03/01/2026
Soomaaliya iyo Golaha Ammaanka – January 2026
Hoggaaminta Soomaaliya ee Golaha Ammaanka Qaramada Midoobay (UNSC) bisha January 2026 ma aha oo keliya xil maamul, balse waa qalab sharci iyo diblomaasiyadeed oo leh saameyn istiraatiiji ah.
Inkasta oo shir-guddoomiyaha uusan lahayn cod dheeri ah, haddana waxa uu awood u leeyahay dejinta ajandaha, hagidda doodaha, iyo fasiraadda habraacyada Golaha, taas oo si toos ah u saameyn karta jihada doodaha iyo natiijooyinka ka soo baxa.
Soomaaliya waxa ay helaysaa fursad ay ku xoojiso mabda’a Xeerka Caalamiga ah, gaar ahaan marka la eego arrimaha miiska saaran bisha January 2026, kuwaas oo ay ka mid yihiin Yemen, Sudan, Suuriya, iyo amniga Badda Cas. Guddoominta doodahaas waxay Soomaaliya u suurtagelinaysaa in ay jihayso doodaha ku saabsan ilaalinta madaxbannaanida iyo midnimada dowladaha, amniga maraakiibta caalamiga ah, iyo waajibaadka ku xusan Axdiga Qaramada Midoobay.
Sidoo kale, ka-qaybgalka firfircoon ee doodaha ku saabsan qaraarrada iyo hawlgallada Qaramada Midoobay ee ku jira ajandaha bisha January sida (UNMHA, UNFICYP iyo BINUH) wuxuu xoojinayaa kaalinta Soomaaliya ee ah dal fahamsan hab-dhiska iyo shaqada hay’adaha caalamiga ah, isla markaana leh awood uu ku dhex-dhexaadiyo aragtiyo iska soo horjeeda.
Waxaa intaa dheer, doodaha heerka sare ee ku saabsan dib-u-qaabaynta Xeerka Caalamiga ah, kuwaas oo Madaxweynaha Jamhuuriyadda Federaalka Soomaaliya uu guddoomin doono, waxa ay Soomaaliya siinayaan fursad ay si sharci ah ugu muujiso in dalalka soo kabanaya, sida Soomaaliya, ay kaalin muuqata ay ku yeeshaan dejinta iyo horumarinta nidaamka sharciga caalamiga ah.
Ugu dambayn, guddoonka Soomaaliya ee Golaha Ammaanka wuxuu si weyn u xoojinayaa sumcadda sharci iyo mid siyaasadeed ee dalka, isagoo ka dhigaya Soomaaliya dal ka soo baxay marxaladdii uu ahaa mid kaliya qaata go’aannada, una gudbay marxalad uu ka mid yahay kuwa qaabeeya doodaha iyo jihada sharciga caalamiga ah.
W/Q Avv. Cali Somali
