31/07/2025
قصة غريبة ومبالغة
أستاذ هشام المحامي ، جمعتنا بيه الأيام في بيت عزابة في الجريف غرب .
جا السعودية بعد الحرب ، اخوه الصغير شغال ليه في مزرعة وتمتموها بي جاي جاي إشترو ليه إقامة .
كان مرتاح في السودان مكتب وعربية وقضية طالعة وقضية نازلة .
لعنت الله على الجنجويد ما خلو ليهو شي .
خمسة شهور الزول دا في بيت العزابة في السعودية يوم يشتغل عتالة وخمسة يوم عاطل ويوم ينزل يوميات .
عمل ليه رخصة قيادة سعودية بعد خراج روح .
بعد رحلت من العزابة سألت عنه اهله قالو الحمد لله لقى ليه شغل في الرياض وسافر .
بالصدفة اليوم التقيته ،
عربية فخمة وبدله أنيقة وخمج شديد .
بعد الاحضان همست ليه براحة في اضانه ..( سرقت شنو يازول ورينا)...
أداها ضحكة جااامدة واتنهد وقال لي ( والله يا ابو الجل ما سرقت لكن إنسرقتا !!!!!
كدي اركب نمشي المكتب تتقهوج معاي واحكي ليك كل شي .
المكتب ذاتو حاجة تخلع والبنغالة يشيلو ويجيبو في الأكل والشراب .
بدأ يحكي ....
شوفت حالتي ديك ؟
يوم إتصلت علي خالتي الكبيرة بسلم عليها ، وشكيت ليها الحال ..
قالت لي كلام عجيب !!!
قالت لي يا هشام ولدي .. بعد الواطة تضلِّم والناس ينوموا ... إنسرق برَّاحة وأمشي لي الله❤️ ، كان في الجامع وللا في أوضة فاضية ....
ورِّيه أي شي ، أبكي ليه ... والله يا ولدي كان صدقتا يناولك في يدك .
أقيفو معاي شوية في
( يناولك في يدك)..
( يناولك في يدك)..
أها يا ابو الجل يوم نص الليل الأمور واقفة تب ، والنفسيات في الأرض والهموم بالكوم .. وغلبني النوم عدييل ...
إنسرقتا ... ههههههه ..
إنسرقتا برراحة ومشيت الجامع .. عارف المفتاح بختو وين ...
لما وصلت الجامع حسيت انه مفتوح ، الكلام دا كان نص الليل ولما دخلت لقيت واحد سعودي بصلِّي خلعني عديل وشكله برضو إتخلع ...
أها بديت أركِّع .. والله السجدة ربع ساعة ، فتيت الورا والقدام ورقدتا لي الله سيدي سلطة ...
بعد كم ركعة صاحبك السعودي جا قعد جنبي ... شكله ذاتو كان منسرق وشُّو منوِّر لكن ظاهر عليه مهمووم ...
برك جنبي وطايبني ..
قال لي ، أشوفك ما شاء الله تقيم الليل ، والله يا أخي أنا ما دايما بصلي بالليل ، بس اليوم عندي حاجة ضرورية.. أبغيك لو ما تمانع ، أخبرك عنها وتخبرني بحاجتك ، دنيا وآخرة أدعيلك وتدعيلي ، عسي واحد منا يكون مقبول .
عجبتي فكرة تبادل المنافع دي ...
قال لي بعد ما عرفتو بي إسمي "أبو البراء" ، والله يا أبو البراء عندي ولدي الكبير مبتعث في ألمانيا ومسوي حادث من ثلاث أيام ، وحالته خطيرة .
اليوم بعملو ليه عملية في الرأس لو نجحت بعيش ان شاء الله ، لكن نسبة نجاحها ضعيفة جدا ...
الزول دخلني في مصيبتو نسَّاني شغلانتي ذاتا ...
المهم في الآخر وريتو حاجتي .. إني بسأل الله جلَّ جلاله يديني شغل بس ...
قال لي إنت ويش تشتغل أصلا ؟؟
قلت ليه محامي ...
قال لي ، ما شاء الله محامي ومعاك شهادات ؟.
قلت ليه نعم ...
الزول دا حوقص فيني كدا بحنيه شديد ، أظن حننتو جد ...
عاين فيني كدا وجر فيني نور طويل وبدأ يبكي بهدوء .. والله نا ذاتي بكاني معاه ...
طبطب علي في كتفي كدا وقال لي يا أبو البراء إنت مشكلتك محلولة ، بس لو تركز معاي في مشكلتي أنا ...
خلِّينا نقوم نكمِّل القيام ، وبعد الفجر أسلم عليك خارج المسجد ...
رجعنا تاني نتباكي لي الله سيدنا لحدي الصبح ...
بعد الصبح لقيت زولي منتظرني برا الجامع ومسكني من يدي ودَّاني لي سيارته ، الخمج الياهو .
والله دي براها تحل مشكلتي وناس الجريف كلهم ...
دخَّلني ليك في السَّيارة قال إلَّا يوصلني السكن .. والسكن جنب الجامع !!.
المهم بعد وصلنا قلت ليه أنزل أشرب شاي ، إعتذر .. وقال لي أديني رقم جوالك ..
ودخل يدو في جيبه ومرق لي 500 ريال ...
نحن ما ناس العزة ...
قلت ليه أنا ما محتاج والحمد لله ، بس لاتنسونا من الدعوات ...
قال لي .. أبدا هذه ما صدقة ولا هدية !!!..
هذه على الحساب ، أول ما تستلم الراتب الأول نخصمها منك وأداها إبتسامة هااادية كدا .. المهم أبيت أشيلها ...
شوف يا أبو البراء إنت إن شاء الله تاخد ال 500 دي وتدبر حالك قبل السبت تكون في الرياض .. وانا بعطيك تلفون الأستاذ أبو مصعب .. هذا سوداني من ربعك هو المسؤول عن مكتب الإستشارات القانونية تبعي بالرياض ...
بس لا تنس أول راتب راح نخصم ال500 ريال ...
والله يا جماعة أستاذ هشام دمعتو سألت وأنا لحقتو بي دمعة ...
قلت ليه شنو ؟؟
( كان صَدَقْتَا يناولك في يدك)
والله العظيم
(كان صدقتا يناولك في يدك) ...
________
الأجمل الولد عمليته نجحت وإتعافي ورجع لأهله سالم .
يا جماعة قولو إن شاء الله ربنا يسهل لينا وننسرق ، وننسرق ، ونصدق ، وننسرق ونصدق .
ونتناول ..
منقول ، جلال إبراهيم .
