10/09/2026
باعتباري معروفة بتبسيط المعلومة 😌
فاليوم ح أبسطلكم درس هياكل البيانات في Python.😊
من أكتر الدروس يلي بحس الطلاب بيضيعوا فيها جدًا وبتلخبطوا بين الأنواع، مع إنه لو فهمت الفكرة الأساسية، الباقي بصير سهل جدًا.
-------------------
أول شي، إنت لازم تفهم شو يعني المصطلح أصلًا لتعرف تستخدمه.
1- شو يعني Data Structure؟
إنت ح تكون مبرمج، يعني ح تتعامل مع بيانات كثيرة.
وهاي البيانات مطلوب منك تقدر:
تخزنها بمتغير
تعدّل عليها
تحذف منها
تمنع التكرار أحيانًا
تبحث فيها عن قيمة
توصل لعنصر معين
ترتبها أحيانًا
وكل هالحكي بصير عن طريق هياكل البيانات Data Structures.
ببساطة جدًا:
هي طريقة لتنظيم وتخزين البيانات بحيث تقدر توصل إلها وتتعامل معها بسهولة.
لهون تمام؟
---------------------
2- عندك في Python أنواع أساسية رح تتعامل معها كثير:
list
string
set
tuple
dictionary
طيب ليش كل هالأنواع؟ 🤔
لأنه مو كل البيانات بدك تتعامل معها بنفس الطريقة.
مثلًا:
------------------------------
إذا عندك مجموعة بيانات وبدك تكون قادر تضيف وتحذف وتعدّل وترتب وتوصل للعناصر بسهولة، غالبًا رح تستخدم:
list
مثال:
students = ["Ahmad", "Sara", "Ali"]
----------------------
طيب أحيانًا تكون عندك بيانات ما بدك فيها تكرار.
هون ممكن تستخدم:
set
مثال:
skills = {"Python", "Django", "Python"}
حتى لو كتبت "Python" أكتر من مرة، الـ set ما رح تحتفظ فيها مكررة.
---------------------------------
طيب أحيانًا عندك بيانات ثابتة وما بدك تعدّل عليها، بس بدك تقدر توصل لكل عنصر فيها.
هون ممكن تستخدم:
tuple
مثال:
location = (32.6, 36.1)
------------------------
طيب والـ string؟
هي ببساطة للبيانات النصية.
مثلاً:
name = "Wafaa"
اسم مستخدم، جملة، نص من ملف، رسالة... إلخ.
-------------------
بصفّى معنا الـ dictionary 😌
برأيكم هي لشو؟
الـ dictionary ممتازة لما تكون عندك عدة بيانات مرتبطة بشي واحد وبدك كل قيمة تكون واضحة شو بتمثل.
مثلًا عندك موظف، وكل موظف إله:
الاسم
العمر
الرقم الوظيفي
بدل ما تخزنهم بشكل عشوائي، بتحطهم بهالشكل:
employee = {
"name": "Ahmad",
"age": 25,
"id": 101
}
هيك لما أشوف الكود بعرف مباشرة:
هذا الاسم، وهذا العمر، وهذا الرقم.
ما فهمت الفكرة؟ 😅
خليني أعطيك مثال ثاني.
تخيّل عم تعمل مشروع لمطعم 🍔
المطعم فيه وجبات، وكل وجبة إلها:
اسم
سعر
وصف
وتوفر مثلًا
فإنت ممكن تخزن الوجبة هيك:
meal = {
"name": "Burger",
"price": 5,
"available": True
}
هيك صار عندك كل المعلومات الخاصة بالوجبة بمكان واحد، وكل معلومة إلها اسم واضح.
---------------------
أما بخصوص العمليات:
كيف تضيف؟
كيف تحذف؟
كيف تعدّل؟
فهي مو صعبة.
ببساطة لما تخزن أي نوع بمتغير، جرّب تكتب اسم المتغير وتحط بعده نقطة . داخل الـ IDE:
my_list.
رح تلاقي التوابع والـ methods المتاحة لهذا النوع، مثل:
append()
remove()
sort()
ومع الوقت رح تحفظ أهمها من كتر الاستخدام.
المهم قبل ما تحفظ التوابع إنك تفهم:
ليش أستخدم List هون؟
ليش Set؟
ليش Tuple؟
وليش Dictionary؟
لأنه لما تفهم اختيار هيكل البيانات المناسب، العمليات نفسها بتصير أسهل بكتير.
هذا كان شرحي المبسط لجلسة هياكل البيانات الأساسية في Python
-----------------
بعرف إن المنشور طويل شوي 😅
بس حبيت يكون الشرح كامل وواضح قدر الإمكان.
ولهيك ح رتّبلكم كل هالمعلومات بشكل أفضضل وأسهل للمراجعة، وأعملها ملخص PDF مرتب عن هياكل البيانات في Python مع أمثلة ومقارنة بين الأنواع.
قريبًا إن شاء الله 💜
------------------
م. وفاء أبو زلفة
سوريا - درعا
