتسويق بالمحتوى خطوة بخطوة 👌🏼.
وما تنسوا تدعمونا باللايك والشير🫶🏽♥️

عرفتوا لي بقولوا عن المحتوى إنه الملك ؟😉

#وبعدين

14/11/2023

في البوست الفات من سألناكم هل بتفضلوا نايك ولا أديداس ؟

"لو ما قريت البوست اللنك بتاعه في أول كومنت"👇

اليوم ح نتكلم عن شعار حصل ليه إعادة تصميم أكتر من مرة لحدي ما وصل لشكله الحالي.

شعار أديداس !
بالرغم من إنه يعتبر نسبياً جديد مقارنة بتاريخ الشركة إلا إنه قدر يرسخ في أذهان العملاء لأسباب كتيرة منها :

- فكرة الشعار بسيطة جداً ومن السهل تذكره.

- أبعاد الشِعار شبه متساوية ، فبالتالي مرن جداً و من السهل وضعه بأكثر من طريقة.

- الثلاثة خطوط المتوازية المائلة فيها دلالة على التحديات البمر بيها الرياضي.

- قدرت أديداس و بطرق ذكية عكس الشعار في منتجاتها زي إنها عملته في الجانب الخارجي لأحذيتها بشكل متناغم مع تصميم الحذاء، و كمان في الجزء العلوي من الصنادل البلاستيكية.

- اعتمدوا اللون الاسود كلون رئيسي للشعار، مع امكانية تغيير اللون حسب التصميم.

في نقطة قوة م قلناها عن الشعار خمّنوها انتو في الكومنتات 🤭

يافطة Yafta

11/03/2024

21/12/2023

10/12/2023

08/12/2023

03/12/2023

24/11/2023

22/11/2023

21/11/2023

19/11/2023

16/11/2023

15/11/2023

14/11/2023

Address

Website

Alerts

Contact The Business

Shortcuts

Share

Category