06/08/2025
သံတောင်ကြီးမြို့နယ်တွင် မြေပြိုခြင်းကြောင့် သေဆုံးသူ (၉) ဦးအထိရှိ ၊ ပျောက်ဆုံးသူများလည်း ရှိနေ
ကရင်ပြည်နယ် ၊ သံတောင်ကြီးမြို့နယ်အတွင်း မိုးကြီးခြင်းနှင့် အတူ မြေပြို ခြင်းကြောင့် သေဆုံးသူ (၉) ဦးအထိ ရှိနေပြီး ပျောက်ဆုံးသူများလည်း ရှိကြောင်း ဒေသခံများကပြောသည်။
ပြီးခဲ့သည့် ဇူလိုင်လ ကုန်ပိုင်းကစ၍ သံတောင်ကြီးမြို့နယ် တွင် မိုးအဆက်မပြတ် ရွာသွန်းကာ ဥယျာဥ်ခြံများအတွင်းမြေပြိုမှု ရှိခဲ့ပြီး သြဂုတ်လ (၄) ရက်နှင့် (၅) ရက်နေ့တို့တွင် လူသေဆုံးမှု ရှိခဲ့ကြောင်း ဒေသခံ ဆရာတော်တစ်ပါးက ပြောကြားသည်။
" သြဂုတ် (၄) နဲ့ (၅) ရက်မှာ မိုး တော်တော်ကြီးခဲ့တယ်။ (၄) ရက်နေ့မှာ ဥယျာဥ်ခြံတွေထဲမှာ နေတဲ့ သူတွေ (၅) ဦးသေဆုံးခဲ့ပြီးတော့ (၅) ရက်နေ့ညမှာ သစ်ပင်ပိပြီး တစ်မိသားစုတည်း (၄) ဦးသေဆုံးခဲ့တယ် " ဟု ၎င်းကပြောသည်။
သံတောင်ကြီး- တောင်ငူ လမ်းမပေါ်တွင်လည်း မြေပြိုမှုများရှိနေပြီး ကျေးရွာချင်းဆက်သွယ်ထားသည့် လမ်းတံတား (၁၀) ခုထက်မနည်းပြိုကျမှုများရှိနေကြောင်း ဒေသခံများထံကသိရသည်။
" အဓိက ပသီချောင်းရေကတော်တော်တက်လာပါတယ်။ သောက်ရေခမ်းချောင်းအနီးတံတားတွေလည်း ပျက်စီးပြိုကျသွားပါတယ်။ သံတောင်ကြီး ကနေ ရွှေညောင်ပင်ရွာဘက်သွားတဲ့တံတားတွေလည်း ကျိုးသွားပါတယ် ။ နောက်ပြီးနန့်ချိန်ကွင်ရွာတံတားလည်း ကျိုးသွားတယ်။ ဖာဝယ်အနီးက ရွာတွေလည်း သွားလာလို့မရတော့ပါဘူး " ဟု အခြားဒေသခံတစ်ဦးကပြောသည်။
သံတောင်ကြီးမြို့နယ်တွင် မြေပြိုမှုများကြောင့် ရပ်ကွက် (၄) ခုအတွင်းရှိ လူနေအိမ် (၃၀) ကျော်ပျက်စီးခဲ့ပြီး လုံးဝပျက်စီးခဲ့သော အိမ် (၁၀) အိမ်ရှိကြောင်း သိရသည်။
လက်ရှိတွင်လည်း မိုးအဆက်မပြတ်ရွာသွန်းနေပြီး တောင်ကျချောင်းရေမြင့်တက်မှုကြောင့် မြေပြိုမှုများ ဆက်လက်ဖြစ်ပွားနေမည်ကို ဒေသခံများ စိုးရိမ် နေကြရသည်။
