A-Lin Credo

Home
A-Lin Credo

Guided by Lumen Christi, Alin Credo is dedicated to Catholic faith formation, religious news, moral virtue, and the harmony of faith and reason.

05/07/2026

FSSPX အသင်း သာမက Traditional Latin Mass (TLM) ကျင်းပသည့် အခြားသော ရဟန်း အသင်းများ အကြောင်း သိကောင်းစရာ

SSPX ဟာ နာခံခြင်း မရှိမှု အပေါ် အခြေခံပြီး ရဟန်းမင်းကြီး လီယို ၁၄ လက်ထက် အသင်းတော် အတွင်း အခုလို ဆုံးဖြတ်ခဲ့ရတာ ဖြစ်ပေမယ့် SSPX လိုမျိုး လက်တင် ထုံးတမ်း အစဉ်အလာ အတိုင်း မစ္ဆား ကျင်းပတဲ့ အသင်းအဖွဲ့တွေ ရှိနေဆဲ ဖြစ်တဲ့ အပေါ်မှာ အဲဒီ အသင်းများ အကြောင်း ဝေမျှလိုက်ပါတယ်။

လက်ရှိ အချိန်မှာတော့ SSPX နဲ့ ပေါင်းစည်းမှုတွေ ရှိနေဆဲ ဖြစ်ရင် ရှောင်ရှားရမှာ ဖြစ်ပြီး ဒါမှသာလျှင် Excommunication ဆိုင်ရာ ကန့်သတ်အရေးယူမှုများမှ ကင်းလွှတ်မှာ ဖြစ်ပါတယ်။

Vatican နဲ့ အပြည့်အဝ ပေါင်းစည်းပြီး ပုပ်ရဟန်းမင်းကြီးရဲ့ ဦးဆောင်မှုကို နာခံကာ တရားဝင်အသိအမှတ်ပြုထားတဲ့ လက်တင် ထုံးတမ်း လိုက်တဲ့ ရဟန်း အသင်းဂိုဏ်းတွေ အကြောင်းကို ဖော်ပြအပ်ပါတယ်။

၁။ Institute of Christ the King Sovereign Priest
ခရစ်တော် ဘုရင် ထာဝရ ရဟန်း အသင်း

ဒီအဖွဲ့အစည်းဟာ ပုပ်ရဟန်းမင်းကြီး စိန့်ဂျွန်ပေါလ် ၂ (Pope Saint John Paul II) လက်ထက်မှာ ဘုန်းတော်ကြီးတွေကို လက်တင်မစ္ဆားပူဇော်ခွင့် ရက်ရက်ရောရော ပေးနိုင်ဖို့ တိုက်တွန်းချက်နဲ့အတူ ပေါ်ပေါက်လာတာ ဖြစ်ပါတယ်။ သူတို့ဟာ ပုပ်ရဟန်းမင်းကြီး စိန့်ဂျွန် ၂၃ (Pope Saint John XXIII) က ၁၉၆၂ ခုနှစ်မှာ ထုတ်ပြန်ခဲ့တဲ့ ဝတ်ပြုကိုးကွယ်ခြင်းဆိုင်ရာ စာအုပ်များ (Liturgical Books) အတိုင်း ရှေးထုံးရိုးရာ မပျက် လက်တင်မစ္ဆားတရားကို အစဉ်အလာမပျက် ပူဇော်ကြပါတယ်။

၂။ Priestly Fraternity of Saint Peter (F.S.S.P.)
ရှင်ပီတာ၏ ညီအစ်ကို ရဟန်း အသင်း

၁၉၈၈ ခုနှစ်မှာ ပုပ်ရဟန်းမင်းကြီး စိန့်ဂျွန်ပေါလ် ၂ ကပဲ ကက်သလစ်အသင်းတော် တစ်လုံးတစ်ဝတည်းဖြစ်ရေးနဲ့ သာသနာပြုလုပ်ငန်းသစ်တွေအတွက် ရည်ရွယ်ပြီး တည်ထောင်ခွင့်ပြုခဲ့တဲ့ အဖွဲ့အစည်းဖြစ်ပါတယ်။ ဒီအဖွဲ့ရဲ့ ကနဦး နာယကကြီးကတော့ နောင်မှာ ပုပ်ရဟန်းမင်းကြီး ဘင်နီဒစ် ၁၆ (Pope Benedict XVI) ဖြစ်လာမယ့် ဂျိုးဇက် ကာဒီနယ် ရက်ဇင်းဂါ (Joseph Cardinal Ratzinger) ဖြစ်ပါတယ်။ သူတို့ရဲ့ အဓိက တာဝန်နဲ့ ဝိညာဉ်ရေးရာကတော့ မစ္ဆားတရားတင်မကဘဲ အခြားသော Sacraments (စက္ကရာမင်တူ) တွေနဲ့ Divine Office တွေကိုပါ ၁၉၆၂ ရဲ့ လက္တင်ဝတ်ပြုစာအုပ်အတိုင်း အခမ်းအနား အပြည့်အစုံနဲ့ ပူဇော်ပေးဖို့ဖြစ်ပါတယ်။

၃။ Institute of the Good Shepherd
ကောင်းသော သိုးထိန်း ရဟန်း အသင်း

ပုပ်ရဟန်းမင်းကြီး ဘင်နီဒစ် ၁၆ ရဲ့ လမ်းညွှန်မှုနဲ့ ထောက်ပံ့မှုအောက်မှာ ၂၀၀၆ ခုနှစ်ကမှ တည်ထောင်ခဲ့တဲ့ သာသနာပြု လက်တင် ရဟန်း အဖွဲ့အစည်းဖြစ်ပါတယ်။ ဒီအဖွဲ့ရဲ့ ရည်ရွယ်ချက်ကတော့ ကက်သလစ်အသင်းတော်အတွင်းမှာ ရှိတဲ့ ရိုးရာအစဉ်အလာနဲ့ ဝတ်ပြုကိုးကွယ်မှုဆိုင်ရာ အဖိုးတန် ထုံးတမ်း ရတနာတွေကို ဘာသာသူတွေဆီ မျှဝေပေးဖို့ဖြစ်ပါတယ်။ ၁၉၆၂ ခုနှစ်ရဲ့ ရိုးရာရောမဝတ်ပြုပုံတွေအတိုင်းသာ သီးသန့်အသုံးပြုပြီး ဒေသအသီးသီးက ဆရာတော်တွေရဲ့ သာသနာလုပ်ငန်းတွေမှာ ကူညီဆောင်ရွက်ပေးနေပါတယ်။

၄။ The Premonstratensians (Norbertines)
နော်ဘာတင်း ရဟန်း အသင်းဂိုဏ်း

၁၁၂၀ ခုနှစ်ကတည်းက စိန့်နောဘတ် (Saint Norbert) နဲ့ သူ့ရဲ့ရဲဘော်ရဲဘက်တွေက ပြင်သစ်နိုင်ငံမြောက်ပိုင်းမှာ တည်ထောင်ခဲ့တဲ့ အလွန်သက်တမ်းရင့်လှတဲ့ သာသနာပြု အဖွဲ့အစည်းဖြစ်ပါတယ်။ ၁၉၆၀ ပြည့်လွန်နှစ်တွေနောက်ပိုင်း ကက်သလစ်အသင်းတော်တွေက ဒေသန္တရဘာသာစကားတွေဆီ ကူးပြောင်းသွားကြတဲ့အချိန်မှာတောင် ဒီအဖွဲ့ဟာ သူတို့ရဲ့ ကိုယ်ပိုင်ထူးခြားတဲ့ Norbertine Rite အပြင် စံပြ လက်တင်မစ္ဆားတရားတွေကိုပါ ဒီနေ့အထိ ခိုင်ခိုင်မာမာ ထိန်းသိမ်းစောင့်ရှောက်လာခဲ့ကြပါတယ်။

၅။ Diocesan Traditional Latin Mass
မိမိ သာသနာ အလိုက် ကျင့်ကြံသော လက်တင် မစ္ဆားတရားများ

ဒါကတော့ သီးခြား လက်တင် မစ္ဆားကျင်းပသော ရဟန်း အသင်းများ မဟုတ်ဘဲ မိမိတို့ သာသနာနယ် အသီးသီးက ဒေသန္တရ ဆရာတော် (Local Bishop) ရဲ့ တရားဝင် ခွင့်ပြုချက်နဲ့ ဘန်ုးတော်ကြီး တပိုင် သာသနာနယ် (Parish) တွေမှာ ပူဇော်တဲ့ လက်တင်မစ္ဆား ဖြစ်ပါတယ်။ သို့သော်လည်း မကြာသေးမီက ပုပ်ဖရန်စစ် လက်ထက်မှာ ထွက်ပေါ်လာတဲ့ "Traditionis Custodes" စာချွန်တော်ပါ စည်းမျဉ်းတွေကြောင့် ဆရာတော်တွေနဲ့ ဗာတီကန်ရဲ့ ပိုမိုတင်းကျပ်တဲ့ ထိန်းချုပ်မှုအောက် ရောက်သွားပြီး ပူဇော်နိုင်တဲ့နေရာတွေ နည်းပါးနေသေးပါတယ်။

၆။ Canons Regular of St. John Cantius

၁၉၉၈ ခုနှစ်မှာ အမေရိကန်နဲ့ ကနေဒါနိုင်ငံတစ်ခွင်မှာရှိတဲ့ ဘာသာသူတွေအတွက် တည်ထောင်ခဲ့တဲ့ အဖွဲ့အစည်းဖြစ်ပါတယ်။ သူတို့ဟာ ပုံမှန်ဝတ်ပြုကိုးကွယ်မှု (Ordinary Form) ရော၊ တမူထူးခြားသော ထုံးတမ်းလာ လက်တင်ဝတ်ပြုမှု (Extraordinary Form) ကိုပါ ကျင်းပဝတ်ပြုနေပြီး အသင်းတော်ရဲ့ နှစ်ရာထောင်ချီ ရိုးရာ အစဉ်အလာ မပျက်သော တေးဂီတ၊ အနုပညာ၊ ဒေသနာတော်နဲ့ ဝတ်ပြုရေးဆိုင်ရာ အစဉ်အလာတွေကို ထိန်းသိမ်းမြှင့်တင်ပေးနေပါတယ်။

⚠️ အရေးကြီးတဲ့ သတိပြုရန်အချက်များကတော့ (Important Points) လက်ရှိ SSPX (FSSPX) အခြေအနေမှာ ဗာတီကန် က SSPX အဖွဲ့ကို သာသနာမှ နောင်ကြဉ်ထားတဲ့ (Excommunicated) ဆိုင်ရာ ပြစ်ဒဏ်ကို ခံယူရတဲ့ ကာလ ဖြစ်ပြီး SSPX ရဲ့ လက်တင်မစ္ဆားတရားဟာ စည်းမျဉ်းစည်းကမ်းတွေအရ တရားမဝင်တော့ပါ (Illicit)။

စက္ကရာမင်တူများ ပျက်ပြယ်ခြင်း

တချိန်တုန်းက ပုပ်ဖရန်စစ် လက်ထက် သနားကရုဏာတော်နှစ် အထိမ်းအမှတ်အဖြစ် Confession (အာပတ်ဖြေခြင်း) နဲ့ Matrimony (လက်ထပ်ထိမ်းမြားခြင်း) စက္ကရာမင်တူးတွေအတွက် SSPX များကို အာဏာလွှဲအပ်ပေးခဲ့ဖူးပေမယ့် အခုအချိန်မှာတော့ အဲ့ဒီအခွင့်အာဏာတွေ မေပးတော့လို့ သူတို့ဆီမှာ သွားရောက်ပြီး အာပတ်ဖြေခြင််းနဲ့ ကိုယ်တော်မြတ် ပင့်ယူရင် တရားမဝင်တော့ပါ။

