04/08/2025
PUPG Mobile World Cup Champion ဖြစ်သွားခဲ့တဲ့ " Yangon Galacticos"
------------------------------------------
- ဆိုတော့ "eSports World Cup" ဆိုတာဘာလဲ၊ ဘယ်ကစသလဲ?
- eSports World Cup (EWC) ဆိုတာကတော့ ကမ္ဘာ့အကြီးဆုံး professional eSports ပြိုင်ပွဲကြီးတစ်ခုဖြစ်ပါတယ်။ ဒီပွဲကို ဆော်ဒီအာရေဗျနိုင်ငံက ဦးစီးကျင်းပတာဖြစ်ပြီး ၂၀၂၄ ခုနှစ်မှာ စတင်ခဲ့တာပါ။ ပထမဆုံးအကြိမ်ပြိုင်ပွဲဖြစ်တဲ့ EWC 2024 မှာတင် ဆုကြေးငွေ အမေရိကန်ဒေါ်လာ ၆၂.၅ သန်းအထိ ချီးမြှင့်ခဲ့ပြီး ဒါဟာ eSports သမိုင်းမှာ အများဆုံးဆုကြေးငွေဖြစ်ပါတယ်။
- EWC ဟာ ယခင်က ကျင်းပခဲ့တဲ့ Gamers8 ဆိုတဲ့ ပွဲတော်ကနေ ဆင်းသက်လာတာဖြစ်ပါတယ်။ Esports World Cup ဟာ အဖွဲ့အစည်းတစ်ခုတည်းက ဦးစီးကျင်းပတာဖြစ်ပေမဲ့ ပြိုင်ပွဲတွေကတော့ လူကြိုက်များတဲ့ ဂိမ်းအမျိုးအစားပေါင်းစုံကို စုပေါင်းကျင်းပပေးတာဖြစ်ပါတယ်။ Mobile Legends: Bang Bang, PUBG Mobile, Dota 2, Counter-Strike 2, စတဲ့ ဂိမ်းပေါင်းများစွာ ပါဝင်ပါတယ်။
- မြန်မာတွေ "eSports World Cup" မှာ ချန်ပီယံ ဖြစ်ဖူးလား?
- ဟုတ်ကဲ့၊ ဖြစ်ဖူးခဲ့ပါပြီ။ အခု ၂၀၂၅ ခုနှစ်၊ Esports World Cup မှာ PUBG Mobile World Cup ပြိုင်ပွဲရဲ့ ချန်ပီယံဆုကို မြန်မာ့ကိုယ်စားပြုအသင်းဖြစ်တဲ့ Yangon Galacticos (YG) က ဆွတ်ခူးရရှိခဲ့ပါတယ်။ ဒါဟာ EWC သမိုင်းတစ်လျှောက် မြန်မာနိုင်ငံအတွက် ပထမဆုံးသော ချန်ပီယံဆုလည်း ဖြစ်ပါတယ်။
- Yangon Galacticos အသင်းဟာ ပြိုင်ပွဲမှာ အစပိုင်းက ရုန်းကန်ခဲ့ရပြီး နောက်ဆုံး ဖိုင်နယ်အဆင့်ကိုတောင်မှ ၁ မှတ်အသာနဲ့ မနည်းတက်လှမ်းနိုင်ခဲ့တာပါ။ ဒါပေမဲ့ final မှာတော့ သူတို့ရဲ့ အစွမ်းအစအပြည့်အဝကို ပြသခဲ့ပြီး PUBG Mobile World Cup ချန်ပီယံဆုကို ဆွတ်ခူးကာ ဆုကြေးငွေ "အမေရိကန်ဒေါ်လာ ၅၀၀,၀၀၀" လည်း ရရှိခဲ့ပါတယ်။
- ပြိုင်ပွဲတစ်လျှောက် Predictor တွေကိုယ်တိုင်က အောက်အသင်းအဖြစ်သတ်မှတ်ထားရာကနေ အခုလို champion ဆုပါသိမ်းယူပြလိုက်တာကပိုပြီးချိုမြိန်စရာဖြစ်မယ်ထင်ပါတယ်။
ဆိုတော့ "မြန်မာ" အသင်းတွေ eSports နယ်ပယ်မှာအမြင့်ဆုံးဘယ်လောက်အဆင့်ထိပျံသန်းပြနိုင်ခဲ့လဲ?
