16/06/2025
SAWIRO: Wasaarada Haweenka, Arimaha qoyska iyo Xuquuqul insaanka Dowlada jubbaland ayaa 150 haween ah oo bartay xirfadaha farsamada gacanta sida cilaan saarka iyo toliska dharka tababar ugu soo gabagabeeysey magaalada Kismaayo, iyadoo tababarkaan uu socday muddo saddex bilood ah.
Munaasabadda xiritaanka tababarkan oo si heer sare ah loo agaasimay ayaa waxaa ka soo qeyb galay Wasiirada Wasaaraddaha Haweenka, Waxbarashada, Tamarta iyo Kheyraadka Biyaha Xildhibaano Agaasimayaal guud iyo gudoomiyaasha Haweenka iyo Marti Sharaf kale.
Haweenkii barnaamijka ka faa’iidaystay ayaa si weyn uga mahadceliyay tababarka iyo aqoonta la siiyay, iyagoo ballan qaaday in ay adeegsan doonaan xirfadahooda si ay u xoojiyaan dhaqaalaha qoysaskooda iyo kan bulshada.
Guddoomiyaasha Haweenka Gobolka Jubbada hoose iyo Degmada Kismaayo, Fadumo Aadan Kateela iyo Fadumo Maxamed Cabdi, ayaa haweenka kula dar-daarmay in aqoontooda ay bulshada oga faa’iideeyaan, ayna ka qeyb qaataan horumarinta deegaanka.
Guddoomiyaha Guddiga Arrimaha Bulshada ee Golaha Wakiilada Jubbaland, Xildhibaan Shire Cabdi Maxamed, oo qeyb ka ahaa Masuuliyiinta ka hadashay Munaasabadda xiritaanka tababarka haweenka bartay farsamada gacanta ayaa ammaanay dadaalka Wasaaradda Haweenka ay ku taageereyso horumarinta haweenka Jubbaland.
Wasiirka Wasaaradda Waxbarashada, Hidaha iyo Tacliinta Sare ee Dowladda Jubbaland, Cabdinaasir Seeraar Maax, oo qeyb ka ahaa kulanka ayaa ku bogaadiyay haweenka dedaalka ay ku bixiyeen helitaanka xirfaddan cusub oo wax badan ka tari doonta daboolida baahiyahooda.
Wasiirka Wasaaradda Haweenka Jubbaland, Cadar Cabdullaahi Ismaaciil, oo xafladda si rasmi ah u soo xirtay, ayaa faahfaahisay marxaladihii iyo Waxbarashadii ay haweenkani soo mareen.
Barnaamijkan tababarka farsamada gacanta ayaa qeyb ka ah dadaallada Wasaaradda Haweenka Arimaha qoyska iyo Xuquuqul insaanka Dowlada Jubbaland ay ugu jirto horumarinta haweenka, si ay u noqdaan kuwo isku filan oo kaalintooda ka qaata horumarka deegaanka.
