08/06/2026
Baaq ku Socda Ganacsatada iyo Qurbo-joogta Reer Sanaag
Waxaan baaq u dirayaa ganacsatada, aqoonyahannada iyo qurbo-joogta reer Sanaag inay si dhab ah uga qayb qaataan horumarka gobolka, kanaalin muuqata ku yeeshaan hirgelinta mashaariicda bulshada waxtarka u leh
Gobolka Sanaag weli wuxuu ka mid yahay gobollada ay ka muuqato baahiyo waaweyn oo dhinacyada kaabeyaasha dhaqaalaha, gaadiidka iyo adeegyada guud ah. Inkastoo sannado badan la soo jeediyey qorshayaal iyo ballanqaadyo kala duwan, haddana mashaariic badan oo muhiim ahaa weli si buuxda uma hirgelin
Taasi waxay shacabka ku abuurtay su'aalo ku saabsan waxa qabsoomay iyo waxa mustaqbalka loo qorsheeyey.
Waxaa muhiim ah inaynu isweydiino: Maxaa inoo qabsoomay? Maxaase weli inaga dhiman? Ma la joogaa waqtigii aynu isku tashan lahayn oo aynu door muuqda ka qaadan lahayn horumarka gobolkeenna?
Waddada Ceerigaabo–Maydh, Waddada Hadaftimo, iyo horumarinta Dekedda Maydh waa saddex mashruuc oo laf-dhabar u noqon kara koboca dhaqaalaha, fududaynta isu-socodka bulshada iyo soo jiidashada maalgashiga gobolka. Haddii aynu mideyno awooddeenna, aqoonteenna iyo dhaqaalahenna, waxaa suuragal ah in la bilaabo dadaallo wax-ku-ool ah oo lagu taageerayo hirgelinta mashaariicdan muhiimka ah
Horumarku kuma yimaado sugitaan keliya; wuxuu u baahan yahay iskaashi, isku-duubni iyo dadaal wadajir ah. Sidaa darteed, su'aashu waxay tahay: Ma diyaar baa aynu u nahay wax wada qabsi iyo isku tashasho dhab ah, mise waxaynu sii ahaan doonaa dad sugaya in xalalka meel kale looga keeno?
Go'aanka iyo mustaqbalka horumarka Sanaag wuxuu ku jiraa gacmaheenna. Aynu ka shaqayno midnimo, wax wada qabsi iyo horumar waara oo ay ka faa'iidaystaan jiilasha maanta iyo kuwa berri
Waxa Qoray: Mohamed Hassan Ali
