11/08/2026
ما كنتا بفتش عن اسم جديد .. كنتا بفتش عن معنى يشبه المرحلة الجاية!
لما قررتا أغيّر اسم سودانية الكلمة، ما كنتا بفتش عن اسم حلو وخلاص .. كنتا بفتش عن اسم يقدر يشيل المرحلة الجاية.. اسم قصير.
مميز .. عنده معنى والأهم يكون وراه فكرة .. قعدتا أفتش وأقارن وأقرأ معاني أسماء مختلفة، لحدي ما وقفت عند اسم:
ألاس | ALAS
أكتر معنى شداني فيه هو ارتباطه بـ الأساس والمرتكز ..
وقتها حسيت إنه الاسم ما مجرد كلمة دا بالضبط الشيء البفتش عنه في المحتوى .. لأنه قبل ما أكتب أي بوست، في أساس لازم أفهمه:
منو البراند؟
منو جمهوره؟
شنو مشكلته؟
شنو عايز يقول؟
وليه الناس مفروض تسمعه؟
لو الأساس ما واضح، ممكن أكتب أجمل كلام في الدنيا ..
لكن المحتوى يبقى مجرد كلام .. ومن هنا بدأت تتشكل فكرة #ألاس.
ألاس ما جاي عشان يملأ صفحات البراندات بالبوستات ..
جاي عشان يساعد البراند يعرف يتكلم .. يعرف شنو يقول،
ولمنو يقول، وكيف يقوله بطريقة تشبهه وتوصل لجمهوره.
وعشان كدا اخترت فلسفة ألاس في 3 كلمات:
افهم. اكتب. أثّر.
افهم البراند وجمهوره .. اكتب رسالة عندها هدف .. أثّر في الشخص الصح .. ومن هنا تبدأ الحكاية الجديدة💛 سودانية الكلمة كانت مرحلة مهمة في الرحلة #وألاس هو الفصل الجديد 💛
من اليوم، حتلقوا هنا:
✔️ كتابة محتوى للبراندات
✔️ أفكار وزوايا للمحتوى
✔️ تحليلات حقيقية للصفحات والمحتوى
✔️ تجارب ونتائج من أرض الواقع
✔️ والطريقة البفكر بيها قبل ما أكتب أي كلمة.
ألاس | افهم. اكتب. أثّر.
أهلاً بيكم في البداية الجديدة.
#ألاس