ဒါကြောင့် အထက်ပါ လက်တင် မစ္ဆားတရား ကျင်းပသော အခြား တရားဝင် ရဟန်း အသင်း အဖွဲ့တွေရဲ့ နေရာတွေမှာပဲ သွားရောက်ဖို့ လိုအပ်ပြီး SSPX ကျောင်းဆောင်တွေမှာ မစ္ဆားတရားတက်တာ သို့မဟုတ် စက္ကရာမင်းတူ ခံယူတာမျိုးကို ဗာတီကန်ရဲ့ တရားဝင်သတင်းထုတ်ပြန်ချက် မထွက်မချင်း လောလောဆယ် ရှောင်ကြဉ်ထားဖို့ အကြံပြုအပ်ပါတယ်။

သင်နဲ့နီးစပ်တဲ့နေရာမှာ လက်တင် မစ္ဆားကျင်းပခြင်းကို ရှာဖွေဖို့ https://www.latinmass.com/find-latin-mass မှာ ဝင်ရောက်ကြည့်ရှုနိုင်ပါတယ်။

Lawrence
4 July 2026, Saturday

03/07/2026

ခုတလော နာမည်ကြီးနေတဲ့ အသင်းတော်မှ ဖယ်ကြဉ်ခြင်း ခံရသော SSPX သတင်း တစေ့တစောင်း

နေ့ချင်းညချင်း ကမ္ဘာတဝှမ်းက SSPX နောက်လိုက် ဆရာတော်၊ ရဟန်းတော်၊ သီလရှင်၊ လူဝတ်ကြောင် အမျိုးသား၊ အမျိုးသမီးနှင့် ကလေး သူငယ်များ မကျန် စက္ကရမင်းတူး ဖန်ဆင်း၊ ကျင့်သုံးခွင့် ပိတ်သွားသည့် အသင်းတော်မှ ဖယ်ကြဉ်ခံရသည့် ဖြစ်စဉ် Excommunication အကြောင်းကို စုစည်း ဖော်ပြအပ်ပါတယ်။

၂၀၂၆ ခုနှစ်၊ ဇူလိုင်လ ၁ ရက်နေ့တွင် ဆွစ်ဇာလန်နိုင်ငံ၊ အီကွန်း (Écône) မြို့၌ ထုံးတမ်း အစဉ်အလာကို လိုလားသော ကက်သလစ် အဖွဲ့ဖြစ်သော SSPX (Society of St. Pius X) သည် ပုပ်ရဟန်းမင်းကြီး လီယို (၁၄) ၏ တရားဝင်ခွင့်ပြုချက်မရှိဘဲ ဆရာတော် (ဘစ်ရှော့) အသစ် ၄ ပါးကို ခန့်အပ်ခဲ့သဖြင့် အလိုအလျောက် အသင်းတော်မှ ထုတ်ပယ်ခြင်း (Latae Sententiae Excommunication) - Automatic Excommunication ခံရကြောင်း ဗာတီကန်က ချက်ချင်းကြေညာခဲ့သည်။

SSPX အဖွဲ့သည် ၎င်းတို့၏ အသင်းဂိုဏ်း အကြီးအကဲများ အသက်ကြီးရင့်လာမှုကြောင့် ညှိနှိုင်းရန် ပြီးခဲ့သည့် ၂၀၂၆ ခုနှစ်၊ ဖေဖော်ဝါရီလက ပုပ်ရဟန်းမင်းကြီးနှင့် တိုက်ရိုက်တွေ့ဆုံခွင့် (Papal Audience) ရရှိရန် ကြိုးပမ်းခဲ့ဖူးသော်လည်း ဆွေးနွေးမှုများကို ဗာတီကန်၏ ယုံကြည်ခြင်းနှင့်ဆိုင်ရာ ဝိနည်းဌာန (DDF - Dicastery for the Doctrine of the Faith) ၏ အကြီးအမှူး ကာဒီနယ် ဗစ်တာ မာနျူရယ် ဖာနန်ဒက်ဇ် နှင့် SSPX ၏ အသင်းဂိုဏ်း ဉသျှောင် ဖာသာရ် ဒါဗီဒီ ပါဂလီယာရာနီ (SSPX Superior General Father Davide Pagliarani) တို့အကြားသာ ဖြေရှင်းရန် ညွှန်ကြားခဲ့သည်။

ဇွန်လ ၃၀ ရက်နေ့တွင် ပုပ်ရဟန်းမင်းကြီး လီယို (၁၄) ကိုယ်တိုင် "ကျေးဇူးပြုပြီး နောက်ဆုတ်ပေးကြပါ" ဟု SSPX အသင်းဂိုဏ်းထံ တိုက်ရိုက် ကိုယ်တိုင် ရေးသားသည့် စာဖြင့် အသနားခံခဲ့သော်လည်း SSPX က လျစ်လျူရှုခဲ့ကာ ဆရာတော် (ဘစ်ရှော့) အသစ် ၄ ပါးကို ခန့်အပ်ခဲ့သဖြင့် အသင်းတော် အတွင်း သမိုင်းဝင် အကွဲအပြဲ Schism နှင့်အတူ ပါဝင်ပတ်သက်သည့် ဆရာတော်များ၊ ရဟန်းတော်များ အားလုံး အလိုအလျောက် အသင်းတော်မှ ထုတ်ပယ်ခြင်း (Latae Sententiae Excommunication) ခံရကြောင်း ဗာတီကန်က ချက်ချင်းကြေညာခဲ့ရာ ကမ္ဘာတစ်ဝှမ်းတွင် သတင်းကြီး အဖြစ် လှုပ်ခတ်သွားခဲ့သည်။

ယခုဗာတီကန်၏ အမိန့်ဒီကရီသည် ယခင်ထက် ပိုမိုပြင်းထန်ပြီး SSPX ရဟန်းတော်များကိုပါ ဂိုဏ်းခွဲသူများအဖြစ် သတ်မှတ်ကာ ၎င်းတို့ပေးသော အာပတ်ဖြေခြင်းနှင့် လက်ထပ် ထိမ်းမြားခြင်း မင်္ဂလာများကို တရားမဝင် (အထမမြောက်) ကြောင်း ကြေညာခဲ့သည့်အပြင် SSPX သို့ တရားဝင် ပူးပေါင်းသူ သို့မဟုတ် ၎င်းတို့၏ မစ္ဆားတရားသို့ ပုံမှန်တက်ရောက်ပြီး SSPX ရပ်တည်ချက်ကို ထောက်ခံသော သာမန်ဘာသာသူများ (အမျိုးသား၊ အမျိုးသမီးနှင့် မိသားစုများ) အားလုံးပါ အသင်းတော်မှ ထုတ်ပယ်ခြင်းခံရမည် ဖြစ်ကြောင်း ပြတ်ပြတ်သားသား သတိပေးထားသည်။

ဤပြင်းထန်သော ဆုံးဖြတ်ချက်ကြောင့် SSPX ရဟန်းတော်များသည် မစ္ဆားတရားပူဇော်ခွင့်နှင့် စက္ကရမင်တူပေးပိုင်ခွင့်များ တရားဝင် ဆုံးရှုံးသွားရပြီး SSPX နောက်လိုက် လူဝတ်ကြောင် ကက်သလစ် ဘာသာသူများအတွက်လည်း ကိုယ်တော်မြတ်ပင့်ယူခြင်း၊ အာပတ်ဖြေခြင်း၊ ကက်သလစ် အသင်းတော်တွင် လက်ခပ် ထိမ်းမြား မင်္ဂလာခံယူခြင်း၊ နာမကျန်းသူများ ပရိတ်တော် ဆီလူးခြင်း ခံယူခွင့်နှင့် ကလေးများကို တရားဝင် အသင်းတော်တွင် ဆေးကြောခြင်းမင်္ဂလာ ပေးခွင့်များ ပိတ်ပင် ကန့်သတ်ခံရမည် ဖြစ်သည်။

အသင်းတော်မှထုတ်ပယ်ခြင်းသည် ထာဝရ အပြစ်စီရင်ရန်မဟုတ်ဘဲ ပြုပြင်ပြောင်းလဲရန် ရည်ရွယ်သည့် ဆေးဝါး သဖွယ် အပြစ်ဒဏ် ပေးခြင်းဖြစ်သောကြောင့် ဤကမ္ဘာလုံးဆိုင်ရာ အကွဲအပြဲကို နောင်တရခြင်းနှင့် ပြန်လည်သင့်မြတ်ခြင်းအားဖြင့်သာ ပြန်လည်ရုပ်သိမ်းနိုင်ပါသည်။ ဤပိတ်ပင်မှုကို ရုပ်သိမ်းနိုင်ရန်အတွက် SSPX ဆရာတော်များနှင့် ရဟန်းတော်များသည် မိမိတို့၏ အမှားကို တရားဝင်အသိအမှတ်ပြုကာ ပုပ်ရဟန်းမင်းကြီး လီယို (၁၄) ၏ ရဟန်းမင်းကြီး အခွင့်အာဏာအောက်သို့ ဗာတီကန် ဝိနည်း ဌာန (DDF) မှတစ်ဆင့် ပြန်လည်ဝင်ရောက်ရမည်ဖြစ်ပြီး သာမန်ဘာသာသူများအနေဖြင့်မူ ဂိုဏ်းခွဲမှုကို ဆက်လက်ထောက်ခံခြင်းမပြုဘဲ SSPX မဟုတ်သော ကက်သလစ် ရဟန်းတော် သို့မဟုတ် ဆရာတော်ထံတွင် အာပတ်ဖြေခြင်းမင်္ဂလာအားဖြင့် အသင်းတော်နှင့် ပြန်လည်သင့်မြတ်အောင် လုပ်ဆောင်ရမည် ဖြစ်သည်။

Lawrence
3 July 2027, Friday

03/05/2026

အကျင့်သီလဖြင့် တရားပြခြင်း

အေဒီ ၁၅၀၀ ပြည့်လွန်နှစ်များက (Jesuit) ဂျက်စွက် သာသနာပြု အသင်းဂိုဏ်းမှ စိန့်ဖရန်စစ်ဇေးဗီးယား (St. Francis Xavier) နဲ့ သူ့ရဲ့အဖော်တွေ ဂျပန်နိုင်ငံကို ရောက်လာချိန်မှာ သူတို့ဟာ လုံးဝ ဆင်းရဲနွမ်းပါးစွာ နေထိုင်ဖို့ ရွေးချယ်ခဲ့ကြပါတယ်။ သူတို့ဟာ ရိုးရှင်းပြီး ဟောင်းနွမ်းနေတဲ့ ဝတ်ရုံတွေကို ဝတ်ဆင်ကာ လမ်းမတွေပေါ်မှာ ခြေဗလာနဲ့ လျှောက်သွားခဲ့ကြတယ်။ လပေါင်းများစွာတိုင်အောင် သူတို့ကို ဂျပန် ဒေသခံတွေက အလွန်ရန်လိုတဲ့ အပြုအမူတွေနဲ့ ဆက်ဆံခဲ့ကြပါတယ်။ ခဲတွေနဲ့ ပေါက်ကြတယ်၊ ဆဲဆိုကြတယ်၊ လူရာမသွင်းဘဲ ဖယ်ကြဉ်ထားခဲ့ကြပါတယ်။

