20/07/2025
ဝေါလေမြိုင်ဒေသမှ DKBA အဆောက်အဦနှင့် အွန်လိုင်းငွေလိမ်လုပ်ငန်းကို စစ်ကောင်စီ ဗုံးကြဲ
ဟန်ထူးဇော်
မဇ္ဈိမ။ ။ကရင်ပြည်နယ်၊ မြဝတီမြို့တောင်ဘက်ခြမ်း ထိုင်း-မြန်မာနယ်စပ် ဝေါလေမြိုင်မြို့နယ်အနီးရှိ ဒီမိုကရေစီအကျိုးပြုကရင်တပ်မတော်(DKBA)အဆောက်အဦတခုကို ယမန်နေ့(ဇူလိုင် ၁၉ ရက်) နံနက် ၁၀ နာရီဝန်းကျင်တွင် စစ်ကောင်စီတပ်က ဂျက်ဖိုက်တာဖြင့် ဗုံးကြဲတိုက်ခိုက်ခဲ့ကြောင်း သိရသည်။
“ဝေါ်လေမြိုင်မြို့အပြင်ဘက် DKBA သင်တန်းကျောင်းနေရာကိုကြဲတာ။ လူထိခိုက်မှုရှိတယ်။ အဆောက် အဦကတစစီဖြစ်သွားတယ်။ ပေါင် ၅၀၀ နဲ့ကြဲသွားတာ”ဟု သတင်းရင်းမြစ်တဦးက မဇ္ဈိမကိုပြောသည်။
ဝေါလေမြိုင်မြို့အနီး ဝေါလေဗျူဟာစခန်းကုန်းကို KNU, PDF နှင့် တော်လှန်ရေးပူးပေါင်းတပ်ဖွဲ့တို့က စခန်းသိမ်းတိုက်ပွဲပြုလုပ်နေခြင်းနေစဉ် ယခုကဲ့သို့ ဗုံးကြဲသွားခြင်းဖြစ်ကြောင်း သိရသည်။
ပြီးခဲ့သည့် ဇူလိုင်လ ၁၃ ရက်နေ့က စစ်ကောင်စီတပ်သည် ကာမီကဇေ အသေခံဒရုန်းလေးစီးဖြင့် ဝေါလေ မြိုင်မြို့အနီးရှိ ရှေ့တန်းနေရာအချို့ကို တိုက်ခိုက်ခဲ့သည်။ ယင်းတိုက်ခိုက်မှုတွင် ဒရုန်းနှစ်စီးသည် ည ၈ နာရီခွဲဝန်းကျင်၌ ဝေါလေမြိုင်မြို့အပြင်ဘက် ဝေါလေကားလမ်းမဘေးရှိ အွန်လိုင်းငွေလိမ်လုပ်ငန်းလုပ် ကိုင်နေသည့် ခြံဝန်းအတွင်းကို ကျရောက်ပေါက်ကွဲခဲ့ကြောင်းသိရသည်။
“အဲဒီနေ့က ညဖက်ကြီးနှစ်စီးလာတာ၊ တစီးကျပြီး နောက်တစီးက ၁၅ မိနစ်ပဲ ကွာတယ်။ ထမင်းစား ဆောင်နားကိုကျတာ၊ လူထိခိုက်မှုမရှိဘူး။ အဆောက်အဦးတော့ နည်းနည်းထိသွားတယ်။ တချို့ပြောတာ တော့ ဂျန်မာ(Jammar) မိပြီး ဒီထဲကျတယ်လို့ပြောတာပဲ။ ဒါပေမယ့် နှစ်စီးလုံးက တနေရာတည်းကိုကျ တာ။ ပြီးခဲ့တဲ့ရက်က ကျည်ကျော်ကျတာ လက်နက်ကြီးအနားမှာ ကျတာတော့ရှိတယ်” ဟု DKBA လက် နက်ကိုင်အဖွဲ့နှင့်နီးစပ်သူတဦးကပြောသည်။
အဆိုပါဗုံးကြဲခံရမှုနှင့်ပတ်သက်ပြီး မဇ္ဈိမက DKBA တာဝန်ရှိသူများထံ အကြိမ်ကြိမ်ဆက်သွယ်ခဲ့သော် လည်း ဖုန်းလက်ခံဖြေကြားခြင်း မရှိခဲ့ပေ။
ပြီးခဲ့သည့် မေလ ၂၈ ရက်နေ့က သေ့သော်ဘိုးစခန်းကုန်းမကျရေးအတွက် ဝေါ်လေဗျူဟာစခန်းမှ စစ်ကူ လာသည့် စစ်ကောင်စီတပ်သည် DKBA ဌာနချုပ်ရှိရာ ဆုံဆည်းမြိုင်ကျေးရွာတွင် KNU, PDF နှင့် တော် လှန်ရေးပူးပေါင်းတပ်ဖွဲ့တို့နှင့် တိုက်ပွဲဖြစ်ပွားခဲ့သည်။ ယင်းတိုက်ပွဲတွင် စစ်ကောင်စီတပ်မှ သေဆုံး၊ ဖမ်း ဆီးခံရမှုများပြားခဲ့သလို အချို့မှာ ထိုင်းနိုင်ငံကို ထွက်ပြေးသွားခဲ့ပြီး စစ်ကြောင်းတကြောင်းလုံး ပျက်သွား ခဲ့ခြင်းကြောင့် DKBA ဌာနချုပ်ရှိရာ ဆုံဆည်းမြိုင်ကျေးရွာကို စစ်ကောင်စီက ဗုံးကြဲတိုက်ခိုက်ခဲ့ခြင်း ဖြစ်သည်။
လွန်ခဲ့သော မေလမှစတင်ကာ KNU, PDF နှင့် တော်လှန်ရေးပူးပေါင်းတပ်ဖွဲ့သည် မြဝတီ-ဝေါလေကား လမ်းမဘေးရှိ စစ်ကောင်စီတပ်စခန်းများနှင့် ထိုင်း-မြန်မာနယ်စပ်ဘေးရှိ တပ်စခန်းရှစ်ခုကို တိုက်ခိုက် သိမ်းပိုက်နိုင်ခဲ့သည်။ ယင်းဒေသတွင် နောက်ဆုံးကျန်ရှိနေသည့် ဝေါလေဗျူဟာစခန်းကို တော်လှန်ရေး တပ်ဖွဲ့များက ဝိုင်းဝန်ပိတ်ဆို့တိုက်ခိုက်လျှက်ရှိသည်။
စာတည်း။ ။စောဖေ
ပုံအညွှန်း - ဇူလိုင်လ ၁၉ ရက်နေ့က စစ်ကောင်စီတပ်မှ လေကြောင်းတိုက်ခိုက်မှုပြုလုပ်ခဲ့သည့်DKBA အဆောက်အဦး
ပုံ-ချမ်းမြေ့ (ကော်ဘရာစစ်ကြောင်း) ပြည်သူ့ကာကွယ်ရေးတပ်မတော်
#ကရင်ပြည်နယ်
#ဝေါလေမြိုင်ဒေသ
#စစ်ကောင်စီ
