13/08/2026
Warbixin khaas ah: Maxaa Ka Socda Itoobiya? Fahamka Shirweynaha Wada-tashiga Qaranka iyo Muranka Ka Dhashay
​Dalka Itoobiya waxaa xilligan ka socda Shirweynaha Wada-tashiga Qaranka (Ethiopian National Dialogue Conference), oo ah geeddi-socod siyaasadeed oo baaxad weyn oo loogu talagalay in xal waara loogu raadiyo khilaafaadka taariikhiga ah, dagaallada sokeeye, iyo kala-qaybsanaanta qotada dheer ee ka jirta dalkan. Shirkan oo uu hoggaaminayo Guddiga Wada-tashiga Qaranka (ENDC) oo la aasaasay dhamaadkii sannadkii 2021, ayaa lagu daah-furay wajigiisa rasmiga ahaa bartamihii sannadkan 2026 magaalada Addis Ababa, iyada oo ay ka qaybgalayaan ku dhawaad 4,000 oo xubnood oo isugu jira xisbiyada siyaasadda, odayaasha dhaqanka, ururrada bulshada, iyo wakiillo ka socda dhammaan gobollada dalka.
​Ujeeddada ugu muhiimsan ee shirka loo qabtay ayaa ah in lagu dhiso isfahan qaran iyo dib-u-heshiisiin, iyada oo ergooyinka loo qeybiyay 8 ajande oo waaweyn. Ajandayaashan oo diiradda lagu saarayo arrimo xasaasi ah sida dhismaha qaranka, dib-u-eegista dastuurka, iyo nidaamka maamulka federaalka. mid ka mid ah kuwa ugu adag waa ajandaha "Magaalooyinka Federaalka" iyo mustaqbalka magaalada caasimadda ah ee Addis Ababa.
​Dooda ka socota xarunta shirka ayaa todobaadkan gashay xaalad cakiran oo cirka isku shareertay ka dib markii ay soo baxday talo-soo-jeedin lagu sifeeyay in ay ka timid dawlada dhexe taas oo dhigeysa in magaalada Addis Ababa loo aqoonsado caasimadda rasmiga ah ee Deegaanka Oromada.Tani waxay dhalisay cadho weyn oo ka timid xagga ergooyinka maadaama aan heerarkii hoose ee wada-tashiga lagaga soo doodin, iyadoo inta badan ergooyinku taageersanaayeen in magaaladu noqoto mid Federaal ah oo madax-bannaan.
Arrintan waxay keentay in xisbiyada mucaaradka ah sida NAMA iyo Enat Party ay dowladda ku eedeeyaan in ay wada-tashiga u adeegsanayso meel-marinta ajandeyasheedii siyaasadeed, waxayna ku baaqeen in ajandaha Addis Ababa si degdeg ah loo hakiyo.
​Si kastaba ha ahaatee, Guddoomiyaha Guddiga Wada-tashiga Qaranka, Prof. Mesfin Araya, ayaa beeniyay eedeymahaas, isagoo sheegay in guddigu uu yahay mid madax-bannaan oo aan wax go'aan ah oo final ah walii la gaarin. Wuxuu adkeeyay in dhammaan doodaha iyo talo-soo-jeedinta laga soo ururiyo kooxaha loo gudbin doono Shirweynaha Guud ee 4,000 xubnood, halkaas oo ka-qaybgalayaashu ay ku gaari doonaan go'aanka ugu dambeeya.
Si kooban, xaaladda shirkan waxay hadda maraysaa meel xasaasi ah, maadaama natiijada ka soo baxda wada-tashigan ay si toos ah u xaddidi doonto mustaqbalka siyaasadeed iyo xasiloonida dalkaas.
Adde show