တစ်နေ့မှာတော့ ယာမာဂူချီ (Yamaguchi) မြို့ရဲ့ လူစည်ကားတဲ့ ကွင်းပြင်တစ်ခုမှာ ဇေးဗီးယားရဲ့ အဖော်ဖြစ်သူ ဘရာသာ ဂျူအန် ဖာနန်ဒက်ဇ် (Brother Juan Fernandez) ဟာ သမ္မာကျမ်းစာကို သူသိတတ်တဲ့ ဂျပန် ဘာသာစကားနဲ့ အသံထွက် ဖတ်ပြနေခဲ့ပါတယ်။ အဲဒီနေ့က လူအုပ်ကြီးဟာ ပိုပြီးတော့တောင် ရန်လိုနေခဲ့ကြပါတယ်။

ရုတ်တရက်ဆိုသလို ဒေါသထွက်နေတဲ့ လူတစ်ယောက်ဟာ လူအုပ်ကြီးထဲကနေ ရှေ့ကို တိုးထွက်လာခဲ့ပါတယ်။ သူဟာ ဘရာသာ ဖာနန်ဒက်ဇ်ရဲ့ အနီးကပ်ဆုံးကို သွားပြီး ဆဲဆိုကာ သူ့မျက်နှာကို တံတွေးနဲ့ အားပါးတရ ထွေးချလိုက်ပါတယ်။

အဲဒီအချိန်မှာ အနီးအနား ကွင်းပြင်တစ်ခုလုံး တိတ်ဆိတ်သွားခဲ့ပါတယ်။ လူတစ်ယောက်ကို ကိုယ်ထိလက်ရောက် စော်ကားလိုက်တာနဲ့ မိမိရဲ့ ဂုဏ်သိက္ခာကို ကာကွယ်ဖို့ ချက်ချင်း ဓားရှည် ဆွဲထုတ်ပြီး ဖြေရှင်းလေ့ရှိတဲ့ ဂျပန် ယဉ်ကျေးမှုမှာ ဒီနိုင်ငံခြားသားက ဘယ်လို ပြန်တုံ့ပြန်မလဲဆိုတာကို လူအုပ်ကြီးက စောင့်ကြည့်နေခဲ့ကြပါတယ်။

ဒါပေမယ့် ဘရာသာ ဖာနန်ဒက်ဇ်ဟာ မကျေမနပ် ဟန်အမူအရာမျိုး၊ ပြန်လည်အော်ဟစ်တာမျိုး မလုပ်ခဲ့တဲ့အပြင် အနည်းငယ်တောင် တုန်လှုပ်သွားခြင်း မရှိခဲ့ပါဘူး။ သူဟာ သူ့အိတ်ကပ်ထဲက လက်ကိုင်ပဝါ အဝတ်စလေး တစ်စကို တည်တည်ငြိမ်ငြိမ်ပဲ ထုတ်လိုက်ပြီး သူ့မျက်နှာက တံတွေးတွေကို သုတ်လိုက်ပါတယ်။ ပြီးတော့ ဒေါသထွက်တဲ့ စကားတစ်ခွန်းမှ မဆိုဘဲ သူ့ရဲ့ စာအုပ်ကို ပြန်ငုံ့ကြည့်ကာ သူ ဟောပြောနေတဲ့ နေရာကနေပဲ ဆက်ပြီး ဟောပြောနေခဲ့ပါတယ်။

ဒီလောက် မယုံနိုင်စရာကောင်းတဲ့ သည်းခံနိုင်စွမ်းကို မြင်တွေ့လိုက်ရတဲ့ လူအုပ်ကြီးထဲက တီးတိုးပြောဆိုသံတွေ ထွက်လာပါတယ်။

လူအုပ်ကြီးက (လှောင်ပြောင်လျက်) " ကြည့်စမ်း! ဒီဘရာသာက သူရဲဘောကြောင်တဲ့သူပဲ။ သူ့ကိုယ်သူ ကာကွယ်ဖို့တောင် သတ္တိမရှိဘူး။ သူ့ရဲ့ ဘုရားသခင်ကြောင့် ဒီလူ ပျော့ညံ့စေတာပဲ!"လို့ အော်ပြောပါတယ်။

ဘေးနားကကြည့်နေသူ: "ဒီလို စော်ကားခံရတာကို ဓားရှည် မထုတ်ဘဲ ငြိမ်ခံနေတဲ့လူမျိုး ငါ တစ်ခါမှ မမြင်ဖူးဘူး။ ဒီလူ ဒေါသမထွက်တတ်ဘူးလား။"လို့ မေးခွန်းထုတ်ပါတယ်။

လူအုပ်ကြီးရဲ့ အနောက်ဘက်မှာ တိတ်ဆိတ်စွာ ရပ်နေသူတစ်ယောက်ကတော့ အလွန်ပညာတတ်ပြီး လူရိုသေ ရှင်ရိုသေ ဂျပန်ပညာရှိတစ်ဦး ဖြစ်ပါတယ်။ သူဟာ ဒီသာသနာပြုတွေရဲ့ သွန်သင်ချက်တွေကို အလွန်သံသယရှိစွာနဲ့ စောင့်ကြည့်နေခဲ့တာ ရက်အတော်ကြာခဲ့ပါပြီ။ ဒါပေမယ့် ဒီဖြစ်ရပ်လေးက သူ့အတွက် အရာအားလုံးကို ပြောင်းလဲသွားစေခဲ့ပါတယ်။

ပညာရှိကြီးက ထွက်လာပြီး လူအုပ်ကြီးကို လှမ်းပြောလိုက်ပါတယ်။
“မင်းတို့အားလုံး မျက်ကန်းတွေပဲ။ သူရဲဘောကြောင်တဲ့သူဆိုရင် ကြောက်ပြီး ထွက်ပြေးသွားမှာပေါ့။ ငွေကြေးနဲ့ အာဏာအတွက် လိမ်ညာနေတဲ့သူဆိုရင်လည်း သူ့ရဲ့ မာနကို ကာကွယ်ဖို့ ပြန်ချမှာပေါ့။ ဒါပေမယ့် ဒီလူက အဲဒီလို လုပ်ရပ်နှစ်ခုလုံးကို မလုပ်ခဲ့ဘူး။"

ဘေးနားကကြည့်နေသူ: "ဒါဆို သူက ဘယ်လိုလူစားလဲ။"လို့ မေးခွန်းထုတ်ပါတယ်။

ဂျပန် ပညာရှိကြီးက "သူ့ဆီမှာ ငါတို့ နားမလည်နိုင်တဲ့ ငြိမ်းချမ်းမှုတစ်ခု ရှိတယ်။ ဒီလောက် ဆိုးဆိုးရွားရွား အရှက်ခွဲခံရမှုကို ဒေါသလုံးဝမထွက်ဘဲ/ လက်စားချေလိုစိတ် လုံးဝမရှိဘဲ အပြည့်အဝ တည်ငြိမ်စွာနဲ့ သည်းခံနိုင်တာ... ဒါဟာ အားနည်းချက် မဟုတ်တော့ဘူး။ ဒီလို သည်းခံနိုင်စွမ်း ကြီးမားတယ် ဆိုတာ သဘာဝလွန် ခွန်အား တစ်ခုပဲ။ ကိုယ့်ရဲ့ ဒေါသကို ဒီလောက် ပြီးပြည့်စုံအောင် ထိန်းချုပ်နိုင်ဖို့ သင်ပေးတဲ့ တရားဟာ ကောင်းကင်ဘုံက လာတာ သေချာတယ်။"လို့ သုံးသပ်ပြပါတယ်။

အဲဒီ သည်းခံခြင်း ပါရမီကို ပြသနိုင်လိုက်တဲ့ အတွက် ယာမာဂူချီမြို့မှာ ကက်သလစ် ရဟန်းများ အပေါ် လူထုရဲ့ ရန်လိုမှုတွေကို သိသိသာသာ လျော့ကျသွားပါတယ်။ ဒီလို အရှက်ရစေတဲ့ လုပ်ရပ်ကို သည်းခံပြမှုကို ကိုယ်တိုင် မြင်တွေ့ခဲ့ရတဲ့ ပညာရှိဟာ ကက်သလစ် ရဟန်းများကို အလွန်ပဲ လေးစားသွားခဲ့ပြီး အဲဒီနေ့မှာပဲ သူ့အိမ်ကို ဖိတ်ကာ တရားဟောဖို့ တောင်းဆိုခဲ့ပါတယ်။

အဲဒီ ပညာရှိကြီးဟာ ဂျက်စွက် သာသနာပြု ခရီးစဉ်မှာ ပထမဆုံး ခရစ်ယာန် ဘာသာဝင် ဖြစ်လာတဲ့ အသုတ်မှာ ပါဝင်လာပါတယ်။ ဒီပညာရှိကြီးက ခရစ်ယာန် ဘာသာဝင်ဖို့ ဆေးကြောခြင်း ခံယူပြီးနောက် အခြား ဂျပန် ဒေသခံ အများအပြားကလည်း ခရစ်ယာန် ဘာသာဝင်များ ဖြစ်လာကြပါတယ်။

ကက်သလစ် သာသနာပြုများဟာ ဒေသခံများရဲ့ နှလုံးသားကို ငွေကြေး၊ သြဇာအာဏာနဲ့ သိမ်းသွင်းခဲ့တာ မဟုတ်သလို ဒေသခံများရဲ့ ရိုးရာထုံးတမ်းတွေကိုလည်း မထီလေးစား မပြုခဲ့ပါဘူး။ အဲဒီအစား မွန်မြတ်တဲ့ ပါရမီများကိုသာ ကျင့်ကြံပြီး စံနမူနာကောင်း ပြသခဲ့တာ ဖြစ်ပါတယ်။

အချုပ်ဆိုရလျှင်
ခရစ်တော်၏ တရားတော် - ငြိမ်းချမ်းခြင်းအား လက်တွေ့ကျင့်ကြံခြင်း (Faith in Action)၊
အမျက်ဒေသ မထွက်ခြင်း (Peace Over Anger)၊
စစ်မှန်သော အင်အားကို နှိမ့်ချခြင်းဖြင့် ပြသခြင်း (Humility)၊
စော်ကား ရိုင်းပြမှုအား ချစ်ခြင်းမေတ္တာဖြင့် သည်းခံခြင်း (Patience)၊
အမှန်တရား အတွက် သက်သေခံခြင်း (Witness)
နှင့်
အခက်အခဲ ကြုံချိန် ခွင့်လွှတ်ခြင်းဖြင့် ဘုရားရှင်အား ယုံကြည်ကိုးစားခြင်း (Trust in God)
ဆိုသည့် ပါရမီထူး ပါရမီမြတ်များအား ယခု ဖြစ်ရပ်မှ ရရှိခဲ့ပါတယ်။

အသင်းတော်ရဲ့ ရှေးဦး သာသနာပြုများရဲ့ ဖြစ်ရပ်အားဖြင့် မိမိရဲ့ ခရစ်ယာန် ယုံကြည်ခြင်း အားကောင်းလာစေဖို့ ရည်ရွယ်ရင်း ဒီဖြစ်စဉ်ကို ဝေမျှအပ်ပါတယ်။