- မြန်မာ eSports ရဲ့ အမြင့်ဆုံးအောင်မြင်မှုများ
eSports World Cup ချန်ပီယံဖြစ်ခဲ့တာအပြင် တခြားထူးခြားတဲ့ အောင်မြင်မှုတွေလည်း ရှိပါသေးတယ်။
- M2 World Championship (MLBB) - Burmese Ghouls အသင်းဟာ ၂၀၂၁ ခုနှစ်မှာ ကျင်းပခဲ့တဲ့ Mobile Legends: Bang Bang ရဲ့ ကမ္ဘာ့ဖလားပြိုင်ပွဲ M2 World Championship မှာ ဒုတိယဆု (1st Runner Up) ရရှိခဲ့ပါတယ်။ ဒါဟာ မြန်မာ eSports သမိုင်းတစ်လျှောက်မှာ အကြီးမားဆုံး အောင်မြင်မှုတွေထဲက တစ်ခုဖြစ်ပြီး ကမ္ဘာတစ်ဝန်းက ပရိသတ်တွေကို အံ့အားသင့်စေခဲ့ပါတယ်။
- IESF World Esports Championship - ၂၀၂၃ ခုနှစ်မှာတော့ မြန်မာနိုင်ငံကိုယ်စားပြု Dota 2 အသင်းဟာ IESF World Esports Championship မှာ ငွေတံဆိပ်ဆု (Silver Medal) ရရှိခဲ့ပါတယ်။ ဒီပြိုင်ပွဲမှာပဲ PUBG Mobile အသင်းကလည်း စတုတ္ထနေရာအထိ ရောက်ရှိခဲ့ပါတယ်။ ဒီအောင်မြင်မှုတွေကြောင့် မြန်မာ eSports အဖွဲ့ချုပ်ဟာ IESF ရဲ့ အကောင်းဆုံး eSports နိုင်ငံများစာရင်းမှာ ဒုတိယနေရာအထိ ရပ်တည်နိုင်ခဲ့ပါတယ်။
- Mobile Legends: Bang Bang Women Invitational (MWI) 2025 မှာလဲ "Terror Queens" မြန်မာအမျိုးသမီးအသင်းဟာ 2025 ခုနှစ်၊ ဇူလိုင်လမှာ ဆော်ဒီအာရေဗျနိုင်ငံ၊ ရီယာ့ဒ်မြို့မှာ ကျင်းပခဲ့တဲ့ MWI 2025 ပြိုင်ပွဲမှာ နိုင်ငံတကာအသင်းတွေနဲ့ ယှဉ်ပြိုင်ခဲ့ပြီး တတိယနေရာကို ရယူနိုင်ခဲ့ပါတယ်။ ဒီအောင်မြင်မှုဟာ အမျိုးသား eSports အသင်းတွေလိုပဲ မြန်မာအမျိုးသမီး eSports အားကစားသမားတွေဟာလည်း ကမ္ဘာ့အဆင့်မီ စွမ်းရည်တွေရှိတယ်ဆိုတာကို သက်သေပြခဲ့တာဖြစ်ပါတယ်။
- ဒီအောင်မြင်မှုတွေဟာ မြန်မာ့ eSports အသိုင်းအဝိုင်းအတွက် ဂုဏ်ယူစရာဖြစ်ပြီး နိုင်ငံတကာအဆင့်မှာပါ အောင်မြင်မှုတွေ ဆက်တိုက်ဖန်တီးနိုင်တယ်ဆိုတာကို ပြသနေပါတယ်။
