25/10/2025
ထိုင်းဘုရင်မကြီး သီရိခေတ် ကီတီယာကာရ သက်တော် (၉၃) နှစ်မှာ နတ်ရွာစံ...
ဘုရင်မကြီး သီရိခေတ် ဟာ လက်ရှိ ထိုင်းဘုရင် ဝဇီရာလောင်ကွန်း ရဲ့ မယ်တော်ဖြစ်ပြီး ၂၀၁၆ က နတ်ရွာစံသွားတဲ့ ဘုရင် ဘူမိဘော အဒူလာဒက်ချ် ရဲ့ ကြင်ယာတော် ဖြစ်သလို၊ မင်းသမီး မဟာ ချကရီ သီရိဒုံ ရဲ့ မယ်တော်လည်း ဖြစ်ပါတယ်။
ဘုရင်မကြီးရဲ့ နာမည် အပြည့်အစုံ ကတော့ ‘’မုံ ရာဂျာဝေါင် သီရိခေတ် ကီတီယာကာရ’’ ဖြစ်ပါတယ်။
ဘုရင်မကြီးဟာ အောက်တိုဘာလ ၁၇ ရက်နေ့က စလို့ သွေးဆိပ်တက် ရောဂါကို ခံစားခဲ့ရကြောင်း တော်ဝင်နန်းတော် ကြေညာချက်မှာ ဖေါ်ပြထားပါတယ်။
ဆရာဝန်အဖွဲ့က အစွမ်းကုန် ကြိုးပမ်း ကုသပေးခဲ့ပေမယ့်လည်း ဘုရင်မကြီး အခြေအနေဟာ တဖြည်းဖြည်း ဆိုးရွားလာခဲ့တာ ဖြစ်တယ်လို့ ဆိုပါတယ်။
တကယ်တမ်းမှာတော့ ဘုရင်မကြီးဟာ ၂၀၁၉ စက်တင်ဘာ ၇ ရက်နေ့ကတည်း ကျန်းမာရေး အခြေအနေကြောင့် ချူလာလောင်ကွန်း အထိမ်းအမှတ် ဆေးရုံမှာ တက်ရောက်ပြီး ဆေးကုသ ခံယူရင်း ဆေးရုံမှာပဲ ၆ နှစ်လုံးလုံး တော်ဝင်စံမြန်း နေထိုင်ခဲ့တာ ဖြစ်ပါတယ်။
‘’မိခင်ဘုရင်မကြီး’’ ဘွဲ့တော်ခံ ထိုင်းဘုရင်မကြီး သီရိခေတ် ဟာ မနေ့ အောက်တိုဘာ ၂၄ ရက်နေ့ ည ၉ နာရီ ၂၁ မိနစ်မှာ ချူလာလောင်ကွန်း အထိမ်းအမှတ် ဆေးရုံ မှာ ကံတော်ကုန် နတ်ရွာစံ သွားပြီ ဖြစ်ကြောင်း ထိုင်းတော်ဝင်နန်းတော်ရေးရာ ဗျူရို က ကြေညာချက် ထုတ်ပြန်လိုက် ပါတယ်။
ဘုရင်ဝဇီရာလောင်ကွန်း အနေနဲ့ ဘုရင်မကြီးရဲ့ ရုပ်ကလပ် ကို တော်ဝင် ထုံးတမ်းစဥ်လာနဲ့ အညီ အမြင့်ဆုံး ဂုဏ်ပြုမှုတွေနဲ့ တော်ဝင် စျာပန ကျင်းပဖို့ တော်ဝငန်နန်းတော်ရေးရာ ဗျူရိုကို အမိန့်တော် ထုတ်ပြန်ထားပါတယ်။
ဒါ့အပြင် တော်ဝင်မိသားစုတွေနဲ့ တော်ဝင်အမှုထမ်းတွေ ကို ဘုရင်မကြီး နတ်ရွာစံတဲ့ နေ့ကနေ တနှစ်တာ ကာလပတ်လုံး ဝမ်းနည်းပူဆွေးခြင်း ကျင်းပဖို့ ဘုရင်က ခွင့်ပြုမိန့် ချမှတ်ခဲ့ပါတယ်။