👇ခုဆောင်းပါးကို အစ၊ အလယ်၊ အဆုံး ဖတ်ပေးလို့ ကျေးဇူးတင်ပါတယ်။
ယခုလို ဆောင်းပါးမျိုးကို နှစ်သက်တယ် ဆိုရင် ခုလို ဆောင်းပါးတင်တိုင်း မြင်တွေ့နိုင်ဖို့ ဤ A-Lin Credo စာမျက်နှာကို Follow လုပ်ထားပြီး သင့် ဆွေမျိုး မိတ်ဆွေများလည်း Follow လုပ်ပေးဖို့ အားပေးနိုင်ပါတယ်။
ပို့စ်တွေကိုလည်း Share ပေးခြင်းဖြင့် ကူညီနိုင်ကြောင်း သတင်းစကား ပါးလိုပါတယ်။

အီစတာ ဝမ်းမြောက်ခြင်းဖြင့်
Lawrence - A-Lin Credo
27 April 2026

01/05/2026

စိန့်ဂျိုးဇက်ပွဲနေ့ကြီး၊ မေလ ၁ ရက်နေ့

ကက်သလစ်အသင်းတော်သမိုင်းနဲ့ ဝိညာဉ်ရေးရာ အစဉ်အလာတွေမှာ စိန့်ဂျိုးဇက် (St. Joseph) ရဲ့ နေရာဟာ အလွန်နက်နဲပြီး အရေးပါပါတယ်။ စိန့်ဂျိုးဇက်ကို ကမ္ဘာတစ်ဝန်းက ကြည်ညိုလေးစားရတဲ့ သူတော်စင်ကြီးဖြစ်လာတဲ့ အကြောင်းရင်းတွေ၊ သူ့ရဲ့ သမိုင်းဝင် ပွဲနေ့တွေ စတင်လာပုံ၊ နတ်ဆိုးတွေက သူ့ကို ကြောက်ရွံ့ရတဲ့ အကြောင်းရင်းနဲ့ အ်မ်ထောင်ရှင်ဖခင်တွေ၊ ရဟန်း ဘုန်းတော်ကြီးတွေရဲ့ စံပြပုဂ္ဂိုလ် ဖြစ်လာပုံတို့ကို ဖော်ပြသွားပါမယ်။

၁။ စိန့်ဂျိုးဇက်၏ ပွဲနေ့ စတင်ဖြစ်ပေါ်လာပုံ

အသင်းတော်သမိုင်းအရ စိန့်ဂျိုးဇက်အတွက် အဓိက ပွဲနေ့ကြီး (၂) ရက် ရှိပါတယ်။

မတ်လ (၁၉) ရက် (မယ်တော်၏ ခင်ပွန်းတော် စိန့်ဂျိုးဇက် ပွဲနေ့)
ဤပွဲနေ့ကြီးသည် အရှေ့တိုင်း သြသိုဒေါ့ အသင်းတော်များတွင် အစောပိုင်း ကတည်းက တည်ရှိခဲ့သော်လည်း ၁၅ ရာစုနှောင်းပိုင်းတွင် ပုပ်ရဟန်းမင်းကြီး Sixtus IV က ရောမ ပြက္ခဒိန်၌ တရားဝင် ပြဋ္ဌာန်းခဲ့ပါတယ်။ ထို့နောက် ၁၆၂၁ ခုနှစ်တွင် ပုပ်ရဟန်းမင်းကြီး Gregory XV က ကမ္ဘာ တစ်ဝန်းလုံးရှိ အသင်းတော်များ မပျက်မကွက် စောင့်ထိန်းရမည့် ပွဲနေ့အဖြစ် အတည်ပြု သတ်မှတ်ပေးခဲ့ပါတယ်။

မေလ (၁) ရက် (အလုပ်သမားများ၏ ကာကွယ်သူ စိန့်ဂျိုးဇက် ပွဲနေ့) - ဤပွဲနေ့ကြီးကိုတော့ ၁၉၅၅ ခုနှစ်တွင် ပုပ်ရဟန်းမင်းကြီး Pius XII က စတင် ပြဋ္ဌာန်းခဲ့ပါတယ်။ ခရစ်ယာန် အလုပ်သမားများ၏ ဂုဏ်သိက္ခာကို မြှင့်တင်ရန်နှင့် ရိုးသားကြိုးစားသော လက်သမားဆရာ စိန့်ဂျိုးဇက်ကို လုပ်သားထု တစ်ရပ်လုံးအတွက် အမြင့်မြတ်ဆုံး စံပြအဖြစ် ရှုမြင်နိုင်ရန် တိကျသော ရည်ရွယ်ချက်ဖြင့် ပေါ်ပေါက်လာခြင်း ဖြစ်ပါတယ်။

၂။ နတ်ဆိုးများ ကြောက်ရွံ့တုန်လှုပ်ရသူ (Terror of Demons)

"နတ်ဆိုးများကို ကြောက်ရွံ့တုန်လှုပ်စေသူ" ဆိုသည်မှာ တရားဝင် လစ်တနီ (Litany) ဆုတောင်း မေတ္တာတွင် ပါဝင်သော အလွန်လေးနက်သည့် ဘွဲ့နာမတော် ဖြစ်ပါတယ်။ ဝိညာဉ်ရေးရာအရ ဤသို့ သတ်မှတ်ရခြင်းမှာ သူ၏ ဂုဏ်သတ္တိများသည် နတ်ဆိုးများ၏ သဘာဝနှင့် လုံးဝ ဆန့်ကျင်ဘက် ဖြစ်နေသောကြောင့် ဖြစ်ပါတယ်။
ပြီးပြည့်စုံသော နှိမ့်ချခြင်းနှင့် နာခံခြင်း ရှိသူ - နတ်ဆိုးတို့သည် မာနထောင်လွှားမှုကြောင့် ကျဆုံးခဲ့ကြပါတယ်။ သို့သော် စိန့်ဂျိုးဇက်သည် ဘုရားသခင်၏ စေခိုင်းချက်များကို အိပ်မက်မှတစ်ဆင့် သိရချိန်တိုင်း ညည်းညူခြင်း အလျှင်းမရှိဘဲ ချက်ချင်း နာခံခဲ့ပါတယ်။ ဤကဲ့သို့ စစ်မှန်သော နှိမ့်ချမှုသည် မာနကြီးသော နတ်ဆိုးများကို အလွန် တုန်လှုပ်စေပါတယ်။

သန့်ရှင်းသော မိသားစုကို ကာကွယ်သူ - ကယ်တင်ရှင် ခရစ်တော်နှင့် အမိ မယ်တော် မာရီးယာတို့ကို စောင့်ရှောက်ရန် ဘုရားသခင်၏ တာဝန်ပေးအပ်ခြင်းကို ခံခဲ့ရသူ ဖြစ်ပါတယ်။ နတ်ဆိုးတို့၏ ဖျက်ဆီးလိုသော အကြံအစည်များကို ရှေ့တန်းမှနေ၍ ခိုင်မာစွာ ကာကွယ်တားဆီးပေးခဲ့သူ ဖြစ်ပါတယ်။

ကြီးမြတ်သော သန့်ရှင်းစင်ကြယ်ခြင်း ရှိသူ - ဝိညာဉ်ရေးရာ စစ်ပွဲများတွင် သန့်ရှင်းစင်ကြယ်သော စိတ်နှလုံးသည် အမှောင်ထု စွမ်းအားများကို တွန်းလှန်နိုင်သည့် အခိုင်မာဆုံး သံချပ်ကာ ဖြစ်ပါတယ်။

၃။ ဖခင်များနှင့် ရဟန်းဘုန်းတော်ကြီးများ၏ စံပြပုဂ္ဂိုလ်

စိန့်ဂျိုးဇက်သည် အိမ်ထောင်ရှင် ဖခင်များအတွက် သာမက ဝိညာဉ်ရေးရာ ဖခင်များအတွက်ပါ အကောင်းဆုံး လမ်းပြကြယ် ဖြစ်ပါတယ်။

အိမ်ထောင်ရှင် ဖခင်များအတွက် စံပြ -

စစ်မှန်သော ထောက်ပံ့သူနှင့် ကာကွယ်သူ - မိသားစုကို ထောက်ပံ့ရန် နေ့စဉ် ကြိုးစားရုန်းကန်နေရသော ဖခင်များ အတွက် စိန့်ဂျိုးဇက်သည် အကောင်းဆုံး နမူနာ ဖြစ်ပါတယ်။ သူသည် ကြွယ်ဝချမ်းသာသူ မဟုတ်သော်လည်း မိသားစု စားဝတ်နေရေးအတွက် သာမန် လက်သမား အလုပ်ဖြင့် ကိုယ်ကျိုးစွန့် အနစ်နာခံခဲ့ပါတယ်။

စကားထက် အလုပ်ဖြင့် သက်သေပြသူ - သမ္မာကျမ်းစာတွင် သူ၏ စကားတစ်ခွန်းမျှ မပါဝင်ပါ။ သူသည် မိသားစု အပေါ် တာဝန်ကျေပွန်မှုကို စကားဖြင့်မဟုတ်ဘဲ လက်တွေ့လုပ်ရပ်ဖြင့် သက်သေပြခဲ့သည့် တိတ်ဆိတ်သော ခွန်အားပိုင်ရှင် ဖြစ်ပါတယ်။ မိသားစုကို ဦးဆောင်ရာတွင် လုပ်ရပ်သည်သာ အဓိကဖြစ်ကြောင်း သက်သေပြခဲ့ပါတယ်။

ရဟန်းဘုန်းတော်ကြီးများအတွက် စံပြ -
ဝိညာဉ်ရေးရာ ဖခင် - ရဟန်းများသည် အသင်းတော်၏ ဝိညာဉ်ရေးရာ ဖခင်များ ဖြစ်ကြပါတယ်။ ဘုရားသခင် အပ်နှင်းထားသော မိသားစု ဖြစ်သည့် ကက်သလစ် ဘာသာဝင်များကို မည်သို့ မေတ္တာထား ဦးဆောင်ရမည်ကို စိန့်ဂျိုးဇက်ထံမှ သင်ယူကြပါတယ်။

ခရစ်တော်၏ ကိုယ်တော်မြတ်ကို စောင့်ရှောက်သူ - စိန့်ဂျိုးဇက်သည် သူငယ်တော် ယေဇူးကို ပွေ့ချီ စောင့်ရှောက်ခဲ့သကဲ့သို့ ရဟန်းတို့သည်လည်း ကိုယ်တော်မြတ်ရှိ ယေဇူးသခင်ကို လေးမြတ်စွာ ကိုင်တွယ် စောင့်ရှောက်ကြရပါတယ်။

ဖြူစင်ခြင်း သက်တာနှင့် ချစ်ခြင်းမေတ္တာ - သန့်ရှင်းစင်ကြယ်သော အချစ်မေတ္တာဖြင့် အသက်ရှင်ခဲ့သည့် စိန့်ဂျိုးဇက်၏ ဘဝသည် ဖြူစင်ခြင်း သီလ စောင့်ထိန်းသော ရဟန်းများအတွက် ကြီးမားသော ခွန်အားနှင့် လမ်းပြမှု ဖြစ်ပါတယ်။

