04/03/2025
ထိုင်း အစိုးရက ထိုင်းနိုင်ငံသား အမည်ခံထားတဲ့ နိုင်ငံခြားသား စီးပွားရေး လုပ်ငန်းတွေကို နှိမ်နင်းဖို့ ဥပဒေကို တင်းကြပ်မည်
ထိုင်း အစိုးရဟာ ထိုင်း နိုင်ငံသားတွေအတွက် တချို့ စီးပွားရေးလုပ်ငန်းတွေကို နိုင်ငံခြားသား စီးပွားရေး လုပ်ငန်း ဥပဒေ နဲ့ ကာကွယ်ပေးထားပြီး နိုင်ငံခြားသားတွေဟာ အဲဒီ ကန့်သတ်ထားတဲ့ လုပ်ငန်းတွေကို လုပ်ချင်ရင် အစိုးရထံကနေ ခွင့်ပြုချက်တောင်းရပါတယ်။
ထိုင်း အစိုးရဟာ ထိုင်း နိုင်ငံသား အမည်ခံထားတဲ့ နိုင်ငံခြားသား စီးပွားရေးလုပ်ငန်းတွေကို တားဆီးဖို့ အာရုံစိုက်ထားပါတယ်။ အခုတော့ ထိုင်း ဝန်ကြီးချုပ်က ကော်မတီ တစ်ခု တည်ထောင်လိုက်ပြီး ထိုင်း နိုင်ငံသား အမည်ခံထားတဲ့ လုပ်ငန်းတွေကို တင်းတင်းကြပ်ကြပ် စုံစမ်း အရေးယူမှာ ဖြစ်ပါတယ်။
ရေတို စီမံချက် အနေနဲ့ ဝန်ကြီးဌာနတွေအကြားမှာ သတင်းအချက်အလက်မျှဝေတာ၊ စုံစမ်းစစ်ဆေးတာ၊ ဖမ်းဆီး အရေးယူတာနဲ့ တိုင်ကြားမှု စင်တာ တည်ထောင်တာတို့ ပါဝင်ပါတယ်။ အလယ်အလတ် ကာလ စီမံချက်ထဲမှာ ဒေတာတွေကို ခွဲခြမ်းစိတ်ဖြာဖို့ အီလက်ထရောနစ် စနစ် တည်ဆောက်တာ၊ အန္တရာယ်များတဲ့ ထိုင်း နိုင်ငံသား အမည်ခံ လုပ်ငန်းတွေကို စစ်ဆေးတာနဲ့ သက်ဆိုင်ရာ ဝန်ကြီးဌာနတွေကို ထောက်ပံ့ကူညီတာတွေ ပါဝင်ပါတယ်။ ရေရှည် စီမံချက် အနေနဲ့ ဥပဒေ ချိုးဖောက်မှုတွေကို ပြန်လည်လေ့လာသုံးသပ်မှာ ဖြစ်ပါတယ်။
အရင်နှစ် စက်တင်ဘာလ ၁ ရက်ကနေ ဒီနှစ် ဇန်နဝါရီလ ၃၁ ရက်နေ့အတွင်း ထိုင်း နိုင်ငံသား အမည်ခံထားတဲ့ အမှု ၈၂၀ ကို စုံစမ်းစစ်ဆေးခဲ့ပြီး ဘတ် ၁၂.၅ ဘီလီယမ် ( ဒေါ်လာ ၃၆၄ သန်း) ကျော် ဆုံးရှုံးနစ်နာခဲ့ပါတယ်။ စီးပွားရေး ဖွံ့ဖြိုးတိုးတက်မှုဌာန (DBD) ရဲ့ ဒါရိုက်တာ Auramon Supthaweethum က DBD ဟာ ထိုင်းနိုင်ငံသား အမည်ခံထားတယ်လို့ သံသယရှိတဲ့ လုပ်ငန်းတွေကို နှစ်စဉ် စစ်ဆေးတယ်လို့ ပြောပါတယ်။
၂၀၂၄ ခုနှစ်မှာ DBD ဟာ ချင်းမိုင်၊ ချွန်ဘူရီ၊ ဖူးခက်၊ ကရာဘီ၊ စူရတ်ဌာနီ၊ Prachuap Khiri Khan နဲ့ ဘန်ကောက် အပါအဝင် ပြည်နယ်များစွာမှ ခရီးသွားလုပ်ငန်း၊ အိမ်ခြံမြေ၊ ကုန်ပစ္စည်း သယ်ယူပို့ဆောင်ရေးနဲ့ အွန်လိုင်း စီးပွားရေးလုပ်ငန်း ပြုလုပ်တဲ့ ကုမ္ပဏီ ၂၆,၈၃၀ ကို စုံစမ်းစစ်ဆေးခဲ့ပါတယ်။
အရင်နှစ် ဒီဇင်ဘာလ ၄ ရက်နေ့မှာ အွန်လိုင်း တိုင်ကြားရေး စင်တာကို တည်ထောင်ခဲ့ပါတယ်။ ထိုင်းနိုင်ငံသား အမည်ခံထားတဲ့ နိုင်ငံခြားသား လုပ်ငန်းတွေကို တွေ့ရှိရင် DBD ရဲ့ www.dbd.go.th Website ကနေ ထိုင်းနိုင်ငံသား အမည်ခံ စီးပွားရေးလုပ်ငန်း တိုင်ကြားမှု စင်တာမှာ သတင်းပေးနိုင်တယ်လို့ ပြောပါတယ်။
Ref : Thethaiger
#ဘန်ကောက်လမ်းညွှန်ကိုစိုင်း
