03/10/2024
Buug Cusub: FANKA CURINTA
“Haddii aad doonayso wax cusub, jooji qabashada wax gaboobay” Peter F. Drucker, Aabbaha Fanka Maamulka Qarnigii 20aad.
Buuggan ‘Fanka Curinta’ waa tallaal muhiim ay tahay in uu qaato qof kasta oo doonaya in uu adeegsado awoodda curineed ee ku keydsan gudahiisa. Hal’abuurnimada iyo curintu waa biriijka qofku kaga gudbo caqabadaha iyo dhibaatooyinka nololeed ee soo wajaha. Ujeeddada ugu weyn ee buuggu xambaarsan yahay waa in uu inaga furfuro silsilado ku dabrannaa muddo dheer maskaxdeenna. Waa silsiladaha keenay in dhammaan dareemmada aqoonta ee qofku u afduubnaadaan mushkiladaha yaryar ee maalinlaha ah. Waa silsiladaha ka samaysan khurafaad ku kala tuuray qofka iyo curinta cadceed ka soo bax iyo cadceed ka dhac.
Buuggan Fanka Curintu {Steal Like an Artist} waxa uu ka mid yahay buugta loogu iibsiga badan yahay {New York Times Best Seller}. Waxaana loo afnaqay ama loo tarjumay in ka badan 21 luuqadood. Waxa u saamaxay in uu derajadaa gaadho; waa in uu dib u mideynayo qofka iyo curinta oo uu ka dhigayo laba isku sidkan oo ul iyo diirkeed ah. Qofka soomaaliga ah marka ugu horreysa ee uu curin ama hal’abuur maqlo waxa ku soo dhaca suugaan iyo noocyadeeda uu ugu mudan yahay gabaygu. Balse, waxa hubaal ah sida aan ugu suntan nahay bulshadii gabayga, si la mid ah in aynnu hibo u leenahay hal’abuurnimada iyo curinta guud ahaan fanka kala geddisan ee nolosha.
Hal’abuurnimadu dhinac kasta oo nolosha ka mid ah - fanka, farshaxanka, ganacsiga, hoggaaminta, maamulka - waxa ay u tahay lagama maarmaan sida kalluunku aannu biyo uga maarmin. Nolol bilaa curin iyo hal’abuur ahi waa nolol aan iftiin iyo hawo midna lahayn. Waxa aan rejaynayaa in uu buuggani noqdo saaxiib kugu kaalmeeya in aad dib isku heshaan adiga iyo hibadaada curineed oo in badan ay idiin dhexaysay deyr weyn oo ka samaysnaa aamminaado ku-tidhi-ku-teen ah iyo hadaltiro aan cilmi iyo xaqiiqo haysan oo muddo badan inoo sheegi jirey in dad kooban oo gaar ahi leeyihiin hibada curinta iyo hal’abuurka ama hal’abuurnimadu tahay hidde oday ka soo gaadh ah oo haddii aannu awoowgaa lahaan jirin aannad adigu meel na ka soo gelayn.
Cabdisalaam Gaboobe
