Radio Galdogob

08/07/2026

FALANQAYNTA BUUGGA BULAAL

Waxaa sharaf noo ah inaan ka qaybgalno madasha aqooneed ee Naadiga Akhriska & Qoraalka Garaad-Kobac, halkaas oo lagu falanqayn doono Buugga Bulaal ee Barashada Cilmiga Horumarinta.

Kulankan wuxuu noqon doonaa madal lagu gorfeeyo fikradaha iyo aragtiyaha uu buuggu ka soo bandhigayo Cilmiga Horumarinta, iyadoo diiradda la saarayo sababaha horumarka iyo dib-u-dhaca bulshooyinka, maamul wanaagga, dowlad-dhiska, iyo doorka aqoonta ee horumar waara.

Waxaan uga mahadcelinayaa Naadiga Garaad-Kobac qabanqaabada munaasabaddan aqooneed, iyo dhammaan falanqeeyayaasha iyo ka soo qaybgalayaasha waqtigooda u huraya kobcinta dhaqanka akhriska, qoraalka, iyo doodaha ku salaysan aqoonta.

🗓 Jimco, 10 Luulyo 2026
🕞 3:30 Galabnimo
📍 Dareem Intentional (Kasoo Horjeedka Jaamacadda Plasma "SOOBE"), Muqdisho

Ka soo qaybgalkiinnu wuxuu qayb muhiim ah ka yahay kobcinta dhaqanka aqoonta, falanqaynta, iyo wadaagga aragtiyaha ku salaysan cilmi-baarista iyo horumarka.

02/07/2026

31/05/2026

Buugga Bulaal ee Barashada Cilmiga Horumarinta

Taariikhda hoggaamiyeyaasha waaweyn waxay ina baraysaa in horumarka quruumuhu uusan ku dhisnayn awood iyo hanti keliya, balse uu ku salaysan yahay dareenka mas’uuliyadeed ee hoggaanka iyo sida ay uga go’an tahay daryeelka bulshada. Hoggaamiye kasta oo fahamsan waajibaadkiisa wuxuu ogyahay in horumarka dhabta ahi ka bilowdo ilaalinta danta guud iyo xaqiijinta nolol wanaagsan oo muwaadiniintu helaan.

Caalimka iyo hoggaamiyihii weynaa Cumar bin Al-Khaddaab RC wuxuu yiri “Haddii baqal ku dhacdo Ciraaq, waxaan ka baqayaa in Alle iga waydiiyo sababta aan waddada ugu hagaajin waayey.”

Oraahdan caanka ahi waxay si qoto dheer u muujinaysaa heerka mas’uuliyadda ay dowladdu ka saaran tahay daryeelka bulshada iyo bixinta adeegyada aasaasiga ah. Hoggaanka wanaagsan laguma qiimeeyo hadallada iyo ballanqaadyada, balse waxaa lagu qiimeeyaa sida uu uga jawaabo baahiyaha bulshada iyo sida uu u xaqiijiyo danta guud.

Aragtidan waxay si dhow ula jaanqaadaysaa Buugga Bulaal ee Barashada Cilmiga Horumarinta, kaas oo sharxaya in horumarka bulsho iyo qaran uusan ku imaan kheyraad dabiici ah oo keliya, balse uu ku xiran yahay maamul hufan, hay’ado awood leh, iyo hoggaan dareensan mas’uuliyadda ka saaran bulshada.

Sida uu Cumar uga welwelsanaa baqal ku dhibtooda waddo burbursan, ayay cilmiga horumarintuna maanta u tilmaamaysaa in dowladuhu mas’uul ka yihiin tayada kaabeyaasha dhaqaalaha, adeegyada bulshada, waxbarashada, caafimaadka, iyo fursadaha nolosha ee muwaadiniintooda.

21/05/2026

Qaran kasta oo qiimeeya cilmi iyo shaqo adag wuxuu u tallaabaa horumar.

Horumarka quruumaha laguma gaaro nasiib ama kheyraad dabiici ah oo keliya, balse waxaa saldhig u ah aqoon, shaqo adag, iyo nidaam bulsho oo dhiirrigeliya hal-abuurka iyo waxbarashada. Dalalka maanta hormuudka ka ah dunida waxay horumarkooda ku dhiseen maal-gashi ay geliyeen cilmi-baarista, tayeynta waxbarashada, iyo kobcinta kartida bulshada.

Buugga Bulaal wuxuu si qoto dheer u iftiiminayaa muhiimadda aqoonta iyo doorka ay ku leedahay horumarka bulshada, isaga oo xoojinaya fahamka ah in qaran kasta oo mudnaanta siiya cilmi iyo dadaal uu gaari karo horumar waara.

📚 “Aqoontu waa saldhigga horumarka iyo dhismaha bulshooyin awood leh.”