31/07/2025
■ ဒီဂျစ်တယ်ပလက်ဖောင်းများ ပိတ်ပင်ခံရမည့် ဆိုင်ဘာလုံခြုံရေး ဥပဒေ စစ်ကောင်စီအတည်ပြု
Western News| ဇူလိုင် ၃၁
ပြည်တွင်းပြည်ပက မြန်မာနိုင်ငံသားများကို အရေးယူနိုင်သည့် ဆိုင်ဘာလုံခြုံရေးဥပဒေမှာ ဇူလိုင်လ ၃၀ ရက်နေ့ကစ၍ အသက်ဝင်ကြောင်း စစ်ကောင်စီက ထုတ်ပြန်ထားသည်။
ခွင့်ပြုချက်မရှိဘဲ Virtual Private Network (VPN) ထူထောင်ခြင်းနှင့် အွန်လိုင်းလောင်းကစားများကို ဆိုင်ဘာလုံခြုံရေးဥပဒေက တားဆီးပိတ်ပင်ထားသည်။
Facebook, Youtube, Tiktok, Website ပလက်ဖောင်းများမှာလည်း ဆိုင်ဘာလုံခြုံရေးဥပဒေအရ မှတ်ပုံတင်ရန် လိုအပ်ကြောင်းနှင့် ထိန်းချုပ်မှုကိုလည်း လိုက်နာရန် လိုအပ်ကြောင်း ဖော်ပြထားသည်။
ဆိုင်ဘာလုံခြုံရေးဥပဒေကို ၂၀၂၅ ခုနှစ် ဇန်နဝါရီလ ၁ ရက်နေ့က ပြဌာန်းခဲ့သော်လည်း ဇူလိုင်လ ၃၀ ရက်နေ့တွင် စတင် အသက်ဝင်ကြောင်း စစ်ကောင်စီက ထုတ်ပြန်ထားခြင်းဖြစ်သည်။
ဆိုင်ဘာလုံခြုံရေးဥပဒေအရ သတင်းအချက်အလက်များကို ဖယ်ရှားခြင်း၊ ဒီဂျစ်တယ် ပလက်ဖောင်းများကို ပိတ်ပင်ခြင်း၊ ရပ်တန့်ခြင်းနှင့် ပလက်ဖောင်းပိုင် ပစ္စည်းများအား ယာယီထိန်းချုပ်ခြင်းများကို ပြုလုပ်နိုင်သည်ဟု သိရသည်။
ပြည်တွင်းက နိုင်ငံသားဖြစ်စေ၊ ပြည်ပရောက် မြန်မာနိုင်ငံသားများဖြစ်စေ အမျိုးသားဆိုက်ဘာနယ်ပယ်နှင့် ချိတ်ဆက်နေသော အခြားဆိုက်ဘာနယ်ပယ်တစ်ခုခုတွင် ကျူးလွန်သည့်ပြစ်မှုများကို ဤဥပဒေအရ စီရင်ပိုင်ခွင့်ရှိသည်ဟု သိရသည်။
ပြစ်ဒဏ်များမှာ ဆိုင်ဘာလုံခြုံရေးဆိုင်ရာ ဝန်ဆောင်မှုလုပ်ငန်း လိုင်စင်မရှိဘဲ ဆောင်ရွက်နေပါက အနည်းဆုံး ထောင်ဒဏ် ၁ လနှင့် အများဆုံး ထောင်ဒဏ် ၆ လချမှတ်နိုင်ပြီး ငွေဒဏ် ကျပ် ၁၀ သိန်းမှ ကျပ်သိန်း ၁၀၀ ချမှတ်နိုင်သည့်အပြင် သက်သေခံပစ္စည်းများကိုလည်း နိုင်ငံ့ဘဏ္ဍာအဖြစ် သိမ်းဆည်း ခံရမည်ဖြစ်သည်။
