26/04/2026
Taariikh kooban oo ku saabsan Taariikh nololeedkii Alle Hawnaxariistee Eng Khadar Maxamed Ducaale oo shalay Dacarbudhuq Lagu aasaya.
Khadar Maxamed Ducaale wuxuu ka mid ahaa haldoorka farsamada biyaha ee dalka, isaga oo soo qabtay Shaqooyin kala duwan oo Dhanka Biyaha ah sida Madaxa Injineerada Farsamayaqaanada ee Wasaaradda Horumarinta Biyaha.
Khadar wuxuu shaqada biyaha ku soo biiray sannadkii 1984, xiligaa oo uu ka bilaabay Wakaaladda Biyaha ee Burco, halkaas oo uu ka muujiyay karti, dadaal iyo xirfad sare.
Intii uu khibraddiisa sii kobcinayey wuxuu u wareegay Muqdisho, isaga oo ka qayb qaatay hirgelinta iyo fulinta mashaariic muhiim ah oo dhinaca biyaha ah. taas oo si weyn u ballaadhisay aqoontiisa iyo waayo-aragnimadiisa farsamo ee dhanka Biyaha Sannadkii 1986 wuxuu dib ugu soo laabtay Burco, halkaas oo uu si toos ah ugu hawlgalay dayactirka iyo horumarinta ceelasha biyaha ee Gobolka Togdheer Isagoo door muuqda ka qaatay sugidda helitaanka biyo nadiif ah.
Muddo dheer ayuu ka tirsanaa laf-dhabarta khubarada biyaha ee Wasaaradda, isaga oo si gaar ah ugu xeel-dheeraa dayactirka iyo maaraynta ceelasha dhaadheer. Shaqadiisa waxaa lagu xasuustaa hufnaan, masuuliyad iyo u heelanaan adeegga bulshada, wuxuu door weyn ka qaatay horumarinta adeegyada biyaha iyo ilaalinta kaabayaasha biyaha ee dalka.
Alle haw naxariistee Khadar Maxamed Ducaale waxa uu shalay ku geeriyooday magaalada Nairobi, halkaas oo uu ku sugnaa. Maanta ayaa maydkiisa la keenay dalka, waxaana lagu aasay magaalada Dacar Budhuq.
Aaska marxuumka waxaa ka qayb galay Agaasimaha Guud ee Wasaaradda Horumarinta Biyaha, Jananka Guud ee Ciidamada Booliska Somaliland, iyo shaqaalaha Wasaaradda Biyaha oo uu ka tirsanaa marxuumku.
Dhammaan masuuliyiinta iyo ka qayb-galayaashu waxay Alle uga baryeen inuu alle naxariistiisa Janno ka waraabiyo marxuumka, qoyska iyo qaraabadiisana ka siiyo samir iyo iimaan.
Guud ahaan Khadar Maxamed Ducaale wuxuu ka tagay dhaxal muuqda oo ku saabsan horumarinta iyo joogtaynta adeegyada biyaha, isaga oo noqday tusaale lagu daydo oo ku saabsan xirfad, daacadnimo iyo u adeegidda bulshada.