စိန့်ဂျိုးဇက်၏ ဘဝ သက်သေခံချက်များသည် ခေတ်အဆက်ဆက် မပြောင်းလဲသော ဝိညာဉ်ရေးရာ လမ်းပြ အလင်းကျေးဇူးတော် ဖြစ်ပါတယ်။ သူ၏ တိတ်ဆိတ် ငြိမ်သက်ခြင်း၊ တာဝန်ကျေပွန်ခြင်းနှင့် ဘုရားသခင် အပေါ် အကြွင်းမဲ့ ယုံကြည်ကိုးစားခြင်းတို့ကို ကျွန်ုပ်တို့ အတုယူလျက် ဘဝကို လျှောက်လှမ်းကြဖို့ စိန့်ဂျိုးဇက် ပွဲနေ့ကြီးတွင် တိုက်တွန်းအပ်ပါတယ်။

In Easter Joy,
Lawrence- A-Lin Credo

30/04/2026

ကက်သလစ် ဘာသာသို့ ကူးပြောင်းလာရသည့် အကြောင်းရင်း ၅ ချက်

ကက်သလစ်ဘာသာသို့ ကူးပြောင်းလာသူများအကြောင်းကို လေ့လာပါက အချို့မှာ ကက်သလစ် သာသနာကို ပြင်းပြင်းထန်ထန် ဆန့်ကျင်လိုသဖြင့်သမ္မာကျမ်းစာ၏ ဇစ်မြစ်နဲ့ ကက်သလစ် သမိုင်းကို လေ့လာရင်း ၎င်းတို့သည် ကက်သလစ် ဘာသာဝင်များ အဖြစ် ပြောင်းလဲသွားကြသည်ကို တွေ့ရလေ့ရှိပါသည်။

သမိုင်းတစ်လျှောက်နဲ့ ခေတ်သစ်ကာလတွေမှာ ထင်ရှားတဲ့ တွေးခေါ်ပညာရှင်တွေ၊ နိုင်ငံရေးသမားတွေနဲ့ စာရေးဆရာတွေ အတော်များများဟာ ကက်သလစ်ဘာသာဝင်တွေ ဖြစ်လာခဲ့ကြပါတယ်။ ဝိညာဉ်ရေးရာ ခရီးစဉ်တိုင်းဟာ တစ်ယောက် တစ်မျိုး မတူညီသော်လည်း ဒီလို လူသိများထင်ရှားသူတွေရဲ့ ဘာသာကူးပြောင်းမှုတွေကို အသေအချာ လေ့လာကြည့်တဲ့အခါ အဓိက အကြောင်းရင်း (၅) ခုထဲမှာ ပါဝင်နေတာကို တွေ့ရပါတယ်။

ကက်သလစ်မဟုတ်တဲ့ လူသိရှင်ကြား ပုဂ္ဂိုလ်တွေ ဘာကြောင့် ကက်သလစ်ဘာသာသို့ ကူးပြောင်းလာကြသလဲဆိုတဲ့ အဓိက အကြောင်းရင်းတွေကို ထင်ရှားတဲ့ နာမည်တချို့နဲ့အတူ အောက်မှာ ခွဲခြမ်းစိတ်ဖြာ တင်ပြလိုက်ပါတယ်

၁။ ခရစ်ယာန် သမိုင်းကြောင်းကို နက်နက်ရှိုင်းရှိုင်း လေ့လာခြင်း (အစောပိုင်း အသင်းတော် ဖခင်ကြီးများ)

ဘာသာကူးပြောင်းသူ အများစုဟာ ခရစ်ယာန်သမိုင်းရဲ့ ပထမနှစ်ပေါင်း ၄၀၀ ကို စတင် သုတေသနပြုလုပ်တဲ့ သူတွေ ဖြစ်ကြပါတယ်။ သူတို့က အပေါ်ယံ ခရစ်ယာန်များ မဟုတ်ဘဲ ဘာသာရေး ကိုင်းရှိုင်းသော ပရိုတက်စတင့်တွေ ဒါမှမဟုတ် အင်္ဂလီကန် သင်းအုပ်ဆရာတွေ ဖြစ်ကြပါတယ်။ ရှေးဦး အသင်းတော် ဖခင်ကြီးများရဲ့ မူရင်း အရေးအသားတွေကို ဖတ်ရှုကြတဲ့အခါ ရှေးဦး အသင်းတော်ဟာ သာသနာပိုင် ဆရာတော်တွေ (Bishops)၊ ကိုယ်တော်မြတ် (Eucharist) နဲ့ စက္ကရမင်တူး မင်္ဂလာ (Sacraments) တွေနဲ့အတူ ဖြစ်တည်နေတယ် ဆိုတာကို သတိပြုမိပြီး အခြေခံအားဖြင့် ရှေးဦး ခရစ်ယာန်တွေ ဆိုတာကလည်း ထာဝရ ကက်သလစ် အသင်းတော်ပဲ ဖြစ်နေတယ်ဆိုတာကို သူတို့ မကြာခဏ သဘောပေါက်သွားတတ်ကြပါတယ်။

စိန့် ဂျွန်ဟင်နရီ နယူးမန်း (St. John Henry Newman) - သူက ၁၉ ရာစုက ထင်ရှားတဲ့ အင်္ဂလီကန် ဘုန်းတော်ကြီးနဲ့ အောက်စဖို့ဒ် ပညာရှင်တစ်ဦး ဖြစ်ပါတယ်။ အင်္ဂလီကန် အသင်းတော်ဟာ ရှေးဦး အသင်းတော်ရဲ့ အစစ်အမှန် အမွေ ဆက်ခံသူဖြစ်ကြောင်း သက်သေပြဖို့ သူ ကြိုးစားခဲ့ပေမယ့် သူရဲ့ သမိုင်းသုတေသနပြု လေ့လာချက်က သူ့ကို ကက်သလစ် ဘာသာဆီကိုပဲ ပို့ဆောင်ပေးခဲ့ပါတယ်။

"သမိုင်းကို နက်နက်ရှိုင်းရှိုင်း သိရှိသွားခြင်းဟာ ပရိုတက်စတင့်တစ်ဦး အဖြစ်ကနေ ရပ်စဲသွားခြင်းပဲ ဖြစ်တယ်"* လို့ သူက ထင်ရှားစွာ ကောက်ချက်ချခဲ့ပါတယ်။

စကော့ဟန်း (Scott Hahn) - သူက ကက်သလစ် မုန်းတဲ့ သင်းကွဲ ခရစ်ယာန် ဂိုဏ်းက ဖြစ်ပေမယ့် ကျမ်းစာနဲ့ သမိုင်းဆိုင်ရာ လေ့လာမှုတွေကို ပြင်းပြင်းထန်ထန် ပြုခဲ့ခြင်းကြောင့် သူရဲ့ ကက်သလစ် ဆန့်ကျင်ရေး ဘာသာရေး အမြင်ကနေ ဇောက်ထိုး ပြောင်းလဲသွားပြီး နာမည်ကျော် ကက်သလစ် ဓမ္မ ပညာရှင် ဖြစ်လာပါတယ်။

မာကပ်စ် ဂရိုဒီ (Marcus Grodi) - ကနဦးမှာ ပရက်စ်ဘီတေးရီးယန်း သင်းအုပ် ဆရာဟောင်း၊ ပရိုတက်စတင့် ဓမ္မဆရာ အဖြစ်ကနေ လက်ရှိမှာ ပရိုတက်စတင့် ခရစ်ယာန်များကို ကက်သလစ် အဖြစ် ပြောင်းလဲရာမှာ အထူးကူညီထောက်ပံ့ပေးတဲ့ ကက်သလစ် ဘာသာဝင် ဖြစ်လာပါတယ်။ Coming Home Network ဆိုတဲ့ အဖွဲ့အစည်းကို တည်ထောင်ခဲ့သူ တစ်ဦး ဖြစ်ပါတယ်။

၂။ အသိဉာဏ်ပိုင်း ဆိုင်ရာ ယုတ္တိရှိမှုကို ရှာဖွေခြင်း

တချို့ပုဂ္ဂိုလ်တွေဟာ အသင်းတော်ရဲ့ ဒဿနိကဗေဒဆိုင်ရာ မူဘောင် အထူးသဖြင့် စိန့် သောမတ်စ် အကွိုင်းနပ်စ် (St. Thomas Aquinas) ရဲ့ သွန်သင်ချက်တွေနဲ့ ယုံကြည်ခြင်းနှင့် တွေးတော ဆင်ခြင်ခြင်း (Faith and Reason) ပေါင်းစပ်ထားမှုတွေ၊ အသိဉာဏ်ပိုင်းဆိုင်ရာမှာ ကက်သလစ် ဘာသာက ကျေနပ်ဖွယ်ရာ အကောင်းဆုံး ဖြစ်တယ်လို့ သူတို့ တွေ့ရှိတာကြောင့် ယုံကြည်သက်ဝင်လာကြပါတယ်။ ဒီလို ကူးပြောင်းလာသူတွေမှာ ဘုရားမဲ့ဝါဒ၊ ဘုရားမသိ ဝါဒ သို့မဟုတ် လောကီရေးရာ ဒဿနိကဗေဒ ပညာရှင်တွေကနေ ကူးပြောင်းလာလေ့ရှိပါတယ်။

ဂျီ. ကေ. ချက်စတာတန် (G.K. Chesterton) - သူက ၂၀ ရာစုရဲ့ အထက်မြက်ဆုံး စာပေပညာရှင်တွေထဲက တစ်ဦးပါ။ သူဟာ ဘုရားမသိ ဝါဒကနေ အင်္ဂလီကန်ဘာသာ၊ အဲဒီကနေမှ တဆင့် ကက်သလစ် ဘာသာကို ကူးပြောင်းခဲ့ပါတယ်။ ကက်သလစ်ဘာသာကို လူ့သဘာဝရဲ့ ဆန့်ကျင်ဘက်ဖြစ်မှုတွေကို ပြီးပြည့်စုံစွာ ရှင်းပြနိုင်တဲ့ တစ်ခုတည်းသော ဒဿနအဖြစ် သူက ရှုမြင်ခဲ့ပါတယ်။

စိန့် အီးဒစ် စတိန်း (St. Edith Stein သို့မဟုတ် Teresa Benedicta of the Cross) - သူမက ဂျူးလူမျိုးအဖြစ် မွေးဖွားခဲ့ပြီး ဘုရားမဲ့ဝါဒီ ဖြစ်လာခဲ့တဲ့ ထူးချွန်သော ဒဿနိကဗေဒ ပညာရှင် တစ်ဦးပါ။
အာဗီးလာမြို့သူ စိန့် ထရီဇာ (St. Teresa of Ávila) ရဲ့ ကိုယ်တိုင်ရေး အတ္ထုပ္ပတ္တိကို ဖတ်ပြီးနောက် ခရစ်ယာိ် သမိုင်း ရာဇဝင် အမှန်ကို တွေ့ရှိပြီဟု ကောက်ချက်ချကာ ကက်သလစ် သီလရှင်တစ်ပါး ဖြစ်လာခဲ့ပြီး
ဂျူး လူမျိုး ဖြစ်လို့နာဇီ ဂျာမန်တွေရဲ့ အော့ဇ်ဝစ်ချ် (Auschwitz) ချွေးတပ်စခန်းမှာ ဓမ္မ အာဇာနည်အဖြစ် ကွက်မျက်ခံခဲ့ရပါတယ်။

