01/01/2026
Qoraalka hoose waxaa Qorey Wasiir Abshir Bukhaari
Ilaalinta Midnimada ma aha mid Cid gaar leedahay
Midnimada Jamhuuriyadda Federaalka Soomaaliya waa tiir-dhexaadka jiritaanka Qarankeena, waana masuuliyad sharci, qiyam iyo taariikheed oo ka sarraysa dan gaar ah, aragti kooxeed iyo mid qabiil(o) gaar ah.
Ilaalinteedu ma aha hawl cid gaar ahi leedahay balse waa waajib saaran muwaadin kasta, hay’ad kasta, iyo masuul kasta oo xil u haya ummadda. Waa waajib taariikheed iyo mas’uuliyad jiilba jiil u gudbiyo.
Taariikh ahaan, xildhibaannada Reer Woqooyi waxay door muuqda oo aan la dafiri karin ka qaateen geeddi-socodkii dib-u-dhiska dowladnimada Soomaaliyeed tan iyo burburkii dawladii dhexe ee kelitaliska ahayd. Muddo dheer waxay u taagnaayeen astaan midnimo iyo sharciyadda dawladnimo Soomaaliyeed xilli ay adkayd in la helo aragtidaas iyo hannaan dawladeed oo la wada leeyahay.
Joogitaankooda iyo doorkooda dawlad-dhis waxa uu xoojinayaa mabda’a ah in Qaranku yahay mid lagu mideysan yahay, la wada leeyahay. Sidaa awgeed, waa in la fahmaa gar-dhigashadooda iyo biyodhaca war-murtiyeedka ay soo saareen ee ah in arrinta Somaliland ay tahay mid wadahadal oo kaliya lagu xallin karo.
Hase ahaatee, waxaa iftiimin mudan in kala-duwanaanshaha aragtiyeed ee mararka qaarkood soo ifbaxa uu yahay mid muujinaya astaanta dimuqraadiyadeed ee xorriyadda fikirka iyo hadalka. Balse, qaabka loo muujiyo fikirkaas ayaa go’aamiya in uu noqdo mid dhisa ama dhaawaca wadajirka ummada. Waana marka hadalka laga leexiyo majarihiisa.
Sidaa daraaddeed, si ay iska caabbinteena ku aaddan duulaanka qaawan ee Isreal ku soo qaaday midnimadeena dhuleed iyo wadajirkeena ummadeed u noqdo mid lagu guulaysto, waxaa lama huraan ah in farriinteenu ay noqoto mid isku duuban, midaysan, isla markaana ka tarjumaysa wadajirkeena ummadeed iyo hay’adeedba. Sidoo kale waxaa waajb ah in laga fogaado hadallo ama ficillo keeni kara is-faham-waa, kala-qaybsanaan muuqata ama mid qarsoon si aan u ilaalino midnimada, sharafka, iyo mustaqbalka Soomaaliya.
Ugu dambayn, midnimada Soomaaliya waa waajib taariikheed, iyo mas’uuliyad jiilba jiil u gudbiyo. Kalintaada maanta aad ka qaadato ilaalinta midnimada dalka waa taariikhdaada beri iyo dhaxalka aad uga tageyso jiilka kaa dambeeya.
