04/08/2025
Dr. Cabdirisaaq Salaad Tobanle: "Gubta waa Degmo u qalanta, balse Cadaalad-darro ayaa hor istaagtay"
Dr. Cabdirisaaq Salaad Tobanle, oo kamid ah horjoogayaasha iyo dhakhaatiirta ka shaqeysa arrimaha bulshada iyo horumarka deegaanka Gubta, ayaa si qoto dheer uga hadlay muhiimadda degmeynta deegaanka Gubta.
Isagoo ka hadlay munaasabad lagu taageerayay degmeynta Gubta, waxa uu sheegay in:
> "Gubta waa deegaan taariikhi ah oo si buuxda u dhammeystiran dhammaan astaamaha ay degmo ku noqon karto – laga bilaabo tirada dadka, goobaha adeegyada bulshada, ganacsiga, iskuullada, xarumaha caafimaadka iyo isku xirka waddooyinka. Waxaase nasiib darro ah in ay cadaalad darro siyaasadeed hor istaagtay xaqii ay degmadaasi lahayd muddo dheer."
Dr. Tobanle ayaa intaa ku daray in shacabka deegaanka Gubta ay muujiyeen waxqabad muuqda, isla markaana ay yihiin dad dadaal badan oo mudan in codkooda la maqlo. Waxa uu xusay in ay jiraan dad tiro badan oo muddo sanado ah ku howlanaa sidii deegaankaasi degmo rasmi ah u noqon lahaa, balse weli la’isku dayayo in codkooda la hoos dhigo.
"Ma aha dalab siyaasadeed oo qabiil ku saleysan – waa xaq muwaadiniin Soomaaliyeed u leeyihiin helidda adeegyo rasmi ah iyo matalaad dowladeed."
Ugu dambeyn, Dr. Cabdirisaaq waxa uu ugu baaqay dowladda hoose ee gobolka Banaadir iyo Dowladda Federaalka in ay si dhab ah u eegaan codsiga deegaanka Gubta, oo ay si cadaalad ah uga fiirsadaan baahida dhabta ah ee ka jirta.
