19/10/2025
عندنا واحده ولدا وحيد ابوه إنقطعت اخبارو من حوالي ثلاثين سنه يعني لمن فات السعودية خلى ولدو عمرو سنتين ومن ديك لا حس لا خبر.
ناس بقولوا معرس تاني وناس يقولوا في دولة اوربيه واي زول يقص براه.
المهم امو مدلعاه دلع لدرجة العوارة لدرجة ملبساه دبلة دهب ومامخليه ليه حاجه هي امو وابوه وصحبتو ومابترضى فيه الحبه.
نختصر عشان مانطول في المنشور ..
المهم الشاب دا في واحده عجبتو واتقدم ليها والعرس تم وكان بهرجه شديده امو الماسوتو شنو؟
ماف شي ناقص والكمال لله والناس تتونس في عرسو دا فترة طويلة.
الولد بعد العرس بدا يتغير بسبب مرتو كل مره تشحن فيه بتقول ليه امك بتصنت فينا بقت تذرع فيه الشكوك بقي ما بصبح على امو زي ماكان بعمل زمان وبدت تصرفاتو تتغير من امو وهي لاحظت ليه اصلو ما سألتو بقت موجوعه جوة بس.
مرتو بقت تتسبب في المشاكل كل مره جايه بي حكايه مره امك بتتصنت علينا ومره بتحمر لي بدون سبب ومره شاكلتني.. الاخيرة دي صاح شاكلتا لقتها بتهظر مع سيد الدكان بس ماورت ولدا قالت تحلها براها عشان ماتخرب ليه بيتو .
وبعدا دا مفترض مرت ولدا تعمل ليها تمثال عديييل لأنها ماورت ولدا بيها .
وبدل كدا تصدقوا ياناس مرتو وصلت لي وين؟ قالت ليه البيت دا بيت امك وانا مابقعد فيه يمكن تطردني يوم طالما بقت تشاكلني من غير سبب احسن اطلع من هنا بقعد مع امي قال ليها عليك الله ماتطلعي انا بتكلم ليك معاها انها ماتسألك قالت ليه بقعد بشرط ؟
قال ليها اشرطي.
قالت ليه البيت لو سجلتو ليك بي إسمك بقعد .
للأسف قال ليها موافق وجرى اقترح لي امو انو تسجل ليه البيت .
امو قالت ليه اصلن هو بيتك شبعت مني خلاص ياولدي ؟؟ قال ليها العفو ياحجه بس مامعروف الظروف قالت ليه زي ماتحب.
وفعلا بعد ايام سجلت ليه البيت وهي كان حاسه انو دا ماقرار ولدا المهم حققت ليه مرادو .
وبعد دا شوفوا الحاصل شنو؟ ؟؟
مرت ولدا بقت تخلي راجلا يطلع بي جاي تجيب صحبتا وتقعد تطاعن في امو وتمقص فيها وشي نبز وصلت لمرحلة بقت ترفع يدها لي امو وتهددا بالضرب وفجأة ولدا جا وسمع امو قالت ليها انتي واحدة مامربيه كان طبعا بترد ليها في رفعة يدها ليها ومرت ولدا عاينت لقت راجلا في وشها وبدت تمثيل وبقت تبكي وتقول ليه سامع امك بتقول لي شنو انو انا مامربية وكل يوم بتخليك تمرق وبتعمل لي كدا قالت ليها دي انا يا بتي؟
الولد بدون يفهم اتهجم على امو لأول مرة كورك في امو قال ليها بتتصنتي علينا ماسألتك وبقيتي تحمري ليها من غير سبب ماسألتك وشاكلتيها وانا كنت عارف بس ما سألتك بس تقولي ليها مامربية دي مامقبولة منك. ومرتو تشيل وتتبكي وهو يحنس فيها انو تاني مابحصل كدا قالت ليها خليها تطلع من البيت دا يابطلع انا وتاني مابتشوف وشي احييييي ياوجع القلب للأسف مشى وقال لي امو اطلعي لي من بيتي امو الكلام وقع فيها زي الصاقعه قالت ليه بعد العمر دا امشي وين قال ليها بأجر ليك بيت ناس فتحي ودا بيت منهم بي تلاته شوارع قالت ليه كتر خيرك ولا تتعب رقبت ولاتأجر لي انا بعرف اتصرف بس للأسف انت بقيت في رحمتا واما انا في رحمة ربنا الاقوى مني ومنها.
فتك بي عافيه ياجناي😭
قالوا الام فاتت البلد ومرت السنين ومرتو ملت البيت عيال وجاه تلفون من قرايبو بقول ليه امك عاوزه تشوفك هي مريضة .
وجرى كلم مرتو قال ليها امي قالوا عيانه قالت ليه دي حركات نسوان عارفنها عاوزه تجي هنا بس لكن والله تخت رجلها في البيت دا انا بطلع بي عيالي !
وفعلا سمع كلام منو... انا ماعارف دا قلب شنو البخليه يطلع امو من بتا وتمر سنين من غير يشتاق ليها دا ولد شنووزز؟؟!!!!
وللاسف بعد كلام مرتو مافكر يمشي لي امو مرت تاني سنين .
ناس المدرسه اتصلوا عليه انا يسدد رسوم المدرسه شال إذن وجا راجع البيت عشان يشيل قروش يسدد اقصاد المدرسة حوالي الساعه عشره او حداشر دخل الغرفه لقى مفاجأة مرتو مع راجل بقى يكورك ويفلق فيهم ويلعن فيها وحالة هستيريه وشي كلام مامفهوم وطلقا بي التلات وقال ليها رجلك دي تاني مابتختيها في البيت دا وانسي انك عندك عيال وطردا طردت الكلا.ب
وبعد هدا شوية بدا يراجع نفسو واتذكر كلام امو لمن قالت ليه ( انت بقيت في رحمته واما انا في رحمة ربنا)
اولادو لمن جو حكى ليهم بالحاصل وانهم مايذعلوا دا نصيهم كدا وقال ليهم الاسبوع الجاي حنمشي نجيب حبوبتكم.
وبعد انقضى الاسبوع فعلا قطع تذاكر وسافروا البلد قال اول ما اخش البيت ابوس رجلا لانو ظلمتها وبعد داك حتى اعرف امي بي احفادا الكبرو.
دق الباب فتحوا ليه الباب سلم عليهم ودخلوهم البيت وادوه مويه وقعد يتونس مسافه ولا حظ في زول غايب قال ليهم امي ماعاوزه تجي تسلم على ؟
قالوا ليه امك؟ تعيش انت البقيه في حياتك امك اتوفت الشهر الفات ومرضا كان انت وكان نفسا تشوفك لو لحظة 😭😭😭
بقى يكورك ويصرخ ويقع في الواطه من طولو 😭😭
وفعلا كلاما القالتو مشى وجا انها في رحمة ربنا🙂
القصة حقيقية.....
جميع الحقوق محفوظة ○ فصعونة