ဒေါက်တာ ပီတာ ခရိဖ် (Dr. Peter Kreeft) - သူက ခရစ်ယာန် အသင်းတော်သမိုင်းနဲ့ ဒဿနိကဗေဒကို နက်နက်ရှိုင်းရှိုင်း လေ့လာပြီးနောက် ဒတ်ချ် ပရိုတက်စတင့်ဘာသာမှ ကူးပြောင်းလာခဲ့တဲ့ အလွန်လေးစားခံရသော ခေတ်သစ် ဒဿနိကဗေဒပညာရှင်နဲ့ စာရေးဆရာတစ်ဦး ဖြစ်ပါတယ်။

၃။ ခိုင်မာတည်မြဲမှု၊ ရိုးရာအစဉ်အလာနဲ့ အလှတရားတို့ကို တောင့်တခြင်း

စာရေးဆရာတွေ၊ အနုပညာရှင်တွေနဲ့ ဖန်တီးရှင်များစွာဟာ အသင်းတော်ရဲ့ ကြွယ်ဝတဲ့ ဝတ်ပြုကိုးကွယ်မှုဓလေ့၊ ရှေးဟောင်း ရိုးရာအစဉ်အလာတွေနဲ့ ကမ္ဘာလုံးဆိုင်ရာ ခိုင်မာတည်မြဲမှုတို့ကြောင့် ဆွဲဆောင်ခံခဲ့ရပါတယ်။ သူတို့ဟာ လျင်မြန်စွာ ပြောင်းလဲနေပြီး ခေတ်မီနေတဲ့ ကမ္ဘာကြီးထဲမှာ ယဉ်ကျေးမှုရေစီးကြောင်းကို ဆန့်ကျင်နိုင်မယ့် ခိုင်မာတဲ့ ကျောက်ဆူး (anchor) တစ်ခုကို ရှာဖွေနေကြရင်း ကက်သလစ် အသင်းတော်မှာ ဒီအမှန်တရား ကျောက်ဆူးကို ရှာဖွေတွေ့ရှိခဲ့ရသူတွေ ဖြစ်ပါတယ်။

အီဗလင် ဝေါ့ဂ် (Evelyn Waugh) - Brideshead Revisited ဆိုတဲ့ နာမည်ကြီးစာအုပ်ကို ရေးသားခဲ့တဲ့ အင်္ဂလိပ်စာရေးဆရာ ဖြစ်ပါတယ်။ ကက်သလစ်အသင်းတော်ရဲ့ ခိုင်မာပြီး မယိမ်းယိုင်တဲ့ ကိုယ်ကျင့်တရားဆိုင်ရာ အာဏာစက်မရှိရင် အနောက်တိုင်းယဉ်ကျေးမှုကြီး ပြိုကျသွားလိမ့်မယ်လို့ ယုံကြည်တာကြောင့် ၁၉၃၀ ပြည့်လွန်နှစ်များမှာ ဘာသာကူးပြောင်းခဲ့ပါတယ်။

ဂရေဟမ် ဂရင်း (Graham Greene) - သူက သူရဲ့ ကက်သလစ်ဇနီးနဲ့ လက်ထပ်ဖို့အတွက်သာ အစပိုင်းမှာ ကကသလစ် ဘာသာကူးပြောင်းခဲ့ပေမယ့် နောက်ပိုင်းမှာ သူရဲ့ ယုံကြည်ခြင်းဟာ သူရဲ့ ဂန္ထဝင်စာပေလက်ရာတွေ အပေါ် အလွန်နက်ရှိုင်းစွာ လွှမ်းမိုးသွားခဲ့တဲ့ နာမည်ကျော် ဗြိတိသျှ ဝတ္ထုရေးဆရာ ဖြစ်ပါတယ်။

အော်စကာ ဝိုင်းလ်ဒ် (Oscar Wilde) - သူက ကက်သလစ် အလှတရားနဲ့ ဝတ်ပြုကိုးကွယ်မှုဓလေ့တွေကို တစ်သက်တာလုံး စွဲလမ်းနှစ်သက်ခဲ့ပြီး သေခါနီး နောက်ဆုံး အချိန်မှာ ကက်သလစ် ဘာသာကူးပြောင်းခဲ့တဲ့ နာမည်ကျော် အိုင်းရစ် ပြဇာတ်ရေးဆရာနဲ့ ကဗျာဆရာ ဖြစ်ပါတယ်။

၄။ လူမှုတရားမျှတမှုနဲ့ အသက်ရှင်သန်ခွင့် လူ့ဂုဏ်သိက္ခာအတွက် တွန်းအား

လူအတော်များများကတော့ အသင်းတော်ရဲ့ အသက်ရှင်သန်ခွင့်နဲ့ပတ်သက်တဲ့ ခိုင်မာတဲ့ ကျင့်ဝတ် စံနှုန်းတွေနဲ့ ဆင်းရဲသားတွေ၊ ဖယ်ကြဉ်ခံရသူတွေနဲ့ မမွေးဖွားသေးတဲ့ ကလေးငယ်တွေအတွက် ပြင်းပြင်းထန်ထန် ရပ်တည်ပေးတဲ့ ကြွယ်ဝလှသော ကက်သလစ် လူမှုရေးသွန်သင်ချက်တွေ (Catholic Social Teaching) ကြောင့် ဆွဲဆောင်ခံကြရပါတယ်။

ဒိုရသီ ဒေး (Dorothy Day) - သူမဟာ ၂၀ ရာစုအစောပိုင်းမှာ ကွန်မြူနစ် မာ့က်စ်ဝါဒီ၊ အစိုးရမဲ့ ဝါဒီနဲ့ သမားရိုးကျမဟုတ်တဲ့ အစွန်းရောက် တစ်ဦးဖြစ်ပါတယ်။ ကက်သလစ်ဘာသာဟာ ရွှေ့ပြောင်းနေထိုင်သူတွေနဲ့ အလုပ်လုပ်တဲ့ ဆင်းရဲသားတွေရဲ့ အစစ်အမှန် အသင်းတော်ဖြစ်တယ်လို့ ရှုမြင်တာကြောင့် ဘာသာကူးပြောင်းခဲ့ပြီး နောက်ပိုင်းမှာ ကက်သလစ် အလုပ်သမားလှုပ်ရှားမှု (Catholic Worker Movement) ကို တည်ထောင်ခဲ့ပါတယ်။

နော်မာ မက်ကော်ဗီ (Norma McCorvey) - နာမည်ကြီး အမေရိကန် တရားလွှတ်တော်ချုပ်ရဲ့ ကိုယ်ဝန်ဖျက်ချမှုဆိုင်ရာ အမှု *Roe v. Wade* မှာ "Jane Roe" အဖြစ် လူသိများသူပါ။ နောက်ပိုင်းမှာ သူမဟာ သန္ဓေသားအသက်ရှင်ခွင့် (pro-life) လှုပ်ရှားသူတစ်ဦး ဖြစ်လာခဲ့ပြီး လူ့အသက်တာရဲ့ မွန်မြတ်မှုအပေါ် အသင်းတော်ရဲ့ တုန်လှုပ်ပြောင်းလဲမှုမရှိတဲ့ ရပ်တည်ချက်ကြောင့် ကက်သလစ်ဘာသာသို့ ကူးပြောင်းခဲ့ပါတယ်။

၅။ ခေတ်သစ် နိုင်ငံရေးနဲ့ ယဉ်ကျေးမှုဆိုင်ရာ အမြစ်တွယ်မှုကို လိုလားခြင်း

မကြာသေးမီ နှစ်များအတွင်း နိုင်ငံရေးသမားတွေနဲ့ Social Influencer အတော်များများ ဘာသာကူးပြောင်းလာတာကို တွေ့ရပါတယ်။ သူတို့က ခိုင်မာတဲ့ ကိုယ်ကျင့်တရား အခြေခံအုတ်မြစ်၊ သမိုင်းကြောင်းအရ အမြစ်တွယ်မှု ဒါမှမဟုတ် ခေတ်သစ် လောကီဝါဒကို ငြင်းပယ်ချင်တာ စတာတွေကြောင့် ကက်သလစ် ဘာသာဝင် ဖြစ်ရကြောင်း မကြာခဏ ဖော်ပြလေ့ရှိပါတယ်။

တိုနီ ဘလဲ (Tony Blair) - ဗြိတိန် ဝန်ကြီးချုပ်ဟောင်းဟာ ၂၀၀၇ ခုနှစ် ရာထူးကနေ အနားယူပြီး သိပ်မကြာခင်မှာပဲ သူရဲ့ ကက်သလစ်ဇနီးနဲ့ သူကိုယ်တိုင်ရဲ့ ဝိညာဉ်ရေးရာ ခရီးကြောင့် အင်္ဂလီကန် ဘာသာကနေ ကက်သလစ် ဘာသာဝင်သို့ ကူးပြောင်းလာခဲ့ပါတယ်။

ဂျေဒီ ဗန့်စ် (J.D. Vance) - အမေရိကန် အထက်လွှတ်တော်အမတ်နဲ့ ဒုတိယသမ္မတဟာ
ပရိုတက်စတင့် ပတ်ဝန်းကျင်မှာ ကြီးပြင်းခဲ့ပြီး ဘုရားမဲ့ဝါဒီအဖြစ် အချိန်အတိုင်းအတာတစ်ခုအထိ နေထိုင်ခဲ့ပါတယ်။ နောက်ပိုင်းမှာ ကက်သလစ် ဒဿနိက ဗေဒနဲ့ စိန့် ဩဂတ်စတင်း (St. Augustine) ရဲ့ အရေးအသား လွှမ်းမိုးမှုနဲ့အတူ ၂၀၁၉ ခုနှစ်မှာ ဘာသာကူးပြောင်းခဲ့ပါတယ်။

နုရ် ဂင်းဂရစ်ချ် (Newt Gingrich) - အမေရိကန် အောက်လွှတ်တော် ဥက္ကဋ္ဌဟောင်းဟာ ၂၀၀၉ ခုနှစ်မှာ ကက်သလစ် ဘာသာသို့ ကူးပြောင်းခဲ့ပါတယ်။ ဆယ်စုနှစ် တစ်ခုကြာ သူရဲ့ ကက်သလစ်ဇနီးနဲ့အတူ မစ္ဆားတရားတော်ကို တက်ရောက်ခဲ့ပြီး အသင်းတော်ရဲ့ သမိုင်းကြောင်း နက်ရှိုင်းမှုနဲ့ ကမ္ဘာအဝှမ်းမှာ နီတိကိုယ်ကျင့်တရား အတွက် အစဉ် လမ်းပြနေမှုကြောင့် ကက်သလစ် ဘာသာဝင် ဖြစ်လာပါတယ်။

In Easter Joy,
Lawrence- A-Lin Credo
30 April 2026

29/04/2026

စိန့်ကက်သရင်း (Saint Catherine of Siena) ပွဲနေ့
ဧပြီ ၂၉ ရက်

စိန့်ကက်သရင်း (Saint Catherine of Siena) ဟာ ကက်သလစ်သာသနာ့သမိုင်းမှာ အလွန်ထင်ရှားပြီး သတ္တိရှိတဲ့၊ ဩဇာလွှမ်းမိုးမှုကြီးမားတဲ့ အမျိုးသမီးတစ်ဦး ဖြစ်ပါတယ်။ သူမရဲ့ အတ္ထုပ္ပတ္တိကို အောက်ပါအတိုင်း အချက်အလက်များ ခွဲခြားပြီး ရေးသားပေးလိုက်ပါတယ်။

