12/05/2026
MV GUO QIANG 8 သင်္ဘောပေါ်တွင် မြန်မာသင်္ဘောသား ၂ ဦး အလုံပိတ်နေရာ (Enclosed Space) အတွင်း အောက်ဆီဂျင်ပြတ်လပ်၍ သေဆုံး
နိုင်ငံခြားကုန်တင်သင်္ဘောကြီးဖြစ်သော MV GUO QIANG 8 ပေါ်တွင် တာဝန်ထမ်းဆောင်နေသည့် မြန်မာသင်္ဘောသား ၂ ဦးမှာ သင်္ဘောအင်ဂျင်ခန်းရှိ လေဝင်လေထွက်မရှိသော အလုံပိတ်နေရာ (Enclosed Space) အတွင်း ဝင်ရောက်လုပ်ကိုင်စဉ် အောက်ဆီဂျင်ပြတ်လပ်၍ သေဆုံးသွားကြောင်း သိရသည်။
ဖြစ်စဉ်မှာ မေလ ၇ ရက်နေ့က Fitter ရာထူးဖြင့် တာဝန်ထမ်းဆောင်နေသူ ကိုဝင်းထွဋ်ဝင်း (ခ) ကိုသဲမောင် နှင့် ကိုအုပ်စိုးအောင်တို့ ၂ ဦးသည် အင်ဂျင်ခန်းအတွင်းရှိ အလုံပိတ်နေရာတစ်ခုသို့ သွားရောက်အလုပ်လုပ်ကိုင်ရာမှ မမြင်နိုင်သော အောက်ဆီဂျင်ပြတ်လပ်မှုအန္တရာယ်နှင့် ရင်ဆိုင်ခဲ့ရခြင်းဖြစ်သည်။ သေဆုံးသူ ကိုဝင်းထွဋ်ဝင်းမှာ အသက် ၃၉ နှစ်အရွယ် အိမ်ထောင်သည်တစ်ဦးဖြစ်ပြီး ဇနီးနှင့် သားသမီး ၂ ဦး ကျန်ရစ်ခဲ့ကာ၊ ကိုအုပ်စိုးအောင်မှာ လူပျိုလူလွတ်တစ်ဦးဖြစ်ကြောင်း သိရှိရသည်။
ဝါရင့်သင်္ဘောသားများ၏ အဆိုအရ သင်္ဘောများပေါ်ရှိ အင်ဂျင်ခန်းအခန်းလွတ်များ၊ တိုင်ကီများနှင့် လေလုံနေသည့် နေရာများသည် အောက်ဆီဂျင်နည်းပါးခြင်းနှင့် အဆိပ်ငွေ့ရှိခြင်းတို့ကြောင့် အန္တရာယ်အရှိဆုံးနေရာများ ဖြစ်သည်။ ထို့ကြောင့် ယင်းကဲ့သို့သော အလုံပိတ်နေရာများသို့ မဝင်ရောက်မီ စနစ်တကျ လေဝင်လေထွက်ပြုလုပ်ခြင်း (Ventilation)၊ အောက်ဆီဂျင်ပမာဏ တိုင်းတာခြင်းနှင့် အပြင်ဘက်မှ စောင့်ကြည့်သူ (Standby Person) ထားရှိခြင်း စသည့် လုံခြုံရေးစည်းကမ်းများကို တိကျစွာလိုက်နာရန် လိုအပ်ကြောင်း အကြံပြုထားကြပါသည်။
