10/09/2026
SOLJA oo Cambaareysay Xadhigga Wariye Xasan Saleebaan Haaruun (Gallaydh).
Qoraal ka soo baxay Ururka ayaa sidan u dhigna.
“Ururka Suxufiyiinta Somaliland ee SOLJA waxa uu si weyn uga walaacsan yahay xadhigga Wariye Xasan Saleebaan Haaruun (Gallaydh), oo shalay, 9 September 2026, lagu xidhay magaalada Gabiley, kadibna loo soo wareejiyey Xarunta C.I.D.-da ee Hargeysa.
Wariye Xasan Gallaydh ayaa saaka la horgeeyey Maxkamadda, taas oo u jartay lix maalmood oo rumaan ah. Sida SOLJA loo sheegay, wariyaha waxa lagu eedeeyey inuu, isaga iyo suxufiyiin kale, ka hadleen xadhigga Wariye Cabdiqani Xuseen Abokor (Baylood), oo maalintii 13aad ku xidhan magaalada Hargeysa.
Xadhigga Wariye Xasan Gallaydh waxa uu ka dhigayaa wariyihii toddobaad ee lagu xidho Somaliland sanadkan 2026. Sidoo kale, waa wariyihii labaad ee muddo laba toddobaad gudahood ah la xidho, iyadoo Wariye Cabdiqani Baylood uu weli xabsiga ku jiro.
Ururka SOLJA waxa uu si adag u cambaaraynayaa xadhigga soo noqnoqday ee suxufiyiinta, waxaanu ugu baaqayaa Xukuumadda iyo laamaha amniga inay ixtiraamaan oo ilaaliyaan xorriyadda saxaafadda iyo xuquuqda suxufiyiinta.
Ururku waxa uu sidoo kale ugu baaqayaa masuuliyiinta ay khusayso inay sida ugu dhakhsaha badan xorriyaddooda ugu soo celiyaan labada wariye ee haatan ku xidhan Hargeysa, Wariye Xasan Gallaydh iyo Wariye Cabdiqani Baylood, isla markaana la dhawro xuquuqdooda sharci iyo tan aasaasiga ah.”
