06/09/2025
"၂၀၂၅ စက်တင်ဘာလ ၇ ရက်နေ့ညတွင် မြင်တွေ့ရမည့် လအပြည့်ကြတ်ခြင်းဖြစ်စဉ်"
သဘက်ခါ စက်တင်ဘာလ ၇ ရက်နေ့ (တော်သလင်းလပြည့်ကျော်တစ်ရက်) ည မှ စက်တင်ဘာလ ၈ ရက်နေ့ နံနက်အထိ လအပြည့်ကြတ်ခြင်းဖြစ်စဉ် (Total Lunar Eclipse) ကို ကျွန်တော်တို့မြန်မာနိုင်ငံတစ်ဝန်းလုံးမှ မိုးတိမ်ကင်းစင်နေမယ်ဆိုရင် အစအဆုံး ကောင်းမွန်စွာ မြင်တွေ့ရမှာဖြစ်ပါတယ်။
လကြတ်ခြင်းဖြစ်စဉ်ဟာ အာကာသမိုးကောင်းကင်ယံနဲ့ နက္ခတ်တာရာချစ်သူတွေအဖို့ စိတ်ဝင်စားဖွယ်လေ့လာစရာဖြစ်စဉ်တစ်ခုဖြစ်ပါတယ်။
လအပြည့်ကြတ်မယ့် အဆင့်တစ်ခုတည်းကို တစ်နာရီနှင့် ၂၂ မိနစ် ကြာမြင်တွေ့ရမှာဖြစ်ပြီး လကြတ်ခြင်းဖြစ်စဉ်အစအဆုံး အနေနဲ့ကတော့ ကြာမြင့်ချိန် ၅ နာရီ ၂၇ မိနစ်ခန့် ကြာမြင့်မှာလည်းဖြစ်ပါတယ်။
လကြတ်ခြင်း ဖြစ်စဉ် အချိန်ဇယား
အောက်မှာဖော်ပြထားတာကတော့ မြန်မာစံတော်ချိန် (+6:30 UTC) ဖြစ်ပါတယ်။
🌔လ စတင်ကြတ်ချိန်
စက်တင်ဘာ ၇ ရက်၊ ည ၉:၅၈
🌓လ တစ်စိတ်တစ်ပိုင်း စတင်ကြတ်ချိန်
စက်တင်ဘာ ၇ရက်နေ့ ည ၁၀:၅၇
🌒လ အပြည့်စတင် ကြတ်ချိန် စက်တင်ဘာလ ၇ရက်နေ့ ည ၁၂:၀၀
🌑လအပြည့်အကြတ်ဆုံးအချိန်
မနက် ၀၀:၄၁
🌘လအပြည့်ကြတ်ခြင်း ပြီးဆုံးချိန်
မနက် ၁:၂၂
🌖လတစ်စိတ်တစ်ပိုင်းကြတ်ခြင်း ပြီးဆုံးချိန် မနက် ၂:၂၆
🌕လကြတ်ခြင်းဖြစ်စဉ် ပြီးဆုံးချိန်
စက်တင်ဘာ ၈ရက် မနက် ၃:၂၅
အချို့ လကြတ်တဲ့အချိန်တွေမှာ လက သွေးနီရောင်ပြောင်း သွားတတ်ပါတယ်။ ဒီလိုအနီရောင်ပြောင်းသွားတာက ဘာလို့လဲဆိုတော့ နေရောင်က ကမ္ဘာ့လေထုကို ဖြတ်သွားတဲ့အခါ နေရောင်ထဲမှာပါတဲ့ အစိမ်း၊ အပြာ၊ မဲနယ်၊ ခရမ်း စတဲ့အရောင်တွေဟာ လေထုထဲမှာ refract (အလင်းယိုင်) သွားတာကြောင့် ကျန်နေတဲ့အနီရောင်ကသာ လပေါ်ကိုကျရောက်တဲ့ အတွက် လက အနီရောင်ပြောင်းသွားတာပဲဖြစ်ပါတယ်။
ဒါ့အပြင် ကမ္ဘာ့ လေထုထဲမှာ ရှိတဲ့ ဖုန်မှုန့်တွေ နဲ့ အမှုန်အမွှားတွေ မီးခိုးတွေ ကြောင့် အနီရောင် အနေနဲ့ မြင်ရတာလဲဖြစ်ပါတယ်။ လကြတ်တဲ့အချိန်မှာ မြင်ရမယ့် သွေးနီရောင် ဟာတကယ်တော့ ကမ္ဘာရဲ့ အရိပ်ကလပေါ်ကို ကျရောက်နေတာကိုကျွန်တော်တို့ မြင်ရတာပါ။
လပြည့်တဲ့အချိန်မှာ ကမ္ဘာဟာ နေနဲ့ လကြားကျရောက်တဲ့ အတွက်“လကြတ်”တာကလဲ လပြည့်နေ့မှာပဲဖြစ်ပေါ်ပါတယ်။ လဟာ ကမ္ဘာရဲ့ အရိပ်ထဲ ဝင်သွားတဲ့အတွက်လကြတ်ခြင်း ဆိုတာဖြစ်ပေါ်ပါတယ်။ ဒီလိုဖြစ်ဖို့အတွက် ကမ္ဘာက နေနဲ့လကြား ရောက်နေတဲ့အချိန်မှာ ကမ္ဘာ၊ နေ၊ လ ဟာ တစ်တန်းတည်းဖြစ်ဖို့လိုတာကြောင့် လပြည့်ညမှာသာ လကြတ်ခြင်းဖြစ်ပေါ်တာပါ။