ငယ်ဘဝနှင့် ဘုရားသခင်၏ ခေါ်တော်မူခြင်း

• မွေးဖွားခြင်း - ၁၃၄၇ ခုနှစ်တွင် အီတလီနိုင်ငံ၊ ဆီယေးနားမြို့ (Siena) ၌ ကလေး ၂၃ ယောက်ရှိသော မိသားစုကြီးတွင် မွေးဖွားခဲ့သည်။

• ရူပါရုံမြင်တွေ့ရခြင်း - အသက် ၇ နှစ်အရွယ်တွင် ခရစ်တော်ကို ဖူးမြင်ရသည့် ထူးခြားသော ရူပါရုံကို ရရှိခဲ့ပြီး ထိုအချိန်မှစ၍ အပျိုစင် အဖြစ် နေထိုင်ကာ ဘုရားသခင်ထံ မိမိဘဝကို အပြည့်အဝ ဆက်ကပ်ရန် ဆုံးဖြတ်ခဲ့သည်။

• ယုံကြည်ချက် ခိုင်မာခြင်း - ဆယ်ကျော်သက် အရွယ်တွင် မိဘများက အိမ်ထောင်ချပေးရန် စီစဉ်သော်လည်း ပြင်းပြင်းထန်ထန် ငြင်းဆန်ခဲ့သည်။ နောက်ဆုံးတွင် ဖခင်ဖြစ်သူက ခွင့်ပြုခဲ့သဖြင့် အိမ်ထဲရှိ သီးသန့်အခန်းငယ်လေးတွင် ဆုတောင်းခြင်း၊ တရားရှုမှတ်ခြင်းများဖြင့် အချိန် ကုန်လွန်ခဲ့သည်။

အများ အကျိုးအတွက် ကိုယ်ကျိုးစွန့် အမှုတော်ဆောင်ခြင်း

• သာသနာ့အမှုထမ်းခြင်း - အသက် ၁၈ နှစ်တွင် ဒိုမီနီကန် တတိယ အဆင့် အသင်းဂိုဏ်း (Dominican Third Order) သို့ ဝင်ရောက်ခဲ့သည်။ အစပိုင်းတွင် ဆုတောင်းခြင်းနှင့် အစာရှောင်ခြင်းတို့ကိုသာ အဓိကထား လုပ်ဆောင်ခဲ့သော်လည်း နောက်ပိုင်းတွင် ပြင်ပသို့ထွက်၍ ဆင်းရဲနွမ်းပါးသူများ၊ ဖျားနာသူများနှင့် အကျဉ်းကျနေသူများကို ပြုစုစောင့်ရှောက်ခဲ့သည်။

• ပလိပ်ရောဂါကာလ ကူညီမှု - ဉရောပ တလွှား လူ ၃ ပုံ ၁ ပုံ သေဆုံးကာ သန်းရာချီ သေကြေစေသော ကြောက်မက်ဖွယ်ကောင်းသော ပလိပ်ရောဂါ (Black Death) သည် ဆီယေးနားမြို့တွင် ကူးစက်ပြန့်ပွားချိန်၌ အခြားသူများ ထိတ်လန့်တကြား ထွက်ပြေးကြသော်လည်း သူမကမူ လူနာများကို ရဲရဲဝံ့ဝံ့ ရှေ့ထွက် ပြုစုပေးခဲ့ပြီး သေဆုံးသူများကိုလည်း သင်္ဂြိုဟ်ပေးခဲ့သည်။

သာသနာတော်နှင့် သမိုင်းအပေါ် သက်ရောက်မှု

• ဉာဏ်ပညာနှင့် သတ္တိ - သူမသည် ငယ်စဉ်က ပညာ ကောင်းစွာ မသင်ခဲ့ရဘဲ အရွယ်ရောက်မှသာ စာရေးစာဖတ် သင်ခဲ့ရသော်လည်း အလွန်ထူးချွန်သော ဉာဏ်ပညာနှင့် ဝိညာဉ်ရေးရာ အခွင့်အာဏာ ရှိခဲ့သည်။

• ခေါင်းဆောင်များကို လမ်းညွှန်ခြင်း - ဘုရင်များ၊ မိဖုရားများနှင့် သာသနာ့ခေါင်းဆောင်များထံ စာများစွာ ရေးသားပေးပို့ခဲ့ပြီး ငြိမ်းချမ်းရေးနှင့် သန့်ရှင်းမွန်မြတ်ခြင်း ရှိရန် ရဲဝံ့စွာ တိုက်တွန်းခဲ့သည်။

• ပုပ်ရဟန်းမင်းကြီးကို စည်းရုံးနိုင်ခြင်း - အသင်းတော် အတွင်း ရဟန်းမင်းကြီး ၃ ပါးဖြင့် စည်းလုံး ညီညွတ်မှု ပြိုကွဲချိန်တွင် သူမသည် ပြင်သစ်နိုင်ငံ၊ အာဗစ်ညွန် (Avignon) သို့ ကိုယ်တိုင်သွားရောက်၍ ပုပ်ရဟန်းမင်းကြီး ဂရီဂေါ်ရီ (၁၁) (Pope Gregory XI) အား ရောမမြို့သို့ ပြန်လည်ကြွချီရန် အောင်မြင်စွာ စည်းရုံးနိုင်ခဲ့ပြီး သာသနာတော်ကြီး ပြန်လည် စည်းလုံးလာစေရန် ကူညီပေးခဲ့သည်။

သူမ၏ အမွေအနှစ်နှင့် ဂုဏ်ပြုခံရမှု

• ကွယ်လွန်ခြင်း - ငြိမ်းချမ်းရေးနှင့် သာသနာတော် စည်းလုံးရေးအတွက် မနားမနေ ကြိုးပမ်းခဲ့မှုများကြောင့် ၁၃၈၀ ခုနှစ်၊ အသက် ၃၃ နှစ်အရွယ်တွင် ရောမမြို့၌ ကွယ်လွန်ခဲ့သည်။

• ပြောင်မြောက်သော စာပေအမွေ - သူမချန်ရစ်ခဲ့သော "The Dialogue" ခေါ် ဝိညာဉ်ရေးရာ စာအုပ်သည် ခရစ်ယာန်စာပေသမိုင်းတွင် အလွန်တန်ဖိုးထားရသော စာအုပ်တစ်အုပ်အဖြစ် ယနေ့တိုင် တည်ရှိနေသည်။

• Doctor of the Church သာသနာတော်၏ ပါရဂူ - ယနေ့ခေတ်တွင် သူမကို ရဟန္တာအဖြစ် ဂုဏ်ပြုသတ်မှတ်ရုံသာမက သူမ၏ သွန်သင်ချက်များ၏ ကြီးမားသော တန်ဖိုးကို အသိအမှတ်ပြုသောအားဖြင့် သာသနာတော်၏ ပါရဂူ (Doctor of the Church) ဟူသော ရှားပါးပြီး ဂုဏ်သိက္ခာကြီးမားသည့် ဘွဲ့ကိုပါ ချီးမြှင့်ခြင်း ခံရသည်။ ထို့ပြင် အီတလီနိုင်ငံနှင့် ဥရောပတိုက်၏ ကိုးကွယ်စောင့်ရှောက်သူ ရဟန္တာ (Patron Saint) အဖြစ်လည်း သတ်မှတ်ခံထားရသည်။

In Easter Joy,
Lawrence- A-Lin Credo

29/04/2026

Happy Feast Day of Saint Catholicism of Siena

28/04/2026

၂၀၂၇ ခုနှစ်၊ ဆိုးလ်မြို့တွင် ကျင်းပမည့်
ကမ္ဘာ့ လူငယ်များနေ့ WYD Seoul 2027 အား ကာကွယ်စောင့်ရှောက်သူ ရဟန္တာ/ စိန့်များကို ကြေညာမိတ်ဆက်ခြင်း

✝ ရဟန္တာ ဂျွန်ပေါလ် ၂ (Saint John Paul II)
ကမ္ဘာ အဝှမ်းရှိ လူငယ်််များထံသို့ လက်လှမ်းချိတ်ဆက်ခဲ့သော ရဟန်းမင်းကြီး ဖြစ်သည်။ သူသည် ငြိမ်းချမ်းရေးကို မြတ်နိုးကာကွယ်ရန်နှင့် ရဲစွမ်းသတ္တိဖြင့် ဆောင်ရွက်ကြရန် သတင်းစကား မျှဝေခဲ့သည်။🤍
ရဟန္တာ ဂျွန်ပေါလ် (၂) သည် ၁၉၇၈ ခုနှစ်မှ ၂၀၀၅ ခုနှစ်အထိ ပုပ်ရဟန်းမင်းကြီးအဖြစ် တာဝန်ထမ်းဆောင်ခဲ့ပြီး နိုင်ငံပေါင်း ၁၂၉ နိုင်ငံသို့ သွားရောက်ကာ ကမ္ဘာတစ်ဝှမ်းရှိ လူသားများ၊ အထူးသဖြင့် လူငယ်များနှင့် ထိတွေ့ဆက်ဆံခဲ့ပါသည်။ ၁၉၈၅ ခုနှစ်တွင် ကမ္ဘာ့လူငယ်များနေ့ (World Youth Day) ကို စတင်တည်ထောင်ခဲ့ပြီး လူငယ်များ၏ အရေးပါမှု၊ မိသားစုနှင့် လူ့ဂုဏ်သိက္ခာကို အဓိကထား၍ သွန်သင်ဆုံးမခဲ့သော ထူးခြားသည့် ခေါင်းဆောင်တစ်ဦး ဖြစ်ပါသည်။

WYD တွင် ပါဝင်လာရခြင်းအကြောင်းရင်း - ယခုနှစ် WYD ၏ ကာကွယ်စောင့်ရှောက်သူအဖြစ် ရွေးချယ်ခံရခြင်းမှာ သူသည် ကမ္ဘာ့လူငယ်များနေ့ကို စတင် တည်ထောင်သူ ဖြစ်ခြင်းနှင့် အသင်းတော် အတွင်း လူငယ်များ၏ အရေးပါသော အခန်း ကဏ္ဍကို အမြဲအသိအမှတ်ပြုခဲ့သောကြောင့် ဖြစ်သည်။ လူငယ်များအနေဖြင့် ခရစ်ယာန် ယုံကြည်ခြင်းတွင် ရဲရင့်ကြရန်နှင့် ခရစ်တော်ထံသို့ ချဉ်းကပ်ရန် အမြဲတိုက်တွန်းခဲ့သူ ဖြစ်သည်။

✝ ရဟန္တာ အင်ဒရူးကင်မ်တေဂွန် နှင့် အပေါင်းပါများ (Saint Andrew Kim Taegon and Companions)

ကိုရီးယား၏ ပထမဆုံး ကက်သလစ်ရဟန်း ဖြစ်သလို ခရစ်ယာန် ယုံကြည်ခြင်းအတွက် အသက် စတေးခဲ့သောကြောင့် ဓမ္မ အာဇာနည်လည်း ဖြစ်သည်။❤️

၁၈၂၁ ခုနှစ်တွင် မွေးဖွားခဲ့သော အင်ဒရူးကင်မ် တေဂွန်သည် မကာအိုသို့ သွားရောက်ကာ ရဟန်းဖြစ်ကျောင်းတက်ခဲ့ပြီး ကိုရီးယား၏ ပထမဆုံးဒေသခံ ကက်သလစ်ရဟန်း ဖြစ်လာခဲ့ပါသည်။ သို့သော်လည်း ဂျိုဆွန်းခေတ် (Joseon Dynasty) ခရစ်ယာန်ဘာသာဝင်များအား ဖိနှိပ်မှုတွင် အဖမ်းခံခဲ့ရပြီး ၁၈၄၆ ခုနှစ် အသက် ၂၅ နှစ်အရွယ်တွင် ဆိုးလ်မြို့အနီး၌ ခေါင်းဖြတ်သတ်ခံရကာ ဓမ္မ အာဇာနည် အဖြစ် အသေခံခဲ့ပါသည်။