အသုံးပြုသူ ၁ သိန်းနှင့် အထက်ရှိသော ဒီဂျစ်တယ် ပလက်ဖောင်းများမှာ လိုင်စင်မရှိဘဲ ဆောင်ရွက်နေပါက ကျပ်သိန်း ၁၀၀၀ ထက်မနည်းသည့် ငွေဒဏ် ချမှတ်ခံရမည့်အပြင် သက်သေခံပစ္စည်းများကိုလည်း သိမ်းဆည်းခံရမည်ဖြစ်သည်။
ဆိုင်ဘာ အလွဲသုံးစားပြုလုပ်ပါကလည်း အနည်းဆုံး ထောင်ဒဏ် ၁ နှစ်မှ အများဆုံး ထောင်ဒဏ် ၃ နှစ်အထိ ချမှတ်ခံရနိုင်ပြီး ကျပ် သိန်း ၅၀ မှ ကျပ်သိန်း ၂၀၀ ထက်မပိုသည့် ငွေဒဏ်ကို ခံရမည်ဖြစ်သည်။
ဆိုင်ဘာအရင်းအမြစ်ကို အသုံးပြုပြီး အခြားသူ၏ အွန်လိုင်းငွေကြေးတစ်ရပ်ရပ်ကို ခိုးယူခြင်း သို့မဟုတ် အကျိုးစီးပွားဖျက်ဆီးခြင်းအတွက် အနည်းဆုံး ထောင်ဒဏ် ၂ နှစ်မှ အများဆုံး ထောင်ဒဏ် ၇ နှစ်အထိ ချမှတ်ခံရမည့်အပြင် ငွေဒဏ်လည်း ခံရနိုင်သည်။
ဝန်ကြီးဌာန၏ ခွင့်ချက်မရှိဘဲ VPN ထူထောင်ခြင်းနှင့် ဝန်ဆောင်မှုပေးခြင်းအတွက် ထောင်ဒဏ် အနည်းဆုံး ၁ လမှ အများဆုံး ၆ လအထိ ချမှတ်ခံရမည့်အပြင် ကျပ်သိန်း ၁၀၀ ထက်မပိုသော ငွေဒဏ်လည်း ချမှတ်ခံရမည်ဖြစ်သည်။
ယင်းအပြင် ခွင့်ပြုချက်မရှိဘဲ လွန်လိုင်းလောင်းစကားများ ပြုလုပ်ပါကလည်း အနည်းဆုံး ထောင်ဒဏ် ၆ လမှ အများဆုံး ၁ နှစ်အထိ ချမှတ်ခံရမည့်အပြင် ကျပ်သိန်း ၂၀၀ ထက်မပိုသော ငွေဒဏ်ကိုလည်း ချမှတ်ခံရနိုင်သည်။
အများပြည်သူ ကြည့်ရှုရန် မသင့်လျော်သော သတင်းအချက်အလက်များကို အီလက်ထရောနစ် နည်းပညာဖြင့် ဖြန့်ချိခြင်း၊ ဖြန့်ပေးခြင်း၊ ပေးပို့ခြင်း၊ ကူးယူခြင်း၊ ရောင်းချခြင်းတို့ကို ပြုလုပ်ပါကလည်း ထောင်ဒဏ် အနည်းဆုံး ၁ လမှ အများဆုံး ၆ လအထိ ချမှတ်နိုင်ပြီး ကျပ် ၁၀ သိန်းမှ အများဆုံး ကျပ် သိန်း ၁၀၀ ထက်မပိုသည့် ငွေဒဏ်ကိုပါ ချမှတ်ခံရမည်ဖြစ်သည်။
ဆိုင်ဘာနှင့်ပတ်သက်ပြီး ကျူးလွန်ခြင်း၊ ကျူးလွန်ရန် အားထုတ်ခြင်း၊ ကျူးလွန်ရန် အားပေးခြင်း၊ ကျူးလွန်ရန် ပူးပေါင်းကြံစည်ခြင်းတို့ကိုလည်း ဤဥပဒေအရ အရေးယူပြစ်ဒဏ်ပေးအပ်နိုင်ကြောင်း သိရသည်။
#စစ်ကောင်စီ #ဆိုင်ဘာလုံခြုံရေးဥပဒေ #ဒီဂျစ်တယ်အခွင့်အရေး #ပိတ်ပင်ခံရ #အရေးယူမည် #အပြစ်ပေးမည်