ဒါ့အပြင် လ အမှန်တကယ်ပြည့်တဲ့ရက် သို့မဟုတ် လကြတ်ခြင်း ဖြစ်ပေါ်တဲ့နေ့ နဲ့ ကျွန်တော်တို့ ရဲ့ မြန်မာ ပြက္ခဒိန်ထဲ က လပြည့်နေ့ ဟာ တချို့ လတွေမှာ တရက် ကွာခြားပါတယ်။ အခု လကြတ်ခြင်းဖြစ်စဉ်ဟာ မြန်မာပြက္ခဒိန်တွေအရ တော်သလင်းလပြည့်ကျော်တစ်ရက်နေ့မှာဖြစ်ပေါ်မှာဖြစ်ပါတယ်။
လပြည့်တဲ့ အချိန်နဲ့ နောက်တစ်ခါထပ် လပြည့်မယ့်အချိန် နှစ်ခုကြားက ကြာချိန်က ပျမ်းမျှ ၂၉.၅၃ ရက်ရှိပါတယ်။
အရင်ခေတ် သိပ္ပံပညာမတိုးတက်သေးတဲ့အချိန်မှာ လအနီရောင်ပြောင်းသွားတာကို ရှေးခေတ်က လူသားတွေအနေနဲ့ ကြောက်ရွံပြီး ဂမ္ဘီရဆန်တဲ့ အဖြစ်အပျက်လို့မှတ်ယူကြပေမယ့် အခုလက်ရှိ သိပ္ပံပညာ နဲ့ လေ့လာဆန်းစစ်ချက်တွေ အထောက်အထားအချက်အလက်တွေ အရ ကောင်းကင်ထက်က လကြတ်ခြင်းဖြစ်စဉ်ဟာ နေ၊လ ကမ္ဘာ တို့ လှည့်ပတ်နေကြတဲ့ သဘာဝဖြစ်စဉ်ကြောင့်ဖြစ်ပေါ်ရတာဖြစ်ပြီး ကမ္ဘာပေါ်က လူသားတွေရဲ့ နိုင်ငံရေး၊ကျန်းမာရေး၊စီးပွားရေး ၊အချစ်ရေး၊ကံဆိုးကံကောင်းခြင်းဖြစ်စဉ်များနဲ့ သက်ဆိုင်မှု မရှိတာကို သိရှိနားလည်လာသင့်ပါပြီ။
လကြတ်ခြင်းဖြစ်စဉ်များဟာ တစ်စိတ်တစ်ပိုင်းလကြတ်ခြင်း၊ အပြည့်လကြတ်ခြင်းဆိုပြီး ရှိတဲ့အလျောက် အခုတစ်ခေါက်ဖြစ်ပေါ်မယ့် လကြတ်ခြင်းဟာ အပြည့်အဝလကြတ်ခြင်းဖြစ်ပါတယ်။
တစ်နှစ်မှာ လကြတ်ခြင်းဖြစ်စဉ် နှစ်ခါကနေသုံးခါခန့်အထိဖြစ်ပေါ်တတ်ပြီးအခုနှစ်အဖို့ ဒါဟာဒုတိယမြောက်လကြတ်ခြင်းဖြစ်ပါတယ်။
ပထမတစ်ခါလကြတ်ခြင်းဖြစ်စဉ်ကို မြန်မာနိုင်ငံကမမြင်လိုက်နိုင်ပေမယ့် အခုတစ်ခေါက်ဖြစ်ပေါ်မယ့် လကြတ်ခြင်းဖြစ်စဉ်ကိုတော့ကျွန်တော်တို့ မြန်မာနိုင်ငံအပါအဝင် ကမ္ဘာလူဦးရေ သန်းပေါင်း ၇၀၀၀ ခန့် နေထိုင်နေတဲ့ဒေသတွေက မြင်တွေ့လေ့လာခွင့်ရှိမှာမို့ အတူတူကြည့်ရူလေ့လာကြဖို့ ကြိုတင်ဖိတ်ခေါ်ထားလိုက်ပရစေ။
လကြတ်ခြင်းဖြစ်စဉ် ကို စောင့်ကြည့်မယ်ဆိုပါက စက်တင်ဘာ ၇ရက်ည ၁၀:၀၀နာရီ ခန့်ကစပြီး အရှေ့ဖက် ကောင်းကင် ကို ရှင်းရှင်းလင်းလင်း မြင်ရတဲ့နေရာ ကနေ စောင့်ကြည့်ဖို့ အကြံပြုလိုပါတယ်။
ကျွန်တော်တို့ MASES အဖွဲ့မှလည်း အာကာသလေ့လာသူတွေအတွက် မိုးလေကင်းလွတ်ပြီး ရာသီဥတုသာယာမယ်ဆိုရင် MASES Facebook စာမျက်နှာမှ တစ်ဆင့် လကြတ်ခြင်းဖြစ်စဉ်တစ်ခုလုံးကို live ထုတ်လွှင့်ပြသသွားမှာလည်းဖြစ်ပါတယ်။
~MASES / Min Zaw Moe,Soe pyae htat