WYD တွင် ပါဝင်လာရခြင်းအကြောင်းရင်း - သူနှင့် သူ၏အပေါင်းပါများအား ရွေးချယ်ရခြင်းမှာ ကိုရီးယား ကက်သလစ်အသင်းတော်၏ လေးနက်ရဲရင့်သော ဇစ်မြစ်များကို ကိုယ်စားပြုသောကြောင့် ဖြစ်ပါသည်။ ငယ်ရွယ်စဉ်မှာပင် ယုံကြည်ခြင်းအတွက် အသက်ပေးခဲ့သူတို့၏ စံနမူနာသည် ယနေ့ခေတ် လူငယ်များအတွက် ခေတ်သစ် ဘဝ စိန်ခေါ်မှုများ အကြားတွင် မိမိတို့၏ ခရစ်ယာန် ယုံကြည်ခြင်း အတွက် ခိုင်ခိုင်မာမာ ရပ်တည်နိုင်ရန် ခွန်အားပေးလျက်ရှိပါသည်။

✝ ရဟန္တာ ဖရန်ချက်စကာ ဇေးဗီးယား ကာဘရီနီ (Saint Francesca Xavier Cabrini)

ရွှေ့ပြောင်းနေထိုင်သူများ၏ ကာကွယ်စောင့်ရှောက်သူ ရဟန္တာ အဖြစ် သတ်မှတ်ခံထားရသည်။ သူမသည် မေတ္တာတရားကို လုပ်ရပ်များမှ တစ်ဆင့် သက်သေပြသခဲ့သည်။💛

၁၈၅၀ ပြည့်နှစ်တွင် အီတလီနိုင်ငံ၌ မွေးဖွားခဲ့ပြီး "Missionary Sisters of the Sacred Heart of Jesus" သီလရှင်အသင်းကို တည်ထောင်ခဲ့ပါသည်။ ပုပ်ရဟန်းမင်းကြီး လီယို (၁၃) ၏ စေလွှတ်ချက်ဖြင့် အမေရိကန်သို့ ရောက်ရှိလာပြီးနောက် အမေရိကနှင့် ဥရောပတစ်လွှားတွင် ရွှေ့ပြောင်းနေထိုင်သူများ၊ ဆင်းရဲနွမ်းပါးသူများနှင့် မိဘမဲ့ကလေးများအတွက် စာသင်ကျောင်းများ၊ ဆေးရုံများနှင့် ဂေဟာပေါင်း ၆၇ ခုကို တည်ထောင်ပေးခဲ့ပါသည်။

WYD တွင် ပါဝင်လာရခြင်းအကြောင်းရင်း - သူမအား ကာကွယ်စောင့်ရှောက်သူအဖြစ် ရွေးချယ်ခြင်းမှာ ပစ်ပယ်ခံရသူများအပေါ်ထားရှိသည့် မေတ္တာနှင့် စောင့်ရှောက်မှု (Theme of Love) ကို ပေါ်လွင်စေရန် ဖြစ်ပါသည်။ ရွှေ့ပြောင်းနေထိုင်သူများအတွက် မမောမပန်း အမှုတော်ဆောင်ခဲ့သည့် သူမ၏ဘဝသည် ယနေ့ခေတ် လူငယ်များအား အားနည်းသူများကို သနားကြင်နာမှုဖြင့် ကူညီလုပ်ဆောင်ရန် တိုက်တွန်းနေပါသည်။

✝ ရဟန္တာ ဂျိုးဇက်ဖင်း ဘာခီတာ (Saint Josephine Bakhita)

နာကျင်မှုကို မေတ္တာအဖြစ် ပြောင်းလဲခဲ့သော ရဟန္တာ အဖြစ် ကျော်ကြားသည်။ သူမသည် ဆင်းရဲဒုက္ခများကြားမှ မျှော်လင့်ချက်ကို မျှဝေခဲ့သည်။🖤

ဆူဒန်နိုင်ငံတွင် ကလေးဘဝကတည်းက ပြန်ပေးဆွဲခံရပြီး ကျွန်အဖြစ် ရောင်းစားခံခဲ့ရကာ ရုပ်ပိုင်းဆိုင်ရာနှင့် စိတ်ပိုင်းဆိုင်ရာ ရုန့်ရင်းကြမ်းတမ်းမှုများကို နှစ်ပေါင်းများစွာ ခံစားခဲ့ရပါသည်။ နောက်ပိုင်းတွင် အီတလီသို့ရောက်ရှိပြီး လွတ်လပ်ခွင့်ရခဲ့ကာ Canossian ကနိုးရှင်း အသင်းမှ သီလရှင်တစ်ပါး ဖြစ်လာခဲ့ပြီး သူမ၏ဘဝကို အခြားသူများအား ဝမ်းမြောက်ခြင်း၊ ခွင့်လွှတ်ခြင်းတို့ဖြင့် အစေခံရာတွင် ဘဝ တလျှောက်လုံး မြှုပ်နှံခဲ့ပါသည်။

WYD တွင် ပါဝင်လာရခြင်းအကြောင်းရင်း - သူမသည် ဆင်းရဲဒုက္ခများမှ တစ်ဆင့် ပြောင်းလဲလာသော မျှော်လင့်ချက်၊ လွတ်လပ်ခွင့်နှင့် ယုံကြည်ခြင်း၏ အစွမ်းထက်သော သက်သေ အဖြစ် ရပ်တည်နေသောကြောင့် ရွေးချယ်ခံရခြင်း ဖြစ်ပါသည်။ အကြမ်းဖက်မှုနှင့် ခေါင်းပုံဖြတ်မှုများရှိနေသော ယနေ့ကမ္ဘာကြီးတွင် လူငယ်များအနေဖြင့် စိတ်ဒဏ်ရာများကို မည်သို့ကျော်လွှားပြီး ခရစ်တော်၌ စစ်မှန်သော ငြိမ်းချမ်းရေးကို မည်သို့ရှာဖွေရမည်ကို သင်ကြားပေးနေပါသည်။

✝ ရဟန္တာ ကာလို အကူးတစ် (Saint Carlo Acutis)

God’s Influencer - ၊ ကျွန်ုပ်တို့ နည်းပညာ ခေတ်သစ်၏ ရဟန္တာဟု ခေါ်တွင်ကြသည်။သူသည် နေ့စဉ်ဘဝတွင် သူ၏ယုံကြည်ခြင်းကို ရှင်သန်နေထိုင်ခဲ့သည်။💙

၁၉၉၁ ခုနှစ်တွင် မွေးဖွားခဲ့သော အီတလီလူငယ်လေးဖြစ်ပြီး ကိုယ်တော်မြတ်စက္ကရမင်တူးအပေါ် အလွန်နက်ရှိုင်းသော ကြည်ညိုမှုရှိခဲ့ပါသည်။ ကွန်ပျူတာပရိုဂရမ် ရေးဆွဲရာတွင် ကျွမ်းကျင်သူဖြစ်ပြီး သူ၏ ဒစ်ဂျစ်တယ်စွမ်းရည်ကို အသုံးပြု၍ ကမ္ဘာတစ်ဝှမ်းရှိ ကိုယ်တော်မြတ် အံ့ဖွယ်ရာများကို မှတ်တမ်းတင်သည့် ဝက်ဘ်ဆိုက်တစ်ခုကို ဖန်တီးခဲ့ကာ ၂၀၀၆ ခုနှစ် အသက် ၁၅ နှစ်အရွယ်တွင် သွေးကင်ဆာဖြင့် ကွယ်လွန်ခဲ့ပါသည်။

WYD တွင် ပါဝင်လာရခြင်းအကြောင်းရင်း - "ထောင်စုနှစ်သစ်၏ ရဟန္တာ" အဖြစ် လူသိများသော သူသည် ဒစ်ဂျစ်တယ်ခေတ်တွင် သန့်ရှင်းစင်ကြယ်ခြင်း၏ စံပြတစ်ပါးဖြစ်သောကြောင့် ရွေးချယ်ခံရခြင်း ဖြစ်ပါသည်။ အင်တာနက်ကို ဧဝံဂေလိတရားဟောပြောခြင်း အတွက် ကိရိယာတစ်ခု အဖြစ် အသုံးပြုနိုင်ကြောင်းနှင့် နည်းပညာ လွှမ်းမိုးသော ယနေ့ခေတ် ယဉ်ကျေးမှုတွင်လည်း သူတော်စင်တစ်ဦးဖြစ်လာနိုင်ကြောင်း လူငယ်များအား သက်သေပြနေပါသည်။

ယခုနှစ် ကမ္ဘာ့လူငယ်များနေ့ (WYD Seoul 2027) ၏ ကာကွယ်စောင့်ရှောက်သူများအဖြစ် အဘယ်ကြောင့် ရွေးချယ်ခံရသနည်း

ပွဲစီစဉ်သူများက ဤရဟန္တာ (၅) ပါးအား WYD Seoul 2027 ၏ အဓိက အကြောင်းအရာများဖြစ်သော အမှန်တရား၊ မေတ္တာနှင့် ငြိမ်းချမ်းရေး (Truth, Love, and Peace) ကို အခြေခံ၍ တရားဝင် ရွေးချယ်ခဲ့ခြင်း ဖြစ်ပါသည်။

၎င်းတို့သည် တိုက်ကြီးအသီးသီးနှင့် ခေတ်ကာလအမျိုးမျိုးကို ကိုယ်စားပြုရုံ သာမက စစ်ပွဲ၊ အိုးအိမ်စွန့်ခွာ ထွက်ပြေးရမှု၊ ကျွန်ပြုခံရမှုနှင့် ခေတ်သစ် ယဉ်ကျေးမှု၏ ဖိအားပေးမှု စသည့် အခက်အခဲများကို ကိုယ်တိုင်ကြုံတွေ့ ကျော်ဖြတ်ခဲ့သူများ ဖြစ်ကြသည်။ ထို့ကြောင့် ၎င်းတို့၏ဘဝများသည် ယနေ့ခေတ် လူငယ်များ ရင်ဆိုင်နေရသော အခက်အခဲများနှင့် တိုက်ရိုက်ဆက်စပ်နေပြီး လက်တွေ့ဘဝတွင် ယုံကြည်ခြင်းကို မည်သို့ ရှင်သန်ရမည်ဟူသော တိကျသေချာသည့် လမ်းပြမှုများကို ပေးစွမ်းနိုင်သောကြောင့် လာမည့် ကမ္ဘာ့ လူငယ်များနေ့အတွက် လူငယ်များအား ကာကွယ်စောင့်ရှောက်သူ ရဟန္တာများအဖြစ် ဂုဏ်ပြုရွေးချယ်ထားခြင်း ဖြစ်ပါသည်။

Lawrence - A-Lin Credo
28 April 2026

တင်ဆက်သူ

Address

Hua Mak

10240

Website

facebook.com

Alerts

Be the first to know and let us send you an email when A-Lin Credo posts news and promotions. Your email address will not be used for any other purpose, and you can unsubscribe at any time.

Want your business to be the top-listed Media Company?

Country:

City: