06/06/2026
စစ်ပွဲမှ ဆုတ်ခွာရန် မကြောက်ပါနှင့်ဟု ပူတင်အား ဇလန်စကီး အိတ်ဖွင့်ပေးစာပေးပို့၊ တရုတ်ကို မှီခိုနေရတဲ့ သနားစရာ ရုရှားခေါင်းဆောင် လို့ပြော
ရုရှားသမ္မတ ဗလာဒီမာ ပူတင်အနေဖြင့် ယူကရိန်းစစ်ပွဲကို အဆုံးသတ်ပြီး စစ်ပွဲအတွင်းမှ ရုန်းထွက်ဆုတ်ခွာရန် မကြောက်ရွံ့သင့်ကြောင်း ယူကရိန်းသမ္မတ ဗိုလိုဒီမာ ဇလန်စကီးက ကြာသပတေးနေ့တွင် ထုတ်ပြန်သည့် အိတ်ဖွင့်ပေးစာ၌ တိုက်တွန်းနှိုးဆော်လိုက်သည်။
သမ္မတ ဇလန်စကီးက ပူတင်အနေဖြင့် ယူကရိန်းပြည်သူများ၏ ခုခံမှုစွမ်းအားကို ကြိုတင်မျှော်လင့်မထားခဲ့ကြောင်း ထောက်ပြခဲ့ပြီး၊ ရုရှားခေါင်းဆောင်သည် စစ်ပွဲကို အဆုံးသတ်ရန် စဉ်းစားမည့်အစား ၂၀၂၇ နှင့် ၂၀၂၈ ခုနှစ်များအထိ စစ်ပွဲကို ဆက်လက်ဆင်နွှဲရန် အစီအစဉ်များ ချမှတ်နေသည့်အပြင် ဘီလာရုစ်နိုင်ငံကိုပါ စစ်ပွဲအတွင်း ဆွဲခေါ်ရန် ကြိုးပမ်းနေသည့် ထောက်လှမ်းရေးအချက်အလက်များ ရရှိထားကြောင်း ဖွင့်ချခဲ့သည်။
"စစ်ပွဲ ဆက်လက်ဖြစ်ပွားနေမယ်ဆိုရင်တော့ ယူကရိန်းအနေနဲ့ မိမိတို့ရဲ့ ဖြစ်တည်မှုအတွက် နောက်ဆုံးအထိ တိုက်ပွဲဝင်သွားမှာ ဖြစ်သလို၊ ကျွန်တော်တို့ကို ကူညီထောက်ပံ့မယ့် မဟာမိတ်တွေလည်း ရှိနေဦးမှာပါ။ ဒါပေမဲ့ ရုရှားသမ္မတကတော့ ရုရှားနိုင်ငံအတွက် မဟုတ်ဘဲ သူကိုယ်တိုင် အာဏာတည်မြဲရေးအတွက် ပြင်းပြင်းထန်ထန် ရုန်းကန်ရပါလိမ့်မယ်။ ရုရှားသမိုင်းကြောင်းအရလည်း ပူတင်အနေနဲ့ ရှေ့လျှောက်ရပ်တည်ဖို့ ခက်ခဲလာမယ်ဆိုတာ သူကိုယ်တိုင် ကောင်းကောင်းသိပါတယ်” ဟု ဇလန်စကီးက ဆိုသည်။
ဇလန်စကီးက ရုရှားအစိုးရသည် ယူကရိန်းတွင် ပြည်တွင်းမငြိမ်မသက်မှုများ ဖြစ်လာရန် မျှော်လင့်ခဲ့သော်လည်း လက်တွေ့တွင် ရုရှားစစ်တပ်အတွင်း (ပရီဂိုရှင်၏ ဝဂ်နာကြေးစားစပ်ဖွဲ့) က ဇွန် ၂၃ ရက်တွင် ပုန်ကန်ခဲ့သည့် ဖြစ်စဉ်ကို ပူတင် မှတ်မိနေသင့်ကြောင်း သတိပေးခဲ့သည်။ ထို့အပြင် ပူတင်သည် ရုရှားသမိုင်းတွင် စစ်ရေးအကူအညီအတွက် မြောက်ကိုရီးယားကိုအားကိုးခဲ့ရပြီး တရုတ်နိုင်ငံအပေါ် အလွန်အမင်း မှီခိုခဲ့ရသည့် "ပထမဆုံးသော ရုရှားခေါင်းဆောင်" ဖြစ်လာခဲ့သည်ဟု ပြစ်တင်ဝေဖန်ခဲ့သည်။
အလားတူ ရုရှားပြည်သူများသည်လည်း ၎င်းတို့၏ မြေပေါ်သို့ ကျရောက်လာသည့် ယူကရိန်း၏ ဒုံးကျည်နှင့် ဒရုန်းဒဏ်များကို မနှစ်သက်ကြသလို၊ စစ်ပွဲကြောင့် ဖြစ်ပေါ်လာသည့် လောင်စာဆီပြတ်လပ်မှုနှင့် နိုင်ငံတကာ ပိတ်ဆို့မှုဒဏ်များကို ငြီးငွေ့နေကြပြီဖြစ်ကြောင်း ၎င်းက ထည့်သွင်းပြောကြားခဲ့သည်။
သမ္မတ ဇလန်စကီးက စစ်ပွဲနှင့် ငြိမ်းချမ်းရေးပြဿနာများကို ထိပ်သီးခေါင်းဆောင်များကသာ ဆုံးဖြတ်နိုင်မည်ဖြစ်၍ စစ်ပွဲကို အဆုံးသတ်ရန်အတွက် ရုရှားသမ္မတ ပူတင်နှင့် တိုက်ရိုက်တွေ့ဆုံဆွေးနွေးရန် အဆိုပြုခဲ့ပြီး၊ အဆိုပါ ထိပ်သီးတွေ့ဆုံပွဲကို လက်ခံကျင်းပပေးရန် ဆွစ်ဇာလန်၊ တူရကီနှင့် အာရပ်ကမ္ဘာမှ နိုင်ငံများက အသင့်ရှိနေကြောင်း အိတ်ဖွင့်ပေးစာတွင် အလေးအနက် တောင်းဆိုထားသည်။
#သတင်းထူးသတင်းဦး #နိုင်ငံတကာ #သတင်းစုံ #သတင်း #ပူတင်
